1 Samuel 30
30
So David loxonec so amaleciitapi
1Qaq so inoxoorec soua tres na'axa'te, nache so David qataq so nalleppi ivita co'ollaxa ye Siclag, nache natenalec da so amaleciitapi mashe iloquiaxaatac co'ollaxa so netalec ye Néguev qataq Siclag, nache ỹataqta ilaxachigui qataq ỹavigaxat. 2Qataq ỹauec co'ollaxa aso loxonapi 'alpi qataq 'enauac so hueta'a co'ollaxa yemaye, ỹepi qataq so ñaqpiolec, qalaxaye qaica ca ỹalauat.
3Qaq so David qataq so nalleppi co'ollaq ivita so huaqta'a't nỹecpi nache ilalec da mashe ỹavicta, qataq qaỹauec co'ollaxa aso lhuapi somayepi, qataq so llalaqpi ỹalleppi qataq 'alpi, 4nache somayepi ỹataqta na'alaqtapiguiñi da nnoinaxac, nache ivitta'a da ỹataqta qaica ca la'añaxac. 5Qataq nataqa'en noxonal co'ollaxa soua dos lhua't so David: aso Ajinoán, maye Jezrel lashe, qataq aso Abigaíl, maye npa'ai so Nabal, som lma' ye Carmel. 6Qaq so David ỹataqta huo'o da lhuogoxo co'ollaxa, cha'aye so nalleppi huotaique da imalec somaye da irolec na coma' da ỹasaq, cha'aye ỹataqta lta'araic da nqui'ic, souaxat de'era huaigui so llalaqpi ỹalleppi qataq so 'alpi. Qalaxaye somaye huo'o da la'añaxac chegoqo'ot Ñim Nataxala' maye Natamnaxala', 7nache 'enapega so ntaxaỹaxanaxanec Abiatar, so llalec so Ajimélec, 'eeta':
Ñaq aỹem 'anqouaguec da aỹem 'andoua'a ca ntogue lapoxot le'enaxat efod.
Nache so Abiatar sa ỹaỹaloxon da iroua'a so David somaye. 8Nache so David nnate' Ñim Nataxala', 'eeta':
¿Peta'a secanapec se'eso cachaxaicpi? ¿Peta'a ishet da sevi'?
Nache Ñim Nataxala', 'enapeco':
Aja' 'aucanapec, cha'aye ishet da 'avi' nache ỹoltaq 'añe'eguelaxaala't qome so loxonecpi somayepi.
9Nache so David nnaicapegue' so seiscientos nalleppi, nache ivira'a so la'auaxac ye Besor, nache hua'a 10so doscientos somayepi som ỹaguec na lasamaxa, nache saishet da ỹa'axasoxongui so la'auaxac. Ỹoqo'oye nache no'onaña yi'iye, qaq so David nache queta da decanaxaatac lỹatac so cuatrocientos nalleppi. 11Nache co'ollaq qaỹatalec so lqueuoqo' somayepi, nache hualec so no'onaxa da natenalec so Egipto le'ec maye decopche co'ollaxa, nache qaỹauegueua'a so David, qalaxaye hua'auñi da qaiquia'axan qataq qanỹomaxan, 12nache qoỹanem aso nauole maye lalegue ana hiigo ala, qataq dos soua nauole maye lalegue ana uva ala qaxaỹaxai, cha'aye somaye mashe ivi' soua tres na'axa'te qataq tres pe' da qaica ca chec. Qaq co'ollaq ime da lquia'axac so Egipto le'ec, nache ỹoltaq huo'o da la'añaxac. 13Nache so David inat somaye, 'eeta':
¿Hua'ague ca 'auachegoqta'ague? ¿Qataq negue't ca 'ana'aco'?
Nache somaye 'enapec:
Qomye aỹem Egipto le'ec, aỹem lamaxashec so amaleciita, qalaxaye mashe ivi' naua tres na'axa'te da aỹem ỹalat so ña'aco' souaxat da ila'a da aỹem sano'on, 14qomi' ñeqo'onaxa caillaye da seloquiaxanaq ye pa'aỹa'ague da sheu' ye na'alhua ye quereteopi qataq ye na'alhua ye lauo' le'ecpi so Judá qataq so Caleb. Nataqa'en savigaxataq ye Siclag. 15Nache so David inat somaye, 'eeta': ¿Peta'a ishet da aỹem 'auauega ca hueta'a que'eca cachaxaicpi?
