1 Corintios 2
2
Na'aqtaguec So Cristo co'ollaq qaiuaxaneuo
1Qami' ỹaqaỹañicpi maye qaua'amaqchiñiitac So Cristo, co'ollaq qami' ñeqo'onalo da qami' sa'aqtaxanema da saqcha'a 'eetapeguec Ñim Lo'onatac 'Enauacna, qalaq saishet da saconalo naua na'aqtaqa maye qalaqaiqa qataq da ỹo'ot da na'aalaxa. 2Nachaqrata da ñacoola't da nachaqsota So Cristo da sa'axattac qataq da l-leuaxa co'ollaq qaiuaxaneguet so npe'enaxaqui. 3Co'ollaq qami' ñachattaiguilo da qami' sapaxagueeta'ape qataq qami' sa'aqtaxaateguema da na'aqtac, qalaq qaica ca ỹa'añaxac qataq seviloxoltai' da icolanaxa. 4Ỹoqo'oye co'ollaq setaqtac da sa'axattac da na'aqtac, qalaq saishet da saconalo naua ltaxaỹaxaco ca shiỹaxaua ỹaanaxanaxaic, da yaqto' qaua'amqaanataxañi. Nachaqrata da sa'aqta'a So Saqcha'a La'añaxac Ñim Lo'onatac 'Enauacna da ỹachaxan da la'añaxac, da yaqto' nachera chegoqchigui da qaua'amqaanataxañi. 5Qataq yaqto' da qarpi'iỹaxaqui saishet da na'attalec da laỹaanec ca choche shiỹaxaua, chaqrata da na'attalec da la'añaxac Ñim Lo'onatac 'Enauacna.
Ñim Lo'onatac 'Enauacna ỹachaxan da lo'onataxanaxac
6'Eesa da nataqa'en qomi' setaxasoxoiguilo naua na'aqtaqa ỹaanaxanaxaiqa, qalaxaye seuenaq naamaye da sa'aqtaxanaxam nam mashe ỹe da lpi'iỹaxac. Qaq de'era naỹaanec saishet da lma'na, qataq saishet da chegoqo'ot na nta'alpi maye huetalecna, nam taỹa'a da imeuo. 7De'era naỹaanec maye sa'axataqtac, damaye naỹaanec saqcha'a maye chegoqo'ot Ñim Lo'onatac 'Enauacna. Damaye nachera da ỹapogoñi laỹaanec Ñim Lo'onatac 'Enauacna maye iqataxanai' co'ollaq saxanaqaca ana 'alhua qataq da huotaique ỹachaxan dam ñeuanaqaua'a da llo'oxoyec maye chochaq tatec. 8Qaq ỹoqta 'eesa da lhuennataxac Ñim Lo'onatac 'Enauacna da saishet da ỹaỹaten nam damaxasoxonapecpi maye lma' ana'ana 'alhua. Cha'ayectaxa da ỹaỹaten, nache saishettaxa da ỹalauat so ỹo'oxoraic Qarataxala' da iuaxaneguet so npe'enaxaqui Som lalamaxat da achaalataxac. 9Qaq tachigui da 'ena'ape naua nanettralec ana nere maye huetalec na la'aqtacpi Ñim Lo'onatac 'Enauacna maye 'eeta':
«Ñim Lo'onatac 'Enauacna iqataxaatapigui'
da ỹanem cam ỹauotec Ñimaye
dam qaica ca ishet da ila'a,
huo'otaq hua'axaỹa huo'otaq da iuennatapega.»
10Qaq 'era da qomi' ỹauattonaxanaxaneque Ñim Lo'onatac 'Enauacna, chegoqchigui naqa'en So Saqcha'a La'añaxac, cha'aye Somaye ỹaỹaten 'enauac, qataq ivira'a da ỹaỹaten na saqcha'a 'eetapeguecpi Ñim Lo'onatac 'Enauacna.
11Na shiỹaxauapi qaica ca ishet da ỹaỹaten ca lhuennataxac ca lỹa shiỹaxaua, nachaqsota so saqcha'a lca'alaxa maye ishet da ỹaỹaten. Qaq nache 'eeta'am nataqa'en So Saqcha'a La'añaxac Ñim Lo'onatac 'Enauacna nachaqsota maye ỹaỹaten ca lhuennataxac Ñimaye. 12Qalaxaye Ñim Lo'onatac 'Enauacna ye qomi' ỹanema So Saqcha'a La'añaxac, qaq nacheso so chegoqchigui da saỹaanaq da lqouagaxanaqtaic maye qomi' ỹo'oteque Ñimaye. 13Da sa'axataq de'era qomi' ỹo'oteque Ñim Lo'onatac 'Enauacna, nache saishet da setaxasoxoiguilo naua na'aqtaqa maye chegaqaiguilo da maiche laỹaanec na shiỹaