Deuteronómio 2
2
So Israel le'ecpi quetalec co'ollaxa ye toolec 'alhua
1«Qaq co'ollaq qolaq, nache saqtelec ye toolec 'alhua maye tateuga aso Auaxai Togaxarai, ipacchigui da aỹem ỹanem la'aqtac Ñim Nataxala'. Qaq mashe qaỹoqteguelo soua na'axa'te da seconnaqtacot aye qasoxonaxapi ye Seír. 2Nache Ñim Nataxala' aỹem 'enapega, 'eeta': 3‹Mashe qaỹoqteguelo naua na'axa'te da qauconñiitacot ana'ana qasoxonaxapi, qaq nagui qavi'iguelaqaigue qome da sheu'. 4Qalaxaye qonapega qome na nhuo' le'ecpi qoneta': Qoquiitelec qome ye lalamaxat na'alhua yem chegoxoguetpi so Esaú, maye naña ye Seír, cha'aye maiche qarhuo'oi le'ecpi, qalaxaye yemayepi qome qami' ñe'eta'agueta, qalaxaye maxatchaxa qome, 5qaq yemayepi saishet qome da qauloquiaxañi, cha'aye saishet da qami' saarema catai' qapio'olec maye lcata'am ca napia' lliguiñi yem na'alhua yemayepi, cha'aye aya'aye qasoxonaxapi ye Seír, ayemaye lalamaqte so chegoxoguetpi so Esaú. Qataq Aỹem sami' co'ollaxa yemayepi. 6Qataq da qaviñi ca nallec, huo'otaq 'etaxat nache qausheenaxañiỹa.› 7Cha'aye Ñim Nataxala' maye Qanatamnaxala'ai, huo'o co'ollaxa da lqouagaxanaqtaic da qoñiita souaxat nam ishet da qauo'oche, qataq qami' ntela'alo 'enauaque se'esoua cuarenta vi'iye da qoquiitalec ye toolec 'alhua, qataq qaica ca qaviñiitaique naqa'en.»
8«Ime, nache qolaq sashoxolec ye na'alhua so qarqaỹañecpi maye chegoxoguet so Esaú, maye netaña co'ollaxa ye Seír, nache qolaqtegue so nqa'aic ye Arabá, maye chegoqteua'a ye Elat qataq ye Ezión Guéber, ime qaltaq ñeconnaxañi, nache qolaqtegue so nqa'aic ye toolec 'alhua ye Moab. 9Huaña, nache Ñim Nataxala' qaltaq aỹem 'enapega 'eeta': ‹Saishet qome da qauloquiaxañi ye moabiitapi, cha'aye yemayepi chegoxoguet so Lot, qaq saishet da qami' sanema catai' laỹolec ye na'alhua yemayepi. Cha'aye Aỹem sanem co'ollaxa da yaqto' lalamaxat yi'iye 'alhua Ar.›» 10Qaq yi'iye 'alhua, yemaye netalec co'ollaxa so emiitapi, somayepi ỹataqta 'añaxaicpi, qalotoigui qataq logoraicpi 'eeta'am na anaquiitapi. 11Qaq somayepi qataq so anaquiitapi, qaỹamata'ac naxa da logoraicpi, qalaxaye so moabiitapi ỹamata'ac da emiitapi. 12Qaq yi'iye 'alhua Seír, yemaye netalec co'ollaxa so horeopi, qalaxaye so chegoxoguetpi so Esaú, nmatchiguiñi co'ollaxa se'eso horeopi, nache somayepi nalec co'ollaxa da ỹauo'o lalamaxat. Qaq nachera da 'eetec qome na Israel le'ecpi da nalec ye 'alhua maye Ñim Nataxala' ỹanem da lalamaxat namayepi. 13«Ime co'ollaxa, nache Ñim Nataxala' qaltaq qomi' 'enapegalo, 'eeta': ‹Nagui, nache qoqui qome qaua'axasoxoñiilec so la'auaxac Zérec.› Nache qomi' sa'axasoxonaxalec se'eso la'auaxac.
14Qaq se'eso na'a'q co'ollaq sachegoxosoqchiguiña ye Cadés Barnea, ivitta'a da sa'axasoxonaxalec so la'auaxac ye Zéred, nache ivi' treinta y ocho vi'iye. Qaq mashe nmiguiñi da ileu 'enauac se'eso shiỹaxauapi alaataxaicpi huaña so nanataqa', cha'aye nache la'aqtac co'ollaxa Ñim Nataxala' da saishet da inoxoneuo. 15Cha'aye Ñim Nataxala' irolec co'ollaxa da la'añaxac somayepi, nache ivitta'a da nmichiguiñi naqa'en da ileu.
