Nahúm 2
2
1¡'Am Nínive, mashe 'am naỹa'a nam 'am ilaxachigui qome!
¡Qaq ỹoqo'oye 'anauan qome nam npaqtaxanaxat!
¡Qataq 'anauan qome so nqa'aic!
¡Qataq 'ana'achigui qome cam 'ainec!
¡Qataq 'alaỹona't nam 'analleppi!
2Cha'aye Ñim Nataxala' qaltaq ỹe'eguelaxata qome da llo'oxoyec so Jacob,
da 'eeta'am naqa'en da llo'oxoyec so Israel,
cha'aye nam huotaxanaxaicpi nhuo' co'ollaxa namayepi,
nache 'eeta'am naqa'en ana nañiguishe uvapi da qui'itta'ague ana lcouepi.
3Qaq na 'añaxacpi nalleppi qalaq togaxarai ana lpaqtaxanaqtepi,
qataq togaxaraic da lo'oxoỹaxac nam logoxotpi namayepi.
¡Qataq lhuotta da nalat!
Qaq ana laigonapi qalaq 'eeta'am na norec,
qataq iyaqtai' na lalo caipi.
4Qaq ana laigonapi qalaq ỹaguec ana naloxo da quetague' na nqa'aicpi,
nache cholaxan naqa'en nam naponaqa'pi,
qaq da lataxac qalaq 'eeta'am ana ncoỹaraxanaqtepi da 'ettaigui,
qaq ana naloxo 'eeta'am ca nqashelgaxa.
5Qaq so nta'a ye Nínive, laỹona't da ỹamaq so 'amaqatqaic ltauapi,
nache somayepi ỹataqta ỹe'egueetega't da taỹa so npaqtaxanaxat,
da yaqto' nauaxaỹaxaasheguem som nqataxanatac npaqtaxanaxat.
6Qalaxaye nauatoigui na lapoxotpi na 'etaxat so tala,
huaña nache nlaguiñi so nma' lta'araic.
7Qataq noxona aso nate'e nache qaỹauec,
nache lỹatec qanqa'en aso l-latapi maye 'eeta'am na qoto' da dequictai',
qataq nỹeetague' nhuaxaata'aisalo naua ltogue.
8Qaq ye Nínive, qalaq 'eeta'am aca laỹe' na 'etaxat da depoqogui nache ipaxanec na le'ec,
qaq nache 'eetec da datauec 'enauac na lma' yemaye.
Nache na'alaqtapiguiñi 'eeta': «¡Ña qoviỹa'aina! ¡Qañe'eguelaqai!» Qalaxaye qaica ca ñe'eguelaq.
9¡Ña qauotaxañec qome na plata qataq na oro!
¡Cha'aye ye Nínive ỹataqta ỹaguec da lsallaxa!
10Nache ye Nínive, qui'ita'ac, nlachiguiñi qataq toolec qanqa'en,
qataq ñi'i da lquiyaqteỹaxac,
iviloxo'l naua l-llecte, qaica ca la'añaxac, qataq napagaqtec da lasheguiỹaxac.
11Qaq ¿negue't ca no'onaigui ca lauac caua llo'oñi,
qataq ca lauanaxanaqa' caua llalqa?
Cha'aye cam huetra'a caua llo'oñi, qataq caua llalqa saishet da huo'o ca iquichoqche't.
12Qaq ca llon da ỹalauat ca loxonec
nache iquia'axan aso lloona qataq soua llalqa,
qataq nache iỹoqtaigui som lauac nam loxonecpi.
13Qaq da la'aqtac Ñim Nataxala' maye
Qaica ca Ỹaqalanapec, 'eeta':
«Aỹem 'am ñanaỹa nagui da 'am sataỹa'aguet,
nache savigaxat anam 'aigonapi
maye 'analaataxaquipi,
nache nda'a't nmala'q ñaqa'en anamayepi,
qataq serolec ca ỹeelonec na
'aỹa'alaqpi da salauat,
nache imeuo ñaqa'en da ncachaxac nam 'ana'alhua,
huaña nache saishet da qaltaq
qaỹa'axaỹa nam 'ara'aqtaxanaxanecpi».
Currently Selected:
Nahúm 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.