Jueces 1
1
So chegoxoguetpi so Judá qataq so Simeón loxonec so Adonisédec
1Qaq co'ollaq mashe ileu so Josué, nache so Israel le'ecpi inat co'ollaxa Ñim Nataxala', da chaq negue't ca hua'auñi se'eso maiche nalamaxat nhuo' le'ecpi da iloquiaxan so Canaán le'ecpi. 2Nache Ñim Nataxala' ỹasategueto' somayepi nache 'enapeco': «Nam chegoxoguetpi so Judá, nachena nam hua'auñi da deloqui cha'aye mashe sanem yi'iye 'alhua.» 3Nache som chegoxoguetpi so Judá 'enapega so lqaỹañecpi maye lauo' le'ecpi so Simeón, da yaqto' itauan somayepi da nqo'ona ye 'alhua maye mashe qoỹanem som chegoxoguetpi so Judá, qaq da ime nache ntauna't da qaiuotaxanec ye 'alhua maye qoỹanem so lauo' le'ecpi so Simeón. Qaq so maiche nhuo' le'ecpi maye chegoxoguetpi so Simeón ỹaỹamaxareeta da huaxaiguet somayepi. 4Nache so maiche nhuo' le'ecpi maye chegoxoguetpi so Judá jec da deloqui, nache Ñim Nataxala' ỹanem somayepi da yaqto' loxonec so Canaán le'ecpi qataq so fereseopi. Qaq huaña ye Bezec, nache ỹalauat so diez mil ỹalleppi. 5Qaq nache huaña yemaye da natena'aguet so nta'a Adonisédec, nache iloquiaxan somaye qataq loxonec so Canaán le'ecpi qataq so fereseopi. 6Qaq na'aictaxa co'ollaxa da datauec so Adonisédec, qalaxaye somayepi icanapec, qaq co'ollaq qaivi', nache qaicheguerec soua dos llaxaata late'el qataq soua dos lqona late'el. 7Nache somaye 'enapeco': «Huo'o so na'a'q nache aỹem secheguerec soua dos llaxaata late'el qataq soua dos lqona late'el so setenta nta'alpi, qataq hueto'ot ñaqa'en na pa'aguiñi so iquia'axala' da yaqto' natotac na anoq lsoche. Qalaxaye Ñim Lo'onatac 'Enauacna, aỹem ỹe'enaxattem nagui de'era sheetec co'ollaxa somayepi.» Huaña nache so Adonisédec qaỹauega ye Jerusalén, yem huaña co'ollaxa da ileu.
So chegoxoguetpi so Judá loxonec ye Jerusalén qataq ye Hebrón
8So maiche nhuo' le'ecpi maye chegoxoguetpi so Judá, iloquiaxan nache loxonec co'ollaxa ye Jerusalén, qaq co'ollaq ime da irolec so ỹeelonec da nmatchiguiñi da ỹalauat so lma' yemaye, nache ỹavigaxat se'eso huaqta'a't nỹecpi. 9Huaña qaltaq nqo'ona da iloquiaxan so Canaán le'ecpi maye nalec aye qasoxonaxapi, maye huaigui ye Néguev qataq ye nalochiguiñi 'alhua. 10Nataqa'en iloquiaxan so Canaán le'ecpi maye netaña ye Hebrón, yem le'enaxat co'ollaxa da Quiriat Arbá. Qaq huaña yemaye da noxonqa soua Sesay, Ajimán qataq so Talmay.
So nataxala' Otoniel loxonec ye Debir
11Huaña, nache so nhuo' le'ecpi maye chegoxoguetpi so Judá nqo'ona da iloquiaxan so huaqta'a't nỹecpi ye Debir, yem le'enaxat co'ollaxa da Quiriat Séfer. 12Qaq nache huaña co'ollaxa da so Caleb, ỹachaxanapec aso llale Acsa, da lhua naqa'en cam ỹañoxot da iloquiaxan qataq loxonec ye Quiriat Séfer. 13Qaq som loxonec se'eso huaqta'a't nỹecpi, qalaq nacheso so Otoniel, som llalec so Cenaz, som na'asa lqaỹa so Caleb. Nache so Caleb ỹanem co'ollaxa somaye da lhua naqa'en aso llale Acsa. 14Qaq co'ollaq mashe yaqta'a da je'c soomaye, nache so Otoniel 'enapega aso Acsa, da dequiguiỹo'ot so lta'a da yaqto' huo'o ca ỹanema laỹe 'alhua da yaqto' lanaxanaqa'. Nache aso Acsa huenoteeguesop so lalo 'ashena, nache so Caleb inat asomaye, 'eeta':
«¿Negue't ca qonetapeguec?»
