Números 36
36
Cam lalamaxat na 'alpi
1Qaq soua lataxala'ate so maiche nalamaxat nhuo' le'ecpi maye chegoxoguet so Galaad, som llalec so Maquir, Manasés qataq so José, soomaye tareua'a co'ollaxa so Moisés qataq so lataxala'pi so Israel le'ecpi, nache 'eeta':
2'Am Moisés, Ñim Nataxala' 'am ỹamaxalec co'ollaxa da 'auauota'a da alletaxac da 'aỹa'anem na na'alhua na Israel le'ecpi, qaq nataqa'en 'am ỹamaxalec co'ollaxa da cam talec da lalamaxat na'alhua so qarqaỹa Selofejad, nache 'aỹa'anema naua llalel. 3Qalaxaye naamaye da huaroneguet ca camachaqca na llalaqpi na laỹepi nhuo' Israel le'ecpi, nache ishet da deqat qome ca na'alhua so qarta'alpi, cha'aye ishet da talec ca lauo' le'ecpi cam huaroneguet naamaye. Huaña nache nquicta'a't qome ca qana'alhua maye chegoqchigui da alletaxac co'ollaq qomi' qoỹanema. 4Nache da ivita ca vi'i maye laloxoqui da huesochiguiñi qanqa'en na Israel le'ecpi, nache ca na'alhua na 'alpi saishet qome da lalamaxat, cha'aye taỹot da lalamaxat ca lauo' le'ecpi ca lhua anamayepi, nache deqat ca laỹe ca na'alhua na maiche qarhuo' le'ecpi.
5Qaq huaña nache so Moisés, ipacchigui co'ollaxa da lamaxasoxonaxac Ñim Nataxala', da ỹamaxalec na Israel le'ecpi, da 'eeta':
Nam ỹalleppi maye chegoxoguet so José ỹaỹamaqchiguiñi da la'aqtac. 6Qaq Ñim Nataxala' ỹaỹamaxareeta da maicheye ca huaroneguet que'ecaua llalel so Selofejad: qalaxaye no'ono' da huaronoigui nam lauo' le'ecpi maye maiche lauo' le'ecpi so lta'a. 7Yaqto' ca 'alhua maye talec ñi 'oonolec na maiche nalamaxat nhuo' le'ecpi, saishet qome da qaỹe'egueeta'a da taỹot qanqa'en ca lỹa nam nhuo' le'ecpi, nache 'enauac na Israel le'ecpi ỹataqta lalamaxat qome na na'alhua so maiche chegoxoguet lauo' le'ecpi. 8Qaq ỹoqo'oye camachaqaca 'alo da huo'o ca lalamaxat 'alhua, nache acamaye da huaron, nache huaronoigui ca maiche lalamaxat lauo' le'ecpi. Yaqto' na Israel le'ecpi saishet da deqat na na'alhua maye lalamaxat co'ollaxa so lta'alpi. 9Nache 'enauac na nalamaxat 'alhuapi, saishet qome da qaỹe'egueeta'a da talec qanqa'en ca 'oonolec na maiche nalamaxat nhuo' le'ecpi. Yaqto' na Israel le'ecpi saishet da iqataqchet ca 'alhua maye qoỹanem co'ollaxa da lalamaxat. 10Nache soua llale so Selofejad ipacchigui da ỹo'ot da lamaxasoxonaxac Ñim Nataxala' maye ỹamaxalec co'ollaxa so Moisés. 11Nache aso Malá, Joglá, Milca qataq aso Nogá maye llalel so Selofejad, huaronegueta so llalaqpi soua maiche ntesoqoyel maye lqaỹa't so lta'a, 12maye chegoxogueta so Manasés, som llalec so José. Nache so lalamaxat na'alhua, nache taigui naqa'en so maiche lauo' le'ecpi so lta'a.
13Qaq 'era da namaxasoxonaxac qataq da qalapaxañi lataxac maye Ñim Nataxala' ỹanem so Moisés, da yaqto' ỹamaxalec so Israel le'ecpi co'ollaq huaña ye nalochiguiñi 'alhua ye Moab, maye sa qaỹapeque ye Jordán qataq nalotta ye Jericó.
Currently Selected:
Números 36: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.