Nache so Egipto le'ec 'enapeco':
Aja', qalaxaye da 'aỹa'anot ca 'ara'aqtac Ñim Lo'onatac 'Enauacna da saishet da aỹem 'aualauat qataq da saishet da aỹem 'aỹa'aneguet ca ña'aco', nache ishet da 'am sauega ye hueta'a yemayepi.
16Nache so Egipto le'ec ỹauega somaye ye hueta'a so amaleciitapi, qaq somayepi ỹataqta laguelec 'enauac se'eso no'onaxa, deque'etac, nỹomtac qataq ỹo'ottac na la'ashaxac, ntootalec so lhuotaxanaxat nogoxoshetpi maye ỹachegoxotalec ye na'alhua so filisteopi qataq ye na'alhua so Judá le'ecpi. 17Nache so mashe yo'oqoolec na 'alhua, nache so David iloquiaxan somayepi, nache ivitta'a so avit so lỹa na'a'q da iloquiaxaatac, qalaxaye cuatrocientos so nsoxoppi so ishet da nca'alec, cha'aye neleco' aso lalo cameellopi nache datauec.
18Nache so David ishet da ñe'eguelaxaala't 'enauac so decachiỹapi co'ollaxa so amaleciitapi nataqa'en soua dos lhua't somaye. 19Nache qaica ca deqaptauec so ñaqpiolec qataq so ỹepi, qataq sotai' saq 'amaqtaq nogoxoshetpiolec. 20So David nataqa'en ỹacona 'enauac aso qaguetapi qataq huacapi, nache som ỹalleppi maye ỹo'ottalec asomayepi 'enapeco' da 'enauac asomayepi nache lalamaqte so David. 21Ime, nache so David ỹe'eguelaxa so la'auaxac ye Besor, maye no'onaña co'ollaxa so doscientos ỹalleppi maye ỹaguec na lasamaxa, nache somayepi co'ollaq ila'aguet so David qataq so laỹepi ỹalleppi, nache ca'atta'aguet. Qaq so David nache nqo'ona somayepi da nquine'. 22Qalaxaye so nnaictague'pi so David huo'o so qauemaic qataq quiỹaxanaqtaqaic maye 'enapeco': Ne'enapi ye saishet da qomi' ca'ateguelo nache saishet da huo'o ca sanaxam na nogoxoshetpi maye qarhuotaxanaxatpi. Nacherata da ñi 'oonolec namayepi da lỹa aca maiche lhua qataq ca maiche llalaqpi, nache jec. 23Qalaxaye so David 'enapeco':
Saishet da qoñeetec de'era qami' ỹaqaỹa't, cha'aye nacheñi Ñim Nataxala' ñi qomi' ỹanema 'enauac ne'ena, qataq nacheñi ñi qomi' npaxaaleguete, qataq qomi' ỹanema da qoroxonec se'eso qauemaicpi maye qomi' iloquiaxa'n co'ollaxa. 24Cha'aye ¿negue't cam ỹaỹamaxareeta dam qoñiitapeguec? cha'aye ne'ena qarhuotaxanaxatpi taỹot nataqa'en 'enauac na ilotague' na qorogoxoshetpi qataq na ỹalectaua'a so loquiaxac. 25Qaq nache huaiguio' se'eso na'a'q da so David lapaxañi de'era lataxac da huo'o ca loquiaxac, qaq so Israel le'ecpi nache queta da ỹo'ottac, choche ivitta'a nagui. 26Qaq so David co'ollaq ivita ye Siclag, nache ỹauo'o so icolaxatec som lhuotaxanaxatpi, nache ỹamaxa so nauochaxauapi nataxala'pi maye lma' ye Judá, qataq ỹamaxa so la'aqtac, 'eeta': «'Ena na qarachetaqtaxanaxat maye chegaqaigui na qarhuotaxanaxatpi, maye logoxoshetpi so mpa'aguenaxauapi Ñim Nataxala'.» 27Nache ỹamaxa se'eso nachetaqtaxanaxatpi so nataxala'pi maye netaña ye Betel, qataq ye Ramot maye huaigui ye Néguev, qataq ye Jatir, 28qataq ye Aroer, Sifmot, Estemoa, 29Racal, qataq so netaigui ye huaqta'a't nỹecpi ye Yeramel, maye lalamaxat so queniitapi, 30qataq so netaña ye Homrá, Corasán, Atac, 31Hebrón qataq so nataxala'pi maye netañalo 'enauaque soua nma'ate maye netañalo co'ollaxa so David qataq so nalleppi.
Currently Selected:
1 Samuel 30: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.