Salmos 106
106
Icantani ipiatsajeitaca ishanincajeitaniri Israel
1¡Icameetsataque Tasorentsi!
Pimpasonquijeiteri Tasorentsi, tempa icameetsatasanotaque,
icantani inintajeitaquee.
2¿Jaanica materone iriotacotero imataqueri Tasorentsi yanaacotanti?
¿Jaanica materone intsoteero
incantacoteri icameetsatasanoti Tasorentsi?
3Iquimoshirejeiti yora antayetirori cameetsatatsiri,
aisati icantani yantajeitiro queariotasanotatsiri.
4Notasorentsite, pinquenqueshiretena
ariorica pincavintsaajeitajeri pishanicajeitacari,
aisati ariorica pimpoque poavisaacoteri,
5noneanteariri inquimoshirejeite picoyeajeitaqueri,
noncarajeitanteariri narori nonquimoshirejeitanaque.
6Nantajeitaquero caari cameetsatatsi,
noquempejeitacari intacantajeitaquenaniri,
te noncameetsajeiteji catsini.
7Yora intacantajeitaquenaniri te inquenqueshireteroji
pimayetaqueri anta Egiptoqui caari ineapinijeiti;
ipeacojeitacaro pinintasanojeitaqueri
aisati ipiatsajeitaquempi incajarequi Quitioncari.
8Iro cantaincha Tasorentsi yoavisaacojeitaqueri,
inijaasanotaqueri itasorenca impincatsatasanojeitanteariri.
9Ishintsitsataquero incajare Quitioncari opirijatanaque,
yaniijeitanaquero nianqui
iquempetacantaquero caaraiteri, imonteajeitantanacari.
10Aitaque ocantacari yoavisaacojeitaqueri;
caari imajeitantari iroimpiavajeri quisajeivetacariri.
11Aajeitaqueri incajare quisajeivetacariri,
itsoncajeitaca maaroni; tecatsi timanajantsine.
12Irosati ishirejeitantanacaro icantasanotaqueriri Tasorentsi;
ipampoyeajeitaqueneri cantacotiriri: Icameetsati.
13Iro cantaincha intsipaite ipeacojeitacaro imayetaqueri Tasorentsi,
te iroyeacoteriji iriotacayeri iquenqueshiretaqueri.
14Anta caaraiteriqui ineantajeivetacari Tasorentsi,
ishintsinajeitaqueri icoacotaqueri impapinijeiteri iroyeari.
15Ari ipaqueri Tasorentsi icoacojeitaqueriri,
iro cantaincha itiancaqueneri mantsiarentsi oamaajeitaqueriri.
16Aisati isavicajeitaquenta ainiro quisanentimentaqueriri
ijivatacanti Moiseshini jeri Aarón, yora inashitacaacari Tasorentsi.
17Impoiji otencareanaque quipatsi
oniajeitaqueri Datán aisati Abiram jeri icarajeitaqueri.
18Aisati omorequimojeitanaqueri paamari
otaajeitaaqueri maaroni caari cameetsajeitatsi.
19Anta toncaariqui Horeb yovetsicaqueri oro
ishiacantaqueri vacajaniqui ijitasorentsitaqueri, ipincatsatashijeitacari.
20Yojocanaqueri Tasorentsi yora cameetsatasanotatsiri,
yovetsicashitaca shiacantsi vacajaniqui oarori paashito,
21Ipeacojeitanacari Tasorentsi oavisaacojeivetacariri,
matasanovetacarori paitapeerica caari ineapinijeiti anta Egiptoqui.
22Imatasanoyevetacaro caari ineapinijeiti
anta iipatsitequi ishanincapeeni Cam
aisati imatasanotaqueri incajarequi Quitioncari.
23Icoasanovetaca Tasorentsi intsoncajeiterime,
iro cantaincha Moiseshini, yora icoyeane,
icantacoventaqueri itsimareacaajari iquisasanovetanaca;
irotaque caari itsoncajeitantari.
24Aisati te incoajeitero quipatsi cameetsatasanotatsiri;
te irishirejeitearoji icantasanovetacariri Tasorentsi.
