Mateo 2
2
Da lviraxa'c soua ỹaanaxanaxaiqa
1So Jesús lañoqo' ye nỹecpiolec le'enaxat Belén maye huaigui ye 'alhua Judea, huetoigui so na'a'q co'ollaq so Herodes maye 'amaqtaqaic da ilotague' yi'iye 'alhua. Nache nvitra ye nỹecpi ye Jerusalén soua ỹale't, chegoqtra'ague da yo'oxoñi. Soomaye napaxagueetrega ana huaqaañipi. 2Nache soomaye denataxaata'ape, 'eeta':
–¿Hua'ague ca hueta'ague ca nogotolec maye cheta'ague da ñiguiñi qataq taỹa'a da lta'a na judiopi? Cha'aye de'era nala' lliguisheguem maye sepa'aqta'ague, qomi' ñeloqta'a aso la'anaqte huaqaañi. Qaq ỹoqo'oye ñanaguenaq da yaqto' sho'oxorenaq camaye.
3Nache so nta'a Herodes qataq 'enauac som shiỹaxauapi maye netaña ye nỹecpi ye Jerusalén, ỹataqta dalemata co'ollaq hua'aqchigui de'era na'aqtaxanaxac. 4Nache so nta'a iỹaxanegue 'enauac so lataxala'pi so ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna qataq nam ỹapaxagueetapeguec na shiỹaxauapi na nqataxacpi. Nache ichemaxattac da chaq hua'ague ca lañoqo' qome ca Lca'aguishec Ñim Lo'onatac 'Enauacna. 5Nache somayepi 'eeta':
–Qomye huaña ye nỹecpiolec le'enaxat Belén yem nataqa'en netaigui na 'alhua Judea, cha'aye nacheye ye ỹiyiñi so la'aqtaxanaxanec Ñim Lo'onatac 'Enauacna co'ollaq 'eeta':
6«Qaq 'am Belén, maye qouetaigui na na'alhua na Judá,
ỹataqta lta'araic da 'ara'amaqchec,
Da qonetaigui na laỹepi nma'pi na Judá;
cha'aye 'am chegoqchiguiña qome ca Nataxala',
maye ilo'ogue na Israel le'ecpi maye ỹalamaxatpi.»
7Nache so Herodes ỹataqta nqañoxotchiguiñi da iỹaxaneugalo soua ỹaanaxanaxaiqa. Nache ichemaxatta'ape da chaq negue't so na'a'q co'ollaq nachaxanalo aca huaqaañi. 8Ime, nache ỹamaxalo ye nỹecpiolec le'enaxat Belén, nache 'enapegalo, 'eeta':
–Qanqo'oñiỹa yemaye, nache qauchemaxachiỹaique ca nogotolec. Qaq qom mashe qauanachiỹa, nache aỹem qaucoyiguiñi qome, yaqto' nataqa'en aỹem ñeqo'ona da sho'oxoren.
9Qaq co'ollaq ime da la'aqtaxanaxac so nta'a Herodes, nache soua ỹaanaxanaxaiqa je'c. Huaña, nache qaltaq nachaxan aso huaqaañi maye ilotra'a co'ollaq hua'ague da nala' lliguisheguem. Nache hua'auta'ague da tatra'ague soomaye, choche ivitta'a da vi'iiguet co'ollaq nalotelec cam nỹec maye hueta'a so nogotolec. 10Qaq se'esoua ỹaanaxanaxaiqa co'ollaq qaltaq ilora'a aso huaqaañi, nache ỹataqta lta'araic da ntonaxa'c. 11Qaq co'ollaq inoxooroigui so nỹec, nache ilora'a so nogotolec qataq aso late'e María. Ime, nache ỹa'alyiñi naua l-llectel, nache ỹo'oxoreetrac. Ime, nache ỹauanguilo soua lachoxonaxaqui', nache ỹachete'c na chegaqaigui na oro, qataq na nchenaxanaxat maye ama na laita, qataq na lcha'q ana qo'oipaq le'enaxat mirra.#2.11 Oro qataq nchenaxanaxat qataq qo'oipaq lcha'q: Na doqshe la'aqtac oro, incienso y mirra. Co'ollaq qoỹaneua'a so nogotolec Jesús da nme somayepi, nache so ỹaanaxanaxaiqa naigui naqa'en da Somaye taỹa'a da nta'a. 12Qaq co'ollaq ime', nache Ñim Lo'onatac 'Enauacna, ỹauo'o so lqataxac ỹachaigui da lo'ochaxa soua ỹaanaxanaxaiqa da 'eetegalo da saishet da ỹe'eguelaqtreuga ye netaña so nta'a Herodes. Nache soomaye tatreuga ca lỹa nqa'aic co'ollaq ỹe'eguelaxaregue ca lma't.
