Éxodo 26
26
Irovetsicantearori Pancotsi Irinanteari Tasorentsi
(Éxo. 36.8-38)
1“Povetsicacante Pancotsi Nonanteari, pintijacantayete tocoyapee linopee quitioncamaonirori, asoorimaonirori jero, quitioncamaori; oncarataque 10 ompashicantanaqueari. Aitaque pishiacantaqueriri apite nonampire irishivanquitavacaaquea, impoiji pisataacoyetaqueri. 2Cameetsa omoncaratavacaaquea maaroni, oncarayetaque ontsantsate 12 metro ari nianqui. Iroquea otsaranca oncarayetaque 2 metro. 3Ontsantsaatantanaqueari tocoyapee oncarate 5 poavitaquero, pantsiyetaquero pashinipee. 4Anta ontsapimaoyetapempa aitaque poayetaquenerori oyempitapee quitioncanirori aisati asoorinirori oncarataque 50; 5aisati pinquempetaquero pashini, cameetsaquea omontetavacaapempa. 6Impoiji povetsicashiyetaquero oro incarataque 50, paacotantayetaquearori piyempiyetaqueroriqui; ontsipatavacantanaqueari cameetsa, ampasaanterotantanaqueari.
7“Impoiji pintijayetaque ivitipee chiivo oncarataque 11, ompashicantanaqueari Pancotsi manacoteroneri Nonanteari. 8Cameetsa omoncaratavacaaquea iroori, oncarayetaque ontsantsate 13 metro ari nianqui. Iroquea otsaranca oncarayetaque 2 metro. 9-10Ora pintaqueari caratatsineri 5, pinashitaquearo. Iroquea otsipa caratatsine 6, irotaque manacotapeerone pinqueapinitanteariqui. Anta ontsapimaoyetapempa aitaque poayetaquenerori oyempitapee oncarataque 50 aisati pinquempetaquero otsipa. 11Aisati pivetsicashiyetaquero bronce oncarataque 50, paacotantayetaquearori piyempiyetaqueroriqui ampatsarancarotantanaqueari. 12Tempa ora pimpashicantearori Pancotsi antearotsantsa oni, ora timaarantapaatsiri irotaque paincatsaneri acaquerocapeequi otimanta Nonanteari. 13Aitaque oncanteari omanacotanaquea Nonanteari, ora timaarantapaatsiri paincatsaneri apiiteroqueti, ora caratatsineri 45 centímetro ashi araquerori aisati 45 centímetro ashi acaqueroca.
14“Impoiji pisaraaque aisati imeshinapee ovisha, pajacantayetaquearo quitioncajari. Aisati pisaraaque jentameshinayetatsiri meshinantsipee, iriotaque poicotacotantaquearori.
15“Impoiji pintsirajayetaje acacia ashi Nonanteari pimpirincayetaquero cameetsa ontampaticatsantsaayetaque onquempeyetantanaquearori taaverapee. 16Cameetsa pimoncarayetaquero oncarayetaque ontsantsate 4 metro ari nianqui, iroquea otsaranca oncarayetaque 65 centímetro. 17Aisati pinquichatencatashiyetaquero ishaaviji, cameetsaquea poiminquiayetaquero oncatiantanaqueari otsipapee, aisati pinquempeyetaquero maaroni. 18Pimpirincayetaque 20 taaverapee poyeri acaqueroca catonconiri. 19Aisati povetsicayetaque 40 plata oncatiantanaqueari poayetaquero ishaaviji, poiminqueantaquearori taavera ontsitacantayetapemparori cameetsa.
20-21“Aisati pinquempetajero ashi araquerora, iraye 20 taavera jero 40 plata oncatiantayetanaqueari. Oncarate apite oncatianteari aparo taavera. 22-24Iroquea poyeri tsompoina acaqueroqui, pimpirincashitaquero taaverapee oncarate 6. Impoiji povetsicashitero poaqueri osorinapeequi oncarate apite. 25Oncaratantanaqueari 8 taaverapee ontsipayetaquearo, oncatiantayetanaqueari oncarataque 16 plata poiminqueantaquearori taaverapee ishaaviji.
26-27“Impoiji povetsicaque 5 acacia pantancotashiyeterori taaverapee araqueroraniri, aisati 5 iroyeri acaqueroca. Impoiji 5 pantancotashiterori taaverapee iroyeri araquerora pashini iqueanajinta catsirincaiteri. 28Ora patancotashiterori nianqui, ontimatiye poavisayetero capichaji aisati pinquempetaquero acaqueroca; pimoncaratasanotaquero onianquire poatiashiyetaquerori. 29Impoiji povichaacotaquero oro taaverapee aisati piyempitantayetaquearo oro; irotaque poiminqueantaquearori inchaquiipee poameetsataqueri pampinaicacotantacari oro. 30Irotaque povetsicantearori Nonanteari, pimoncaratasanotaquero nonijaaquempiri toncaariqui.
31“Impoiji pintijacantaje tocoyapee: quitioncamaonirori, asoorimaori, quitioncamaori jero lino tijachari. Aitaque pantsitacoyetaqueriri pishiacantaqueri apite nonampire irishivanquitavacaaquea. 32Impoiji pintsayetero piyempitayetaqueri povetsicaqueri oro otincamipeequi poatiayetaqueri acacia caratatsineri 4, pinaicantacari oro aisati povetsicashitaquerori plata oncatiantayenaquea ishaaviji. 33Impoiji pimpaencaquero oticaashiro, pishintsaayetaquero piyempitatashiyetaquerori, aitaque antaqueronta oticaashiroqui poyerori Cajón ontimanteari Nocantacantiri. Irotaque nashitacayempineri ora cameetsatatsiri, inqueapinitenta antaveetenaneri, aisati ora tsompoina, nonantasanotari cameetsatasanotatsiri catsini. 34Aitaque poacanterori Cajón tsompoinaqui cameetsatasanotatsiri Nonanteari. 35Iroquea otsipa araqueroraniri, aitaque poacanterori meesa omerequiqui catonconiri. Irioquea tsiorontsi poacanteri otsipaqui omerequi quirincaniri, cameetsaquea pimontetantaquearori.
36“Impoiji pintijacantayetaje lino quitioncamaonirori, asoorimaonirori jero quitioncamaori. Irotaque pinconoayetavaquerori pincaninayetantaquearori cameetsa, pinticaashiterori pinqueapinitenta. 37Impoiji povetsicayete acacia ontincamiyetanaqueari oncarate 5, pishintsaacantantaquearori oticaashiropee. Aisati pimpatacacotaquero oro pampinaicacotantaquearori manacoteroneri. Aisati pintapoyetaqueri paacotantayetaquearori. Impoiji povetsicashitero bronce, pisaquero povetsicantapinitarori omoro. Oncarate irantaque 5 poashitaquerori otincamipee.”
Currently Selected:
Éxodo 26: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
