Colosenses 1
1
So Pablo ỹamaxa aso lere so 'amqaanataxanaxaicpi maye netaña ye nỹecpi ye Colosas
1Aỹem Pablo, aỹem lamaxashec So Jesucristo. Qaq de'era ñamaxasaguec, damaye maiche chegoqtot Ñim Lo'onatac 'Enauacna. Ñi qarqaỹa Timoteo qataq aỹem, 2samaxasoq da qarquinaxanaxac taỹa'a na 'amqaanataxanaxaicpi maye netaña ye nỹecpi ye Colosas. Qaq Ñim Lo'onatac 'Enauacna maye Qarta'a qami' icoreleguete da lqouagaxanaqtaic qataq da nlagaxayec.
So Pablo ỹanot da na'achecỹaxac Ñim Lo'onatac 'Enauacna
3Qomi' naxa, da ivita da ñeqouagaxaunaqtapeguelec da qoñiita, nache sanaqtacot da qana'achecỹaxac Ñim Lo'onatac 'Enauacna Ñim Lta'a So Qarataxala' Jesucristo. 4Cha'aye qomi' saỹaanaq da lta'araic da qarpi'iỹaxaqui So Cristo Jesús, qataq da qarauotaxanaqtaiqui 'enauac nam lalamaxatpi Ñim Lo'onatac 'Enauacna. 5Qami' nache qoñiitec da qarataxaqui cha'aye, chegoqchiguiña co'ollaq qaua'aqaichigui da 'eesa na'aqtaxanaxac maye chegaqaigui dam no'on na'axaỹaxac, qataq ỹataqta qauaỹaañita da Ñim Lo'onatac 'Enauacna huo'o ca iqataxaatapigui' maye hueta'ague da piguem. 6De'era no'on na'axaỹaxac, damaye qaỹa'axatteguec 'enauaque naua 'aleu' maye ilotague' na Roma le'ecpi, qaq ỹataqta huo'o da lañaxataxac damaye. 'Eeta'am da qoñiita co'ollaq se'eso na'a'q da qauaỹachiñi da ỹoqta 'eesa da Ñim Lo'onatac 'Enauacna qami' ỹauoteque. 7Qaq damaye qami' ỹapaxagueneque so Epafras, som qanauochaxaua qaltaq qaro'onataxanaxaua de'era qaro'onataxanaxac, som ỹataqta ipaqueelec da lasataxac da do'onataxan souaxat da lauoche So Cristo. 8Qaq somaye qomi' nda'alo da qara'axaỹaxac da qoñiita qataq dam 'eetec da So Saqcha'a Na'añaxac Qui'itta da qami' ỹo'oteque da qarsoxoyiqui.
So Pablo iỹaxaataique ca la'añaxac so 'amqaanataxanaxaicpi maye ye Colosas
9Co'ollaq choche saỹaanaq 'enauac de'era, nache qolaqtot da qami' ñeqouagaxaunaqtapegueleguete. Seỹaxanaqtacot Ñim Lo'onatac 'Enauacna da ña qami' ỹauattonaxanaxaneque dam ỹataqta 'eetapeguec Ñimaye, qataq da qami' ỹanema na ỹotta'a't naỹaaneguesat qataq da nauattonaxanaxac maye chegoqo'ot So Saqcha'a Na'añaxac Qui'itta. 10Yaqto' da qarataxaqui nateeteguet dam ỹoqta 'eetapeguec So Qarataxala'. Qaq Somaye ỹataqta machiguiñi souaxat da qami' qauo'ocheetac 'enauac nam lataxacpi maye ỹaỹamaqchiguiñi, qataq qaviyeeta'a da ỹataqta qauauattoñiita Ñim Lo'onatac 'Enauacna. 11Qataq ỹachegoxotchigui da lta'araic la'añaxac Ñimaye da qami' 'añaxaiqa naqa'en, da yaqto' huo'o da qanhualaxaunaxaqui qataq ishet da qanaloỹa'aguet 'enauac na lqalaiguesat. Huaña, nache ỹataqta lta'araic da qantonaxaqui, 12da qaỹa'añiitacot da qana'achecỹaxaqui Ñim Lo'onatac 'Enauacna, maye Nta'a. Cha'aye Ñimaye iqataxaatapigui' da qomi' ỹanema qom huaigui dam lo'onataxanaxac maye yo'oqchiguiñi, da nsallaxa maye ỹachaxanapecot nam lalamaxatpi llalaqpi. 13Cha'aye Ñimaye qomi' nca'alaxateeguesopa co'ollaxa na napalaxa maye souaqtaigui. Huaña, nache qomi' ỹauegueua'alo da lo'onataxanaxac Som lauotaxat Llalec, 14ỹachegoxotchigui da l-leuaxa Somaye da qomi' nca'alaxatre'c, qataq da ỹapalaxat 'enauac na qarasouaxashetpi.