16Qaq co'ollaq mashe nmichiguiñi se'eso shiỹaxauapi maye alaataxaicpi co'ollaxa, 17nache Ñim Nataxala' aỹem 'enapega, 'eeta': 18‹Nagui, nache qaua'axasoxoñiilec ye loga't ye 'alhua Moab, nache qanqo'oñiỹa ye 'alhua Ar, 19qalaxaye qom qavichiỹa ye na'alhua ye amoniitapi, nache saishet qome da qauloquiaxañi, cha'aye yemayepi nataqa'en chegoxoguetpi so Lot, nache Aỹem saishet da qami' sanema ca laỹe ye na'alhua yemayepi. Cha'aye mashe sanem co'ollaxa da lalamaxat.› 20Qaq yi'iye 'alhua nataqa'en lalamaxat co'ollaxa so logoraicpi maye so amoniitapi ỹamata'ac co'ollaxa da zamzumiitapi. 21Qaq somayepi co'ollaxa ỹataqta qalota, logoraicpi, qataq añaxaicpi, 'eeta'am na chegoxoguetpi so Anac. Qalaxaye Ñim Nataxala' ỹanem da la'añaxac so amoniitapi da nmichiguiñi naqa'en somayepi, ỹoqo'oye somayepi nache nalec yi'iye 'alhua da ỹauo'o lalamaxat. 22Qaq nache 'eetec co'ollaxa Ñim Nataxala' da ỹanem da la'añaxac som chegoxoguetpi so Esaú maye netaña ye Seír da nmatchiguiñi so horeopi da yaqto' nalec yi'iye na'alhua somayepi. 23Qataq nachera da 'eetec nataqa'en co'ollaxa so filisteopi maye chegaqa'a co'ollaxa ye Creta da nmatchiguiñi so heveopi, maye nañalo naua lỹa't nma'ate maye lauoreu' ye Gaza, nache nalec yi'iye 'alhuapi. 24Qaq ime, nache Ñim Nataxala' qomi' 'enapegalo, 'eeta': ‹Qoqui qome, qaua'axasoxoñiilec ye tala Arnón, cha'aye qami' sanema da qoroxoñiqui ñi Amorreo le'ec Sijón, maye lta'a na netaña ye Jesbón qataq ye na'alhua. Qaq ỹoqo'oye qanoxochiỹaua'a qome ye na'alhua nache qanalaache' ñimaye. 25Qaq nagui, nache chegoqchiguiña ñaqa'en da 'enauac na ỹotta'a't shiỹaxauapi maye netalec ana 'alhua da qami' ñi'iỹalo. Qataq da choche qami' hua'axaỹapegueleguete, nache ỹataqta iviloxolaqchet da lli'iỹaxa, qataq da lcolanaxa.›
26Qataq co'ollaq souaqta'a ye Cademot, nache samaxalo soua ỹamaxa'she so Sijón, so lta'a so netaña ye Jesbón da yaqto' qaica ca machaqca, nache sheeta' da ỹa'aqtac: 27‹Sauotaique da sa'axasoxoolec na 'ana'alhua, nache sashectec da shectegue so ñec, qataq saishet da huo'otaq saỹoxouec qome. 28Qaq da seuenaq ca nallec huo'otaq 'etaxat, nache sesheenaxanaxa. Nacherata da qomi' 'auasheetema qome da sa'axasoxonaxalec ne'ena 'ana'alhua, 29'eeta'am da 'eetec co'ollaxa da qomi' ỹasheetrec na chegoxoguetpi so Esaú maye netaña ye Seír, qataq so moabiitapi maye netaña ye 'alhua Ar, da yaqto' sa'axasoxonaxalec so tala Jordán, nache ishet da senoxonaxaua'a ye 'alhua maye qomi' ỹanema Ñim Nataxala'.›
30Qalaxaye so nta'a Sijón saishet co'ollaxa da qomi' ỹashenema da sa'axasoxonaxalec ye na'alhua, cha'aye Ñim Nataxala' maye Qanatamnaxala' nache 'ena'ac da qaramchigui naqa'en da lquiyaqteỹaxac, da yaqto' seloquiaxai' qataq qoroxonec, qaq nache ivitta'a nagui. 31Huaña, nache Ñim Nataxala' aỹem 'enapega, 'eeta': ‹Nagui qami' sanema da qoroxoñiqui ñi Sijón qataq ye na'alhua ỹoqo'oye qanqo'oñiỹa da qauotaxañic yi'iye na'alhua nache qoñiỹalec.›
32Qaq so Sijón qomi' ca'ata'agueta, nnaictague' co'ollaxa so nalleppi da yaqto' qomi' deloguito huaña ye Yahás, 33qalaxaye Ñim Nataxala' maye Qanatamnaxala', qomi' ỹanema somaye da yaqto' qoroxonec so llalaqpi qataq 'enauac so nalleppi. 34Nache 'enauac so huaqta'a't nỹecpi maye ỹotta'a't naua nañalo maye lalamaxat somaye selaxataxagui, qataq salauataq so ỹalleppi, 'alpi qataq so ñaqpiolec, nache nmichiguiñi ñaqa'enaq saishet da huo'o ca nca'altauec. 35Qaq nachesota so 'atetpi qataq so nogoxoshetpi maye huo'o da lashiichiỹaxac maye netaigui so huaqta'a't nỹecpi maye ñelaxataxañi da saconaxa. 36Qaq nache chegoqchiguiña ye huaqta'a't nỹecpi ye Aroer maye hueto'ot na loigue ye tala Arnón, qataq so huaqta'a't nỹecpi maye naleguete aye lcomaraxalatepi ivitta'a ye Galaad, qaica ca ỹañoxot da qomi' dataỹa'agueta, cha'aye Ñim Nataxala' maye Qanatamnaxala' qomi' ỹanema somayepi da qoroxonec. 37Qaq nacheyeta ye na'alhuapi so amoniitapi, qataq 'enauac so netañapi naua loigue so la'auaxac Yaboc, qataq so huaqta'a't nỹecpi maye nalec aye qasoxonaxapi, qataq 'enauac som qomi' illapeguema Ñim Nataxala', saishet da she'eguenaqta'a da seloquiaxanaq.»
Currently Selected:
Deuteronómio 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.