15Nache asomaye 'enapeco': «Qomye ñeshetaique da 'auauo'o ca aỹem 'anem laỹe 'alhua, cha'aye mashe sogote da aỹem 'aỹa'anem ye 'alhua maye huaña ye toolec 'alhua ye Néguev, qalaxaye nagui aỹem 'aỹa'anem taxa nataqa'en ye 'alhua maye huaña na npaxaatasheguem 'etaxat.»
Nache so Caleb ỹanem aso llale Acsa ye 'alhua maye huaña na npaxaatasheguem 'etaxat maye naña ye qaỹoqotcheguemec 'alhua, qataq ye pa'aguiñi.
Da loxonaxanaxac so chegoxoguetpi so Judá qataq so Benjamín
16So chegoxoguetpi so Hobab maye queniita, som lacho' so Moisés, somayepi chegoqchiguiña co'ollaxa ye huaqta'a't nỹecpi maye le'enaxat Chaisat, nache lỹatec so maiche nhuo' le'ecpi maye chegoxoguetpi so Judá da nqo'ona ye toolec 'alhua ye Judá, maye pa'aỹa'ague da la'añaxa ye Arad, da yaqto' nache naña, nache lauoreuapi som shiỹaxauapi maye lma' yemaye. 17Ime, nache so maiche nhuo' le'ecpi maye chegoxoguetpi so Judá, nnaicapegue' so lqaỹañecpi maye chegoxoguetpi so Simeón, da yaqto' iloquiaxan so Canaán le'ecpi maye netaña ye Sefat, nache ỹataqta nmatchiguiñi da ilaxachigui se'eso huaqta'a't nỹecpi. Qaq ỹoqo'oye qoỹanagui da le'enaxat Jormá. 18Qaq se'eso chegoxoguetpi so Judá sa ỹañoxot co'ollaxa da loxonec ye huaqta'a't nỹecpi ye Gaza, Ascalón qataq ye Ecrón, qataq so lauoreuapi 'alhuapi. 19Qaq Ñim Nataxala', itauaatac co'ollaxa so nhuo' le'ecpi maye chegoxoguetpi so Judá, nache somayepi loxonec co'ollaxa ye 'alhuapi maye hualec aye qasoxonaxapi, qalaxaye sa ỹañoxot da ỹo'orauec som nañapi ye nalochiguiñi 'alhua, cha'aye somayepi huo'o aso nalaataxaqui laigonapi lcat. 20Qaq so Caleb qalaq taỹot ye Hebrón, ipacchigui da la'aqtac co'ollaxa so Moisés, nache so Caleb ỹo'oldauec soua tres llalqa so Anac, som logoraic shiỹaxaua. 21Qalaxaye so maiche nhuo' le'ecpi maye chegoxoguetpi so Benjamín, qalaq sa ỹañoxot da ỹo'orauec so jebuseopi maye naña co'ollaxa ye Jerusalén. Qaq ỹoqo'oye somayepi, nache ivitta'a da so nhuo' le'ecpi maye chegoxoguetpi so Benjamín nache ỹalecta'aguet somayepi.
So chegoxoguetpi so Efraín qataq so Manasés loxonec ye Betel
22Qaq Ñim Nataxala', nataqa'en hueta'aguet co'ollaxa so maiche nhuo' le'ecpi maye chegoxoguetpi so Efraín qataq so Manasés, nache somayepi nqo'ona da iloquiaxan ye Betel, maye le'enaxat co'ollaxa da Luz, 23qaq somayepi ỹama'q co'ollaxa soua lmeenaxanaxanqa da yaqto' hueta'alo ye pa'auec yi'iye huaqta'a't nỹecpi. 24Qaq se'esoua nmeenaxanaxanaqa co'ollaq ilora'a so ỹale maye chegoqtaua'a se'eso huaqta'a't nỹecpi, nache 'ena'apo': «Da qomi' 'auachaxanalo ca ñegeuo ne'ena huaqta'a't nỹecpi, nache qomi' saishet da huo'o ca 'am shenaqa'ac.»
