Levítico 21
21
Irimoncarateri antaveeyetatsiri.
1Ari icantajiri Tasorentsi Moiseshi:
“Pincanteri antaveeyetatsiri, itomipee Aarón: Eiro icaariperotacaaritsi ishanincapee camayetatsiri. 2-3Irintiquea ishanincasanoripee: iniro, iriri, itomi, irishinto, irirenti, iroorica iritsiro caari aatsine ojime saviquimotiriri; iriojeitaque irishineteri incaariperotacayeari. 4Irointiquea pashini ishanincasanori aatsiri ojime, eiro icaariperotacaarotsi.
5-6“Eiro yameetirotsi iishi jero ishipatona, aisati eiro itoyetatsi ivatsapeequi. Ocameetsati incameetsatimentasanotena, eiro icaariperotirotsi novajiro; tempa iriojeitaque taapinitenarine icashiacaajeitanari. Irotaque nocoacantacariri incameetsatasanotanaque.
7“Eiro yairotsi antashiyetariri shirampari, yajiricashiyeetari aisati jocayetiriri ojime. Tempa nonashitacaasanotacari. 8Pincantasanoteri eiro yantayetirotsi ocapee. Tempa iriojeitaque vanquenarone oanarontsi icashiacayeetanari. Ocameetsati incameetsatasanotanaque, narotaque oameetsatasanoterine. Tempa naro Tasorentsisanori, nocameetsatasanotaque narori.
9“Ariorica antacaajeari irishinto antaveetatsiri, oquempetacantaca antashiyetariri shirampari, te ompincatsateri iri. Ontimatiye intayeetero aneatsiquera.
10“Yora jivatiriri antaveeyetatsiri, iriotaque ijivayeetaqueri isainayeetaqueri iitoqui quejitsi nonashitacaari, iriotaque quitsaatarori cameetsamaotasanotatsiri. Te oncameetsateji irisavoinareacotero iishi, aisati eiro itsereirotsi iitsaare iriraacotanteariri camatsiri. 11Omavetaquea iriorica iriri, iriniro; eiro ijatashitiritsi icaariperotacaaricari. 12Aisati eiro isotoitsi Nonantariqui ariorica irantaveete, icaariperotirocari. Tempa isaiyetaquero iroori quejitsi nonashitacaari, yoameetsatasanotantacarori. Tempa narotaque Tasorentsisanori.
13“Ocameetsati iraye tsinane evancaro caariquera neerine shirampari. 14-15Eiro catsini ijinantarotsi camajimentaaro, iroorica jocayetiriri ojime, yajiricashiyeetari aisati iroorica antashiyetariri shirampari. Ocameetsati ijinantearo evancaro ishanincasanori, eiroquea icaariperotacantaritsi irishanincajeitajeari. Tempa narotaque Tasorentsisanori nashitacaajeitacairiri.”
Te incoyeji Tasorentsi irantaveete amashiyetachari Inantariqui.
16Ari icantajiri Tasorentsi Moiseshi:
17“Pincanteri pirenti: Yora ishanincajeitari meeca aisati irishanincajeitajeari coajicani, yamashiyetarica, te noncoacayeriji intayetenari virantsi yameeyetanari. 18-21Iquempetaca iriorica: maviteajari, mayejaari, amashitachari iirinaqui, iyempitaqui, carajayetatsiri ivoripeequi, iracojempequiqui, morintetatsiri itapiiqui, caramataquitatsiri, camarajaquitatsiri iroqui, patsetatsiri, patsaayetatsiri aisati aitsoquireari ishiramparitantari; eiro catsini imatatsi irijate intayetenaro iriori yameeyetanari aisati oanarontsi icashiacayeetanari. 22Ocameetsati iroyearo irointi oca oanarontsi cameetsatasanotatsiri, nonashitacaari. 23Iro cantaincha eiro ijatitsi oticaashiroqui Nonantari, aisati eiro iquempejitarotsi altar icaariperotirocari. Tempa narotaque Tasorentsisanori nashitacaacarori.”
24Ari imataquero Moiseshi yovaajiniri Aarón jeri itomipee aisati maaroni ishanincapee.
Currently Selected:
Levítico 21: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