Soua lta'al So Jesús naneltaxaaregue da Egipto
13Qaq co'ollaq mashe je'c soua ỹaanaxanaxaiqa, nache so lamaxashec Ñim Lo'onatac 'Enauacna nachaxana so José huaigui so lo'ochaxa. Nache 'enapega, 'eeta':
–Qoñisheguem, nache 'eltaxan ye nogotolec, qataq añi late'e 'aigue da Egipto. Nache qoueta'a qome yemaye, nato' qom 'am shenapega. Cha'aye ñi Herodes anac da nmitaique ye nogotolec da huotaique ỹalauat.
14Nache se'eso pe so José naneltaxanegue da Egipto lỹatac aso María qataq so nogotolec, 15nache huetra'a yemaye, choche ivitta'a co'ollaq ileu so Herodes. Qaq 'eetec de'era, yaqto' ỹataqta ipacchigui da la'aqtac Ñim Lo'onatac 'Enauacna maye ỹa'axat co'ollaxa so la'aqtaxanaxanec, 'eeta': «Seỹaxana so Ỹalec, maye hueta'a ye Egipto.»
So Herodes huotaique da ỹalauat So Jesús
16Qaq so Herodes co'ollaq ỹaỹaten da soua ỹaanaxanaxaiqa ỹatenache't, nache somaye ỹataqta dalemata. Nache damaxasoxoolec da qanmatchiguiñi da qaỹalauat so ñaqpiolec, nam cheta'ague da ñiguiñi qataq na mashe ivi' naua dos vi'iye da llaxa 'enauac som netaña ye nỹecpi le'enaxat Belén qataq naua loiguiye, ipagaqchiichiguilo soua vi'iye maye ỹecchiyiña soua ỹaanaxanaxaiqa co'ollaq ilora'a aso huaqaañi. 17Qaq de'era ỹataqta ipacchiguilo naua leregui'she som la'aqtaxanaxanec Ñim Lo'onatac 'Enauacna le'enaxat Jeremías, maye 'eeta':
18«Qaỹa'aqtega da na'alaxac huaña ye Ramá,
noinaxac qataq na'alaxac.
Raquel añi nỹeetac souaxat ye llalaqpi,
qaq sa nashen da qaicochaq,
cha'aye mashe ileu yemayepi.»
So José qataq aso María ỹe'eguelaxaregue da Nazaret
19Qalaxaye co'ollaq mashe ileu so Herodes, nache huaña ye Egipto da qaltaq nachaxana so José so lamaxashec Ñim Lo'onatac 'Enauacna, huaigui naqa'en so lo'ochaxa. Nache 'enapega, 'eeta':
20«Qoñisheguem, nache 'arỹa ye nogotolec, qataq nataqa'en aye late'e. Ime, nache 'avi'eguelaxa ye na'alhua na Israel le'ecpi, cha'aye mashe 'enauac da ileu yem huotaique da ỹalauat ye nogotolec.»
21Nache so José ñesheguem, nache ỹauec so nogotolec qataq aso late'e da nqo'oora ye na'alhua na Israel le'ecpi. 22Qalaxaye so José co'ollaq ỹaỹaten da so Arquelao, qoỹanagui da lo'onataxanaxac so lta'a Herodes da qaltaq ilo'ogue ye 'alhua Judea, nache somaye ỹataqta huo'o da lcolanaxa. Ime, nache so lamaxashec Ñim Lo'onatac 'Enauacna 'enapega so José huaigui so lo'ochaxa da taỹa ye 'alhua Galilea. 23Qaq co'ollaq mashe ivita yemaye, nache huera'a ye nỹecpiolec le'enaxat Nazaret. Qaq 'eetec de'era, da yaqto' ỹataqta ipacchiguilo naua la'aqtaxanaxaco so la'aqtaxanaxanecpi Ñim Lo'onatac 'Enauacna da 'eeta': «Ca Lca'aguishec Ñim Lo'onatac 'Enauacna da qaiỹaxana qalaq qaỹamata'ac Nazaret le'ec.»
Currently Selected:
Mateo 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.