Levítico 24
24
Quejitsi intsiotapiniteri.
(Éxo. 27.20-21)
1Ari icantajiri Tasorentsi Moiseshi:
2“Pincanteri pishanincapee iramajeitaquempi oreji orivo ioshitaquea, ontsiotapinitanteari tsiorontsi, timatsiri acaqueroca oticaashiro Pancotsi Nonantari cameetsatasanotatsiri, otimantari Cajón. 3Yora Aarón iriotaque amenapiniteroneri ontsiotacotapinitantearori maaroni tsiteniriqui Pancotsi papatotimentantanari, acaqueroca oticaashiroqui manacotirori Cajón onantari Nocantacantiri. Oca nocantiri oncanteani ontime, irosati irineajeitaje pishanincatajeari coajicani. 4Ocameetsati irovetsicapinitero tsiorontsi vetsicachari ioshitachari oro, intsiotacotapinitantearori Nonantapinitari.
Tanta iroapiniteri Inantariqui Tasorentsi.
5“Aisati ocameetsati iraye cameetsavanetatsiri tirico irovetsique 12 tontacotari tanta, oncarate ontenayete aparopeeni 4 kilo ari nianqui. 6Impoiji iroayetero meesaqui cameetsatatsiri, oncarate apite iroveshintsaaque, oncarayetaque 6 apashintsaquiropee. 7Aisati iroaquero iroori casancavaneri oveshintsaayetaca tanta, irotaque inquenqueshiretapinitantearori noneacameetsajencatasanotaquero oca itaaquenari. 8Incanteani iroapinitero oca Nonantariqui quitaiteripeequi imaoreantari, irotaque nonquenqueshiretacotantearori nocantasanotaqueriri pishanincapee, noncarajeitaquempi. 9Irotaque iroyeari iriori Aarón aisati irishanincajeitajeari. Ocameetsati iroajeitearo oca tanta oyaiteriqui Nonantari; tempa ocameetsatasanotaque, irotaque itaarantapinitanari nonashitacaasanotacaro.”
Iroasanquetayeri Tasorentsi cantimataqueriri.
10-11Itimi aparo shirampari otomi Selomit, ishanincapee Israel, irio iriri egiptosati. Ora iriniro irotaque irishinto Dibrí, ishanincasanorini iriori Dan. Yora shirampari iquisaqueri aparoni ishaninca Israel isavicajeitinta. Iquisavacaajeitantacari, iquisatsataqueri icantimataqueri Tasorentsi. Iquemanteetacariri, irosati yaanteetanacanari Moiseshi. 12Ari yoatiacantavaqueritsita, impoiji icantiri Tasorentsi jaoca incanteriri. 13Ari icantiri Tasorentsi Moiseshi:
14“Pijate paanaqueri cantimataquenari otsapitapaacanta pisavicajeitantari. Pincanteri quemajeitaqueriri iroanquetenerita iracopee iitoqui. Impoijiquea impichaajeiteri maaroni pishanincapee. 15-16Meeca pincamantasanoteri iriori pishanincapee: Jaanicarica tseencaquenane aisati cantimataquenane, ontime irantane. Ocameetsati impichaajeiteri maaroni pishanincapee, irosati incamantaquea. Aisati inquempeyeeteri iriori pashinisati, iriorica pishanincasanori incantimataquenarica; ocameetsati incame.
17“Jaanicarica oantatsine, ocameetsati iroyeetajeri iriori.
18“Jaanicarica oitanterine virantsi itsipa, ocameetsati impinaajeri yoitaqueriri.
19“Jaanicarica oashinoncayerine ishaninca, aisati inquempeyeetajeri iriori, iroashinoncayeetajeri. 20Yora carajantatsine, aisati incarajeetajeri iriori. Yora posaajaquitantatsine, aisati imposaajayeetajeri iriori. Yora ajireitanterone ajitsi, aisati irijireiteetajeri iriori. Irisati quemaatsiyetajearone paitapeerica irantayeteri.
21“Jaanicarica oitanterine virantsi, ocameetsati impinaajeri yoitaqueriri. Jaanicarica oantatsine, ocameetsati iroyeetajeri iriori.
22“Oca nocantacantiri irotaque irashi iriori pashinisati aisati pishanincapee. Tempa narotaque Tasorentsisanori Pitasorentsite.”
23Ari icamantaqueri Moiseshi ishanincapee, irosati yomisoquijantacari tseenquimataqueriri Tasorentsi. Yaanaqueri otsapitapaaca isavicajeitantari, ipichanajeitaqueri irosati icamantaca. Imataquero icantaqueriri Tasorentsi Moiseshi.
Currently Selected:
Levítico 24: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
