Éxodo 28

Itsaarepee yora antaveetatsineri Inantariqui Tasorentsi

(Éxo. 39.1-31)

1“Nocoaque quiso iroyempi quempeji pirenti, jeri itomipee: Nadab, Abiú, Eleazar jeri Itamar. Iriojeitaque nocoyeaqueri antaveetenaneri.

2“Povetsicacanteneri pirenti iitsaarepee marereamaotasanotatsiri, cameetsaquea iroanencanteari. 3Pincantajeiteri pishanincapee iotasanoyetatsiri maaroni niotacaasanoyetaqueri icaninatacoyetiro cameetsa paitapeerica, irovetsiquenerita inquitsaateari Aarón. Tempa iriotaque nonashitacaacari antaveetenaneri Pancotsiqui Nonanteari. 4Jero aisati irovetsicayetaqueneriri. Iroyeri inejiqui icanteetiri pectoral; jero impashicanejiteari icanteetiri efod. Impoiji inquitsaateari vecaraachaneri itavaatoqui jero iroyeri tsompoina vecaraapemparine iitiqui. Aitaque incaninatacoyetaqueneriri. Aisati intijaqueneri lino jentamaotasanotatsiri irisavoinateari, icanteetiri turbante; jero irishiticacoteari itsaquiqui. Aisati inquempeyetaqueneri itomipee, irotaque irantaveetacayeri coajica Novancoqui. 5Yora vetsicayetenerine iitsaarepee, intijacoyetavaqueneri oro. Aisati intsaayetaque lino quiripetsari quitioncamaonirori, asoorimaonirori jero quitioncamaori. Irotaque inconoayetavaquerori ariorica intijaqueneri.

6-7“Aisati inquempetaquero impashicanejiteari, incaninataroquitaqueneri. Aisati intsaayetaque lino quiripetsari quitioncatsanirori, asooritsanirori jero quitioncatsari. Irotaque inconoayetavaquerori ariorica intijaqueneri. Impoiji intijashitaquero apite irishiticacoteari ishempaqui, ampataroquitantanaqueari. 8Aisati inquempetaquero irishiticatsaquiteari, iquempetacantaquero impashicanejiteari.

9-10“Impoiji iraaque apite mapicotajaniqui quitioncanirori, aitaque irisanquenayetaquerori ivajironi itomipee Israel. Aparo mapicotajaniqui irisanquenate oncarate 6 ivajiro aisati inquempetaquero otsipacotajaniquiqui. Irijivataqueri jivatatsiri itimi irosati vecarantapaarori. 11Yora vetsicayeteroneri incharincasanotaquero onconijasanotantanaqueari ivajiropee. Impoiji irivintonatashijaniquiyetero oro iroantaquearori. 12-13Irosati iroantaquearo intsatotaqueroriqui impashicanejiteari. Irotaque timatsineri ivajiropee ishempaqui Aarón inquitsaatacoteari ariorica inquenquetsatacaapinitena. Aisati irotaque inquenqueshireacotanteariri ishanincapeeni. 14Impoiji irovetsicaque aparo careenatsa, oncarate apite oshivitsaare ioshitaquea oro, irishoncayetaqueri irivintonashijaniquiyeterori mapicotajaniqui.

15-16“Ora pectoral iroyeri inejiqui aisati inquempetaquero efod incaninatajero, cameetsa ontontamaojaniquitaque. Oncarataque 22 centímetro otsarancajaniqui, omoncaratavacaaquea. Tempa irotaque incantacoventajeitanteariri cameetsa ishanincapee. 17Ariorica intsoncayetaquero, irosati iriveshintsaantayetaquearo mapijaniquipee pinatasanoyetachari: oncarate 4 oveshintsaayetanaquea. Ora irintaqueari iroveshintsaaquero, iraaque aparo rubí, crisólito jero esmeralda. 18Ora apishintsaquitatsineri iraaque granate, zafiro jero jade. 19Ora mavashintsaquitatsineri iraaque jacinto, ágata jero amatista. 20-21Iroquea vecarantapemparone iraaque topacio, cornalina jero jaspe. Ocapee iroashiyetavaquero oro irivintonatashijaniquiyetaquerori. Oncarataque 12, tempa aitaque icarajeitiri itomipeeni Israel. Ocameetsati incharincasanoyetaquero aparopee mapijaniqui ivajiropeeni.