Da lo'onataxanaxac So Cristo
15So Cristo nacheso som Llalec Ñim Lo'onatac 'Enauacna, Somaye nache 'eetai' da huo'o co'ollaxa saxanaqca 'enauacna. Somaye nactaigui da lataxac Ñim Lo'onatac 'Enauacna maye saishet da qaila'a. 16Qataq chegoqchigui Somaye co'ollaq Ñim Lo'onatac 'Enauacna ỹo'ot 'enauac nam hueto'ot na piguem qataq nam huetalec ana 'alhua, 'enauac nam ishet da qaila'a, qataq nam saishet da qaila'a, qataq na saqcha'a na'añaxacpi maye damaxasoxonapec qataq nam huo'o da la'añaxac. Ñim Lo'onatac 'Enauacna chegoqchigui naqa'en So Cristo 'enauac nam ỹo'ot. Qaq So Cristo, nache 'enauac maiche lalamaxatpi. 17So Cristo nale'ena da huo'o co'ollaq saxanaqca 'enauacna. Qaq Somaye nacheso so nlletañi 'enauac namayepi. 18Qataq So Cristo nacheso so ilotague' na ỹa'amaqten Somaye qataq ỹami' da lca'alaxa. Somaye nacheso so nqaic, qaq nam 'amqaanataxanaxaicpi qaq nachera da lo'ocỹaxac. So Cristo nacheso so la'auaxanec 'enauac nam huo'o. Qaq ỹoqo'oye nacheso so la'auaxanec da nca'aleeguesop da nleuaxa, da yaqto' nachaqsota 'oonolec Nataxala'. 19Cha'aye Ñim Lo'onatac 'Enauacna nshetaique da So Cristo ỹataqta imatta't 'enauac da lataxac saqcha'a Ñimaye. 20Qataq nataqa'en ỹachegoxotchigui So Cristo da 'enauac nam huetalec ana 'alhua huo'o da l-lagaxayec. Qaq ỹo'ot de'era nlagaxayec, ỹachegoxotchigui naqa'en da l-leuaxa Somaye co'ollaq qaiuaxaneguet so npe'enaxaqui.
21Qaq qami' co'ollaxa 'eeta'am da ỹaqa'a ca qauachegoqỹa'ague qataq ỹataqta npa'aguene' Ñim Lo'onatac 'Enauacna da qarquiyaqteỹaxaqui, souaxat nam qauo'ocheetac sa ỹaỹamaxañisat, 22qalaxaye ỹachegoxotchigui naqa'en da nque'eenaxac qataq da l-leuaxa So Cristo maye ỹacona da lataxac ca yo'oqchigui shiỹaxaua co'ollaxa. Qaq 'eetec de'era Ñimaye, cha'aye nshetaique da qami' nachaalataxaneua'alo cam hueta'a qalaq qami' qui'itte' qataq qaica ca qarshepaxanaqai qataq ca qarasouaxashechi. 23Qaq ỹoqo'oye qami' iuen da saishet da qaỹa'axañiiuec da qarpi'iỹaxaqui qataq da qanaquitaxaqui, maye qauachegoxochiichigui da no'on na'axaỹaxac maye chegaqaigui da nca'alaxa maye qaua'aqaichigui. Qaq de'era na'aqtac nachera da qaỹa'axattac 'enauaque naua 'aleu' ana 'alhua. Qaq aỹem Pablo nachera da sa'axattac.
Da lo'onataxanaxac so Pablo da ilo'ogue na 'amqaanataxanaxaicpi
24Qaq nagui aỹem ỹataqta samachiguiñi, cha'aye huo'o da ñeque'eenaxac souaxat da qoñiita. Cha'aye de'era nque'eenaxac da ỹalamaxat ỹo'ocỹaxac, damaye naigui da nalochiguiñi ñaqa'en na nque'eenaxacpi So Cristo souaxat 'enauac nam ỹa'amaqten Somaye. 25Qaq maiche chegoqchigui Ñim Lo'onatac 'Enauacna da aỹem ỹanagui da ỹo'onataxanaxac da yaqto' souapegue' da qoñiita, qami' 'amqaanataxanaxaiqa, qataq da sa'axatta 'enauac da la'aqtac Ñimaye, 26de'era la'aqtac maye saishet co'ollaq da huo'o ca ỹaỹaanaxanaxanec som shiỹaxauapi soua hua'au' vi'iye. Qalaxaye nagui Ñimaye ỹaỹaanaxanaxanec nam lalamaxatpi. 27Qaq Ñimaye maiche lhuennataxac da ỹaỹaanaxanaxanec de'era 'eetapeguec maye lta'araic qataq huo'o da llo'oxoyec 'enauac na ỹotta'a't shiỹaxauapi ana 'alhua. Qaq damaye 'eeta': Ñim Lo'onatac 'Enauacna naỹa naqa'en ana 'alhua So Cristo da yaqto' qami' hueta'agueta, qataq Somaye ỹataqta 'eesa naqa'en da qanhuañiỹaua'a da la'añaxac qataq da llo'oxoyec Ñim Lo'onatac 'Enauacna.
28Qaq qomi' nacheso So Cristo sa'axataqtac, qataq ỹataqta ñaỹaanaxanaqchenaq da seqataqtega 'enauac na shiỹaxauapi, qataq sapaxaguenaqtac 'enauac, da yaqto' ñi 'oonolec ivira'a da nalochiguiñi da lataxac, 'eeta'am So Cristo. 29Qaq nachera da huo'omshe aỹem so'onataxaatac, qataq sauo'o da maiche ña'añaxataxac, qataq so'ogoxona nataqa'en da la'añaxac So Cristo maye aỹem ỹami'.
Currently Selected:
Colosenses 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.