Efesios 3
3
So Pablo qaipataxalec da ỹa'axatem da no'on na'axaỹaxac nam saishet da judiopi
1Aỹem Pablo, aỹem qaicoñettai' cha'aye sasoilec da so'onataxaatacot So Jesucristo qataq so'onataxaatac da yaqto' qauaỹamaqaiñi qami' maye saishet da qami' judiopi. 2Qami' mashe sogote da qauaỹaañi da Ñim Lo'onatac 'Enauacna aỹem ipataxalec da sa'axatec dam 'eetapeguec Ñimaye dam ỹachegoxotchigui da lta'araic lsoxoyec maye, nache 'eetai' da ỹaỹamaxattapiguiñi. 3Ñim Lo'onatac 'Enauacna aỹem ỹaỹaanaxanaxanec da 'eetapeguec maye saqcha'a, qaq damaye shiyiñi co'ollaxa da qami' samaxalo qalaxaye saxanaxa da ỹataqta sa'axatta. 4Qaq da qautaxaỹaxañi dam shiyiñi, nache qami' ishet da qauloỹa'a da aỹem ỹataqta sauattoota dam saqcha'a 'eetapeguec Ñim Lo'onatac 'Enauacna maye ỹacoolec da ỹo'ot ỹachegoxotchigui So Jesucristo. 5De'era maye saqcha'a saishet co'ollaxa da huo'o ca qaỹaỹaanaxanaxanec som hua'au' vi'iye. Qalaxaye nagui Ñim Lo'onatac 'Enauacna ỹachegoxotchigui So Saqcha'a La'añaxac da ỹaỹaanaxanaxanec nam iỹotaugapi maye lamaxashecpi So Jesús qataq na la'aqtaxanaxanecpi. 6Qaq de'era 'eetapeguec maye saqcha'a, damaye, 'eeta': Chegoqchigui So Jesucristo da 'enauac nam saishet da judiopi, namayepi nataqa'en ishet da ỹaconeguet da nca'alaxa qataq nam qaỹachaxanapecotpi na Israel le'ecpi. Ime, nache ỹauaxaỹaxana't da yaqto' ima'a't da nhuo' le'ecpi. Qaq dam iuen da ỹo'ot namayepi 'eeta' ỹaconeguet da no'on na'axaỹaxac.
7Ñim Lo'onatac 'Enauacna ỹataqta aỹem ỹauotec, ỹoqo'oye ñetooteguec da lta'araic la'añaxac, cha'aye nachera da ỹachegoxotchigui da aỹem ipataxalec da sa'axatec da no'on na'axaỹaxac, na'aictaxa da saishet da saiguet damaye. 8Cha'aye na'aictaxa da aỹem ỹataqta qaica ca ỹa'amaqchec da salectaigui na lalamaxatpi Ñim Lo'onatac 'Enauacna, qalaxaye Ñimaye aỹem ỹami' de'era ña'achecỹaxac da sa'axatem na saishet da judiopi da no'on na'axaỹaxac maye ỹa'axat nam chegoqo'ot lqouagaxanaqtaicpi So Cristo maye qaica ca ishet da naloqten. 9Nataqa'en aỹem ipataxalec da sa'axatem 'enauac na shiỹaxauapi da 'eetec da Ñimaye ipaqueelec dam 'eetapeguec. Ñim Lo'onatac 'Enauacna, nache 'eetai' de'era 'eetapeguec, qalaxaye qaỹoqteguelo soua vi'iye da saishet da ỹachaxan. 10Qaq qoỹeetec de'era nagui, yaqto' ishet da chegoqchigui qanqa'en na 'amqaanataxanaxaicpi da 'enauac nam 'añaxaicpi qataq nam damaxasoxonapecpi maye hueto'ot na piguem ishet da ỹaỹaten 'enauac na ỹotta'a't laỹaaneguesat Ñim Lo'onatac 'Enauacna. 11Qaq de'era ỹo'ot Ñim Lo'onatac 'Enauacna, damaye nateeteguet dam nale'ena lhuennataxa co'olloxocheye maye ỹachegoxotchigui naqa'en So Qarataxala' Jesucristo da ỹo'ot. 12Qaq ỹoqo'oye So Cristo nacheso so chegoqchigui da qarpi'iỹaxac qataq qomi' huesochiyiñi da ñequigaxaua'a Ñim Lo'onatac 'Enauacna, qaica ca sho'oqtaique. 13Qaq ỹoqo'oye aỹem qami' ñachoxoreetoiguilo da saishet da saqca ca qara'añaxaqui, souaxat da aỹem huo'o da ñeque'eenaxac souaxat da qoñiita, cha'aye damaye naigui da yaqto' qami' ỹo'oxora'q.
Da lauotaxanaqtaic So Cristo
14Qaq 'era da huo'omshe aỹem sa'attrañi naua illecte da ñatameetacot Ñim Lo'onatac 'Enauacna maye Nta'a, 15maye lo'onatac 'enauac nam hueto'ot na piguem qataq na huetalec ana 'alhua. 16Souaxat dam lta'araic lsallaxa qataq da llo'oxoyec, nache seỹaxaatacot Ñim Lo'onatac 'Enauacna da ỹachegoxotchigui So Saqcha'a La'añaxac da qami' ỹanema ca la'añaxac da qarvilỹaxaqui. 17Qataq seỹaxaatacot Ñim Lo'onatac 'Enauacna da yaqto' So Cristo ishet da netaiguilo naua qarquiyaqchilli' souaxat da huo'o da qarpi'iỹaxaqui Somaye, qataq yaqto' qami' ỹataqta qauauochec Ñim Lo'onatac 'Enauacna qataq na laỹepi shiỹaxauapi. 18Qaq da qoñiitec de'era, nache qami' qataq 'enauac na laỹepi 'amqaanataxanaxaicpi ishet da qauaỹaañita ye lcachiguiñi qataq ye locta qataq da lalogaxa qataq ye lshecchiguiñi da lauotaxanaqtaic So Cristo. 19Qataq seỹaxaatacot Ñim Lo'onatac 'Enauacna, da yaqto' qami' ỹataqta qauauattoñiita de'era nauotaxanaqtaic maye ỹataqta napacalec 'enauac na qarauattonaxanaxacpi, qataq yaqto' qami' qauacoñiiguet 'enauac nam huotaique da qami' ỹanema Ñimaye.
20Qaq ỹoqo'oye 'onaxaic nagui da qaỹo'oxoren qome Ñim Lo'onatac 'Enauacna, Ñim 'añaxaic maye ishet da ỹactec naqa'en ca qomi' ỹanema, napacalec cam seỹaxanaqaique, huo'otaq cam tatapigui ye qarhuel, da chegoqchigui naqa'en da la'añaxac maye do'onataxaatapoigui da qanachaalataxac. 21Qaq ỹoqo'oye 'enauac qome qomi' maye sa'amaqtenaqtac So Cristo, 'onaxaic da chochaq tatec da qayo'oxonnataxanaxa Somaye. Aja', nache 'eetec.
Currently Selected:
Efesios 3: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
