2 Tesalonicenses 1
1
So Pablo qataq soua lỹa't ỹamaxara aso lere so 'amqaanataxanaxaicpi
1-2Qami' ñauochaxau' ỹaqaỹa't, qami' 'amqaanataxanaxaicpi maye qarmaye na Tesalónica:
Aỹem Pablo qataq Silvano qataq ñi Timoteo qami' sequinaqta'ape maye qami' lalamaqa'ate Ñim Lo'onatac 'Enauacna maye Qarta'a qataq So Qarataxala' Jesucristo. Qaq imauec da iquiyaqteỹaxac da seỹaxaatacoto naamaye da qami' ỹanema da lsoxoyec qataq da l-lagaxayec.
So Pablo nqouagaxaueelec so Tesalónica le'ecpi
3Qami' qarqaỹa't, ỹataqta nache 'eetai' naxa da sanaqtacot da qana'achecỹaxac Ñim Lo'onatac 'Enauacna souaxat da qoñiita. Qaq damaye nache lataxac, qaq ỹoqo'oye qami' ỹataqta nquictasheguem da qarpi'iỹaxaqui Ñimaye qataq ñi 'oonolec ỹataqta nquictasheguem da lauotaxanaqtaic ñi lỹa. 4Qaq ỹoqo'oye qomi' ỹataqta huo'o da qana'amqaanaxac da qami' sa'axataqta'ape da sa'aqtaxanaqteguem na laỹepi shiỹaxauapi maye nataqa'en ỹa'amaqteetac Ñim Lo'onatac 'Enauacna. Cha'aye souaxat da na'aictaxa da qoviitaigui da lqalaic, qalaxaye ñaqaiyeta saishet da qaỹa'axañiiuec da qarpi'iỹaxaqui Ñimaye. 5Qaq damaye ỹachaxan da Ñim Lo'onatac 'Enauacna ỹataqta 'eesa da nachera da lataxac da lo'onataxanaxac da inoxoneua'a naqa'en nam huo'o da nque'eenaxac nagui.
6Cha'aye nache lataxac da Ñim Lo'onatac 'Enauacna ỹauo'o qome ca nque'eenaxac na ỹo'ottac da qanque'eenaxaqui. 7Qaq So Qarataxala' Jesús, qom ñe'eguelaq chegoqtot na piguem, nactaigui na le'eraxa ca norec qataq nnaictague' ca 'añaxaicpi lamaxashecpi piguem le'ecpi. Nache Ñim Lo'onatac 'Enauacna qami' ỹanema ca qaramaicỹaxaqui 'eeta'am da 'eetec naqa'en da shenaqta. 8Anaga da ỹauo'o ca nhuaxanaguec na saq qocha'a da na'aqtaxanaxac qataq sa ỹa'amaqten. 9Namayepi ỹataqta saq llalcolec ca nhuaxanaguec maye choche tatec, qataq qaimaqauec, ỹataqta qaỹoqteuga qanqoỹen da yaqto' sa ỹalegueua'a da llo'oxoyec qataq da la'añaxac So Qarataxala'. 10'Ena nam huo'o qom ñe'eguelaq So Qarataxala' Jesucristo ñe'eguelaxa nam lalamaxatpi, yaqto' namayepi ỹo'oxoren qataq huo'o da la'aalaxa. Qaq qami' nache qaraỹepi ne'ena shiỹaxauapi, cha'aye qaua'amaqchiñi da na'aqtaxanaxac maye qami' sanaxama.
11Qaq nachera da huo'omshe qami' ñeqouagaxaunaqtaleguete, seỹaxanaqtacot ñi Qarta'a maye Lo'onatac 'Enauacna, da ña qami' itaua'n da ỹataqta qoquiitelec da llecỹaxac da huo'omshe qami' iỹaxanalo. Nataqa'en ñeqouagaxaunaqtacot Ñim Lo'onatac 'Enauacna maye 'añaxaic da yaqto' qaupaquiitelec 'enauac nam ỹaỹamaqchiguiñi qoñiitapeguecpi chegoqchigui da lta'araic qanaquitaxaqui Ñimaye. 12Da nache 'eetec de'era, nache qami' ỹataqta huo'o da qayo'oxonnataxanaxaqui So Qarataxala' Jesús, qataq nataqa'en Somaye ỹauo'o da qayo'oxoyiqui, ipacchigui da lta'araic lsoxoyec Ñim Lo'onatac 'Enauacna qataq So Qarataxala' Jesucristo.
Currently Selected:
2 Tesalonicenses 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.