Números 19
19
Iroameetsatantajeari caariperoyetachari.
1-2Ari iquenquetsatacaajiri Tasorentsi Moiseshi jeri Aarón, icantiri:
“Narotaque Tasorentsisanori noncantempi, pincanteri pishanincapee iramempi aparoni vaca potsonavitiri caari amashitacha, caari yoisotacoti inchaquii irantaveetacanteariri. 3Impoiji pimperi antaveetatsiri Eleazar, iraanaquerita otsapitapaaca pisavicajeitantari, impoiji incanteri iriori pashini iroimoteri. 4Yora antaveetatsiri Eleazar iraajatavaque iriraja capichaji iracotsapaquiqui, intsiquirijamotero nijanta Pancotsi papatotimentantanari; oncarate 7 irampiitapinitero. 5-6Irosati intaimotantaquempiri ivatsa, imeshina, iriraja jero itia. Impoiji iraye antaveetatsiri inchato santari, ojempequijaniqui hisopo jero tijachari quitioncamaori, intayero maaroni paamariqui itaantacariri vaca. 7Impoiji inquivajero iitsaare aisati incaataje, irosati irijatantajea ivancoqui. Iro cantaincha eirota icameetsatitajatsi irosati ontsitenijencaiteanaje. 8Aisati taaqueriri vaca inquivajero iitsaare aisati incaataje iriori. Iro cantaincha eirota icameetsatitajatsi irosati ontsitenijencaiteanaje. 9Impoiji pashini shirampari oameetsatatsari, irayero iriori isamamporeni vaca, iroyero nijanta otsapitapaaca pisavicajeitantari cameetsaiteriqui, inquempoyeero. Irotaque irayeri pishanincapee, iroameetsatantajeari irisaitaquero nija; tempa irotaque yoimentaquerori caari cameetsatatsi. 10Yora aaquerori samampo inquivajero iriori iitsaare, aisati eirota icameetsatitajatsi irosati ontsitenijencaiteanaje. Oca nocantacantiri, oncantaitatiyempani, irotaque irimoncarajeiteri pishanincapee aisati pashinisati saviquimojeitiriri.
11“Yora antaquerine camayetatsiri, eiro icameetsatitajatsi oncarate 7 quitaiteri. 12Oncaratapaajerica mava quitaiteri aisati caratapaatsiri 7, ocameetsati inquivajearo nija conoachari isamampore vaca, impoiji incameetsatanaje. Irompa eirorica iquivajarotsi oncaratapaaquerica mava quitaiteri aisati caratapaintsiri 7, eiro icameetsatajitsi. 13Intimerica antaquerine camatsiri, teerica iroameetsatajeaji icaariperotaquero Nonantari, ocameetsati pintiancajeri. Tempa te inquivajearo nija iroameetsatantajeameri, irosati icanta icaariperotaca.
14“Jero nocantacantiri aisati: Intimerica camatsineri ivancoqui, maaroni timayetatsiri tsompoina aisati maaroni queeroneri, eiro icameetsatanajitsi oncarate 7 quitaiteri. 15Aisati maaroni oantayetari paitapeerica caari pashitasanoyetacha, eiro ocameetsatanajitsi iroori.
16“Jaanicarica antaquerine camayetatsiri yoyeetiri nijanta, irompa icamashitarica, iroorica yajiricaque itonquini aisati iroorica omoro yoanteetariri, eiro icameetsatanajitsi oncarate 7 quitaiteri.
17“Oncameetsatantajeari caariperoyetainchari, ocameetsati iraaje covitiqui capichaji isamampore vacani itaimenteetirori caari cameetsatatsi. Impoiji irisaitantearo nija soquijaatatsiri tsompoina. 18Yora pashini pishaninca cameetsatatsiri iraye ojempequijaniqui inchashi hisopo, iroviincaajatero. Impoiji intsiquirijantayetajearo pancotsi, oantayetari paitapeerica jeri savicantayetarori aisati antayetaqueriri camayetatsiri, yoyeetiri, irompa icamashitarica, iroorica yajiricaque itonquini aisati iroorica omoro yoanteetariri. 19Yora cameetsatatsiri ocameetsati intsiquirijajeri caariperotainchari oncaratapaaquerica mava quitaiteri aisati caratapaintsiri 7, cameetsatanaji ini. Irosati inquivantajearo iitsaare aisati incaataje iriori. Iro cantaincha irosati incantea incaariperote ontsitenijencaiteanaje. 20Irompa teerica iroameetsatajeaji, ocameetsati pintiancajeri. Tempa icaariperotaquero Nonantari aisati te inquivajearo nija iroameetsatantajeameri, irosati icanta icaariperotaca. 21Oca nocantacantiri oncantaitatiyempani. Yora tsiquirijantajearine nija itsipa iroameetsatantajeari, ocameetsati inquivajero iriori iitsaare. Aisati antaquerone nija yoameetsatanteetari, eiro icameetsatitajatsi irosati ontsitenijencaiteanaje. 22Maaroni caariperotachari, paitarica irantaque, eiro ocameetsatanajitsi aisati antaquerine eiro icameetsatitajatsi irosati ontsitenijencaiteanaje.”
Currently Selected:
Números 19: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
