Proverbios 10
10
Icamantantajiro Salomón iotantsi
1Jero icantayetiri Salomón:
Yora evancari iotatsiri yoimoshirenquiri iriri jero iriniro;
irintiquea caari iotatsi, yoashinoncairi.
2Ora ashiyeveteari ancoshitanterorica, eiro oveshireacaasanoteetsi;
irointiquea antapiniyeterorica cameetsayetatsiri, ojocaacoventee caamanentsi.
3Yora Tasorentsi eiro ishinetiritsi intasheaveete cameetsatatsiri;
irintiquea caari cameetsatatsi, inquemapinitero itashe.
4Pantaveeterica capichaji, oncoiteimotempi paitapeerica;
irompa pantaveetasanoterica, ontimotasanotempi pashiyeteari.
5Yora aviitatsiri osarentsiqui, iriotaque iojeitatsiri;
irintiquea peraventarori iraviite, irinti caari iojeitatsi.
6Yora atiri cameetsatatsiri itasoncacoventeetiri;
irintiquea caari cameetsatatsi,
ontsonqueri oashinoncantsi.
7Yora cameetsatatsiri inquenqueshireacoyeeteri cameetsa;
irintiquea caari cameetsajeitatsi, intsipaite impeacoyeeteari.
8Yora iotatsiri iquemisantiro icanteetiriri;
irintiquea neanatashitarori caari ioti, irashinoncayea.
9Yora caari ireevitantatsi tecatsi intsaroacayea;
irintiquea antayetirori caari cameetsatatsi, irashinoncayea.
10Yora amenampioquijayetantatsiri, iriotaque amanontarori caari cameetsatatsi
aisati neaveetashiyetarori paitapeerica, irashinoncayea.
11Ora ineanayetiri cameetsatatsiri, irotaque oaneantatsiri;
irintiquea caari cameetsatatsi, ontsonqueri oashinoncantsi.
12Ariorica pinquisavacayea, irotaque pantavacanteari;
irompa pinintavacayearica, pimpeacotavacayearo icantimayetimpiri.
13Yora iotatsiri ineaveeti cameetsa;
irintiquea caari quenqueshireacha, impasayeeteri itapiiqui.
14Yora iotatsiri ioti imajereti, te irineaveetashiteaji;
ariorica irineaveetashitea caari iotatsi, ompomerentsitimoteari incovencatacote.
15Ora yashiyetari ashitaarantincari, irotaque jocaacoventiriri;
irintiquea caari ashitaarantacha, yashinoncaa.
16Ora irineajeiteri cameetsatatsiri iraneasanojeite;
irintiquea caari cameetsajeitatsi, irosati irantapinitero caari cameetsatatsi.
17Yora quemisanterone icanteetiriri, osamani iraneajeite;
irintiquea caari quemisanterone, impeajeitea incamajeite.
18Irashi yora tseeyajeitachari imaniro iquisashireta,
aisati yashi yoiro caari iotatsi, yovaayetiro neantsiyetatsiri.
19Yora neaveetashitachari oshequi icomita;
irintiquea iotirori irimajerete, iotasanojeiti.
20Ora irineane cameetsatatsiri oquempetacari plata ioshitachari;
irointiquea iquenqueshireyevetari caari cameetsatatsi, tecatsi ojitaquea.
21Ora ineanatiri cameetsatatsiri oshequi iotacaajeitanti;
irintiquea caari iotatsi, incamimentero caari iquenqueshiretacoti.
22Intasoncaventantearica Tasorentsi, oshequi ontimimotee ashiyeteari,
aisati te oashiretacanteaji.
23Yora caari quenqueshireacha iquimoshireventiro yantayetiri caari ipashiventacaa;
irintiquea iotatsiri, iquimoshireventiro iotantsi.
24Ora itsaroacaajeitari caari cameetsatatsi, irotaque avishimojeiterine;
irintiquea cameetsatatsiri, irimoncarayeeteneri icoajeitiri.
25Impeajea caari cameetsatatsi ariorica omapocaqueri covencatatsiri quempetarori antearo tampea;
irintiquea cameetsatatsiri, incanteani intime.
26Yora tianquiriri peranti irantaveete,
onquempetimoteari quepishitatsiri caari imayetiro irantsiqueetero,
aisati onteajaquiteri cachaa.
27Ampincatsateririca Tasorentsi osamani aneajeite;
irintiquea caari cameetsajeitatsi, eiro itimitsi osamani.
28Yora cameetsatatsiri inquimoshireventero coajica yoyeajeitaqueri;
irintiquea caari cameetsatatsi, irineero irashinoncaajeitea.
29Irojocaacoventeri Tasorentsi antayeterone cameetsatatsiri;
irintiquea impoyereajeite antayetirori caari cameetsatatsi.
30Eiro catsini ipeatsi cameetsajeitatsiri;
irintiquea caari cameetsatatsi, eiro icantani intime quipatsiqui.
31Yora cameetsatatsiri ineaveetantaro iotantsi;
irintiquea tseyachari, iroimajerenteeteri.
32Yora cameetsatatsiri ineanayetiro cameetsayetatsiri;
irintiquea caari cameetsatatsi, ineanatashiyetaro tseeyantsi.
Currently Selected:
Proverbios 10: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