25Icantimajeitaqueri Tasorentsi anta ivancojaniquipeequi,
te inquemisantajeiteroji icantavetacariri.
26Impoiji icanti: “Nocantani Naneasanoti.
Nocantasanoti: Noamaajeiteri maaroni anta caaraiteriqui,
27aisati nonquempeteri irishanincajeitajeari,
novaraajeiteri inampipeequi
yora quemisantashiyetariri ijitasorentsiyeetiri.”
28Aisati anta toncaariqui Peor,
ipeajeitaca iveranaro ijitasorentsiyeetiri Baal,
yoajeitacari ivatsa itayeetinirori caari aneatsi.
29Ora yantayetaqueri caari cameetsatatsi,
irotaque iquisacantacariri Tasorentsi
itiancaqueneri oashinoncantsi itsoncajeitaca icamajeitaque.
30Iro cantaincha yora Finees yoaqueri cantacaacarori;
irotaque opeantanajari oashinoncantsi.
31Ari ineacameetsataquero Tasorentsi
ora yantaqueri Finees cameetsatatsiri,
incanteani inquenqueshiretajero irishanincajeitajeari coajica.
32Aisati iquisacaacari Tasorentsi anta nijaapeequi Meribáquiniri,
iriotaque cantacaajeitacarori ishanincapee,
icantacantantacariri Moiseshini iriori.
33Iquisacaasanotacari ineaveetashitantacari, te irioteji paitarica icantaqueri.
34Te intsoncajeiteriji pashinipee atiri icantavetacariri Tasorentsi.
35Iro cantaincha iconoajeitanacari pincatsatashijeitariri ijitasorentsiyetiri,
yantayetanaquero yamejeitari iriori;
36ipincatsatashijeitacaro ijitasorentsiyetiri,
iriojeitaque cantacantainchari yashinoncaajeitantacari.
37Yoajeitaqueri itomipee jero irishintopee,
itaaqueneri camaaripee.
38Oshequi irirajani, yoashiyetacari itomipeeni jero irishintopeeni,
yoaquenerori ijitasorentsitashiyetari canaaneopee,
icaariperotaquero quipatsi.
39Aisati icaariperojeitaca,
Yojocanaqueri Tasorentsisanori ipincatsatashitanacari ijitasorentsiyetiri,
yantashiyetacaro maaroni caari cameetsatatsi, icoacaashiyetacari.
40Yora Tasorentsi iquisasanojeitaqueri ishanincajeivetajari,
te incoajeitajeriji yashijeivetajari;
41yojocanaqueneri pincatsatashijeitariri ijitasorentsiyetiri,
irosati ipincatsariventantacari quisajeitaqueriri;
42yoashinoncaajeitaqueri quishiriri iperanajeitacari.
43Yoavisaacotapinivetacari Tasorentsi,
iro cantaincha ipiatsatapinijeitacaro icantavetacariri,
irointi yantasanojeitaquero caari cameetsatsi.
44Iro cantaincha ineaqueri yashinoncaajeitaca
aisati iquemaqueri icavintsaaca,
45irosati iquenqueshireantanajaro icantasanotaqueriri:
Ancaratavacaajeitea,
ivashiniajiro, te inquisajeitajeriji;
tempa oshequi inintasanojeitiri,
irotaque icavintsaajeitantajariri.
46Aisati icantashireacaajeitacari anaacojeivetacariri,
yaacameetsajeitajiri cameetsa.
47¡Poavisaacojeitajena, Notasorentsite!
¡Poimpiajeitajena noipatsitequi nosaviquimojeitapaajeariri nampitsipeequiniri,
noncantacojeitantapaajempiri: Picameetsati,
nonquimoshirejeitapaaje!
48¡Icameetsatasanotaque Tasorentsi,
Itasorentsite Israel, incantaitatiyempani intime!
¡Incantajeite maaroni: “Aitaque incanteari!”
¡Icameetsataque Tasorentsi!
Currently Selected:
Salmos 106: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