22“Impoiji irovetsicashitero iroyeri inejiqui apite careenatsajaniqui ioshitaquea oro, inquempetacantaquero ampitsarentsi soocatsa. 23-24Irisati iraaque oro irantaquenerori apite oyempitajaniqui ashi jenoquiniri; aparo ashi irampatequi jero iracosanoriqui. Aitaque iroiminqueayetaquerori careenatsajaniqui. 25Irotaque iroisotacotasanotantaquearori ora iroantaquearori mapicotajaniqui apiiteroqueti ishempaquiniri. 26Aisati inquempetashitaquero ashi ishaavijiiniri, iroisotacotantaquearori iroyeri inejiqui impashicanejiteari. 27Irisati iraaje oro irantashitaquerori apite oyempitajaniqui impashicanejiteari, iraacotantaqueari itapiiqui. Iro cantaincha intsipataimataqueneri iroisotsaquiteari jenioquiji, ari ishaaviji capichaji. 28Cameetsaquea ontsipatantapemparori oyempitajaniquipee iroyeri inejiqui jero ashi impashicanejiteari. Iroquea iraacotantaquearori soocatsa quitioncanirori, cameetsa ompatacantapemparori impashicanejiteari. 29Cameetsaquea inquitsaatacotanaquearo Aarón, niotacanteariri nocoacairiri ariorica impocapinite inqueantapiniteari Nonanteariqui. Aisati onconijatacotasanotaque inejiquiniri ivajiro pishanincapeeni. Irotaque inquenqueshireacotapinijeitanteariri. 30Aitaque iroyeneriri aisati icanteetiri urim jero tumim incanteani inquitsaatacotapinitearo. Tempa irotaque iotacayerine nocoacairiri ariorica inqueapinite Nonanteariqui incantacoventajeitanteariri cameetsa pishaninca.

31-32“Impoiji irovetsicaqueneri quitioncamaonirori iroicotacotearori, impashicanejiteari vecarayemparine itavaatoqui irimorontaqueneri nianqui inquitsaatantearori. Aisati irampitivitaqueneri, eiroquea otsereantatsi. 33-34Anta overaapempanta, oshoncaquea maaroni intsayetavaque campanajaniquipee yovetsiquiri oro. Aisati iraaque lino yajacayetiri quitioncanirori, asoorinirori jero quitioncari. Intijashitaquero irishiacantayetaquero oitsoqui granada. Irotaque irisatecayetavaqueri nianquipeequi irishoncaquero maaroni, cameetsaquea oanencanaquea. 35Ariorica inquitsaatacotanaquearo Aarón, irotaque poimatatsine inqueapiniterica Nonanteariqui irantaveetapinitanteari aisati ariorica irisoquijanaje, eiroquea icamantatsi.

36“Pincanteri aisati impichee oro apataroquironi. Impoiji irisanquenatero neantsi cantatsineri: ‘Inashitacaacari Tasorentsi.’ 37Impoiji impataquero savoinarontsiqui iroisotacotantaquearo soocatsa quitioncanirori. Aitaque ontimapiniteri. 38Cameetsaquea onconijatacotanaque neantsi ariorica irisavoinatacotaquearo Aarón. Irotaque irimatantearori incantacoventeri pishanincapee paitapeerica irantaque. Aisati iramenarorica impapinitenari pishanincapee timimotiriri. Ora impatacaqueneriri ivancainaqui, irotaque naacameetsatantajeariri.

39-40“Aitaque oncanteari intijayetaqueneri lino inquitsaateari Aarón. Aisati irisavoinateari jero irishiticatsaquiteari incaninatacoyetavaqueneri. Aisati inquempetaqueneri itomipee, cameetsaquea iroanencajeitanaquea inquitsaataquearorica.

41“Irotaque pinquitsaataqueriri pirenti jeri itomipee, irosati pivitejainajeitantaqueari quejitsi. Aitaque noshineteri irantaveetantenari. 42Irosati lino intijaqueneri intorosajeiteari, eiroquea iconijantantatsi. 43Irotaque inquitsaatapinijeiteari ariorica inqueapinijeite Pancotsiqui pampatotimentantenari, inquempejitantearori altar irantaveetantenari; eiroquea ipiatsatantanatsi, icamajeiticari. Irotaque oca nocantacantiri oncantaitatiyempani ontime, irosati irimoncarajeitajeri irishanincajeitajeari iriori.”

Currently Selected:

Éxodo 28: cni

Highlight

Copy

Compare