Levítico 9
9
Intanacaro Aarón yantaveeti.
1Ari avisanque aparo dominco, irosati icajemantacari Moiseshi Aarón aisati itomipee jeri jivatacaajeitiriri ishanincapee. 2Icantiri Aarón: “Pamaque aparo vacajaniqui poimenterori caari cameetsatatsi, aisati aparo ovisha pintayeneriri Tasorentsi, eiroyea yamashiyetatsi. 3Irioquea ashanincapee, pincanteri iramaque aparo chiivo iroimenterori caari cameetsatatsi aisati aparo vacajaniqui jeri ovisha moncarataquerori aparo irosarentsite, caari amashiyetacha. Iriotaque pintayeneriri Tasorentsi. 4Aisati iramaque aparo anteari vaca jeri ovisha, iriotaque poimenterori iraacameetsajeitantajeariri Tasorentsi. Iramayetaque aisati tiricovane camichoavatsatachari, conoachari quejitsi. Tempa meeca inconijatimotempi Tasorentsi.”
5Ari yaajeitanaquero anta Pancotsiqui yapatotimentantariri Tasorentsi maaroni icantaqueriri Moiseshi. Iquempejijeitapaacaro maaroni ishanincapee, icatiimojeitapaacari Tasorentsi. 6Irosati iquenquetsatacantacari Moiseshi, icantajeitiri: “Irotaque oca icoacaajeitaquempiri Tasorentsi. Ocameetsati pimajeitero, impoiji ironijaajeitempiro itasorenca.”
7Impoiji icantiri Moiseshi Aarón: “Pinquempejitearo altar, poyeri vacajaniqui aisati ovisha jeri yamajeitaqueri iriori pishaninca. Pintaimenterori caari cameetsatatsi pantayetiri aisati yantajeitiri iriori, impeacojeitantempirori Tasorentsi.”
8Ari iquempejitacaro Aarón altar, irosati yoamaantacari vacajaniqui yoimentaquero yantayetiri. 9Ari ipocapaaque iriori itomipee, yaacotanaqueneri iriraja. Irosati yoviincaajatantacaro Aarón iracotsapaqui, ipantayetaquero oshevatapeequi altar. Ora timaarantaintsiri isaitantayetacaro ocatiantari. 10-11Impoiji itaaquero altariqui irejipee, aisati iranatarequiniri jero ishonquepeo. Tempa irotaque icantaqueriri Tasorentsi Moiseshi. Irointiquea ivatsa jero imeshina itaaquero otsapitapaaca isavicajeitantari.
12Irosati yoamantacari aisati ovisha intayeneriri iriori Tasorentsi. Yora itomipee yaacotanajiniri aisati iriraja, irosati isaitantayetacaro jenioquiji altar aisati acaquerocapeequi. 13-14Ari itotaqueri iito aisati ivatsapee. Impoiji iquivaquero iramporetsapee jero ivoripee. Irosati yantayetanacanari Aarón, itaantacariri maaroni altariqui.
15Ari yaaqueri chiivo yamaqueri iriori ishanincapee, yoaqueri, itaimentaquero caari cameetsatatsi yantajeitiri. Iquempetaqueri itaimentaquerori iriori yantayetiri. 16Yamantacariri virantsi intayeneriri Tasorentsi, imoncarataquero icantaqueri. 17Irosati yaacotantacaro iroori tononcavanetachari ivanquirepee. Yaavanetaque capichaji, irosati itaantacaro altariqui itsipataaqueri itaamanaqueri.
18Irosati yoamaantacari iriori anteari vaca aisati ovisha yamaqueri ishanincapee, intaimenterori iraacameetsatantajeariri. Yora itomipee yaanajiniri iriraja, irosati isaitantacaro jenioquiji altar aisati acaquerocapeequi. 19Aisati ipayetaqueri irejipee vaca, ovisha, ichomequi, ireji manacotirori iramporetsa, ishonquepeopee jero ireji aisati iranatarequiniri. 20Ari yoaquero itsipataaquero inejipeequi, irosati itaantacaro Aarón altariqui. 21Irointiquea inejipee aisati ivoripee iracosanoriquiniri yaaquero iracoqui yoancaqueneri Tasorentsi, ishevashevatacaacari. Aitaque ocantari yamejeitari iriori; tempa irotaque icantaqueriri Tasorentsi Moiseshi.
22Ari yoancaquero Aarón iraco, icantacoventaqueri ishanincapee intasoncacoventanteariri Tasorentsi. Itsoncantanacarori itaimentiro caari cameetsatatsi aisati itaaqueneri icashiacaaqueriri Tasorentsi jero itaimentaquerori iraacameetsatantajeariri; irosati inijantareantanajaro altar. 23Impoiji iqueanaque Moiseshi jeri Aarón Pancotsiqui yapatotimentantariri Tasorentsi. Isotoantanajari, icantacoventajiri aisati ishanincapee. ¡Irosati ineajeitantacaro ishipaquireane Tasorentsi! 24Aisati oponeanaca paamari inaquenta Tasorentsi, otsoncapaaqueri virantsi altariquiniri, otaapaaqueri.
Ineajeitantacarori, iquimoshiretasanojeitanaque catsini. Irosati itiyeroajeitantanaca quipatsiqui yoivotashijeitanacari.
Currently Selected:
Levítico 9: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