25Nache se'eso ỹale ỹachaxanalo co'ollaxa soomaye so ñegueuo da qainoxoneua'a se'eso huaqta'a't nỹecpi, nache so nhuo' le'ecpi maye chegoxoguetpi so Efraín qataq so Manasés, huenoxoneua'a co'ollaxa so huaqta'a't nỹecpi, nache irolec so ỹeelonec da ỹalauat 'enauac som netaiguipi somaye. Qalaxaye som ỹale maye ỹa'axat co'ollaxa so ñegueuo, nache qaichoxoren da nachaalataxac qataq 'enauac so llalaqpi. 26Nache se'eso ỹale jec, nqo'ona ye na'alhua so hitiitapi, qaq nache huaña yemaye, da no'oxoosheguem so dalaxaic huaqta'a't nỹecpi, nache ỹanagui da le'enaxat Luz, qaq nache ivitta'a nagui de'era le'enaxat.
So 'alhuapi maye sa ỹañoxot da deuotaxanec so chegoxoguet so Efraín qataq so Manasés
27So maiche nhuo' le'ecpi maye chegoxoguetpi so Manasés, qalaq sa ỹañoxot co'ollaxa da ỹo'orauec so netalec ye Bet Seán, Tanac, Dor, Ibleam qataq ye Meguido, qataq som lauoreuapi nma'piolec, qaq so Canaán le'ecpi nache netalec se'esoua nma'ate. 28Qaq so Israel le'ecpi co'ollaq mashe 'añaxaicpi, nache ỹamaxalec da desheetenaxaatac naqa'en so Canaán le'ecpi, qalaxaye saishet da ỹo'orauec.
29Qaq so maiche nhuo' le'ecpi maye chegoxoguetpi so Efraín, nataqa'en sa ỹañoxot co'ollaxa da ỹo'orauec so Canaán le'ecpi maye netaña ye Guézer, ỹoqo'oye se'eso Canaán le'ecpi, nache netaña yemaye nache ỹalecta'aguet somayepi.
30Qaq so maiche nhuo' le'ecpi maye chegoxoguetpi so Zabulón, nataqa'en sa ỹañoxot co'ollaxa da ỹo'orauec so Canaán le'ecpi maye netalec ye Quitrón, qataq ye Nalal, ỹoqo'oye so Canaán le'ecpi nache netaña yemaye, nache ỹalecta'aguet somayepi, na'aictaxa da choche desheetenaxaatac qanqa'en.
31Qaq so maiche nhuo' le'ecpi maye chegoxoguetpi so Aser, nataqa'en sa ỹañoxot co'ollaxa da ỹo'orauec so Canaán le'ecpi maye netalec ye Aco, Sidón, Ajlab, Aczib, Jelba, Afec qataq ye Rejob, 32nacherata da nache ỹalecta'aguet somayepi.
33Qaq so maiche nhuo' le'ecpi maye chegoxoguetpi so Neftalí, nataqa'en sa ỹañoxot co'ollaxa da ỹo'orauec so Canaán le'ecpi maye netaña ye Bet Semes, qataq ye Bet Anat, ỹoqo'oye nacherata da nache ỹalecta'aguet somayepi, qalaxaye ỹamaxalec da desheetenaxaatac naqa'en somayepi.
34Qaq so amorreopi qalaq ỹo'orauec co'ollaxa so maiche nhuo' le'ecpi maye chegoxoguet so Dan, nache icaatac iviraxatta'a aye qasoxonaxapi, nache sa ỹashenem da huenoteeguesop aye qasoxonaxapi da yaqto' naña yem nalochiguiñi 'alhua. 35Qaq ỹoqo'oye so amorreopi nache netalec añi qasoxonaxa Heres, Ayalón qataq ye Sagalbín, qalaxaye som maiche nhuo' le'ecpi maye chegoxoguetpi so José, co'ollaq mashe 'añaxaicpi, nache ỹamaxalec da desheetenaxaatac naqa'en so amorreopi.
36Qaq so loga't so lma' so amorreopi, nache chegoqchiguiña so ñiguisheguem ye Acrabin, nache ivitta'a ye Selá, qataq taỹasheguema na pa'asheguem.
Currently Selected:
Jueces 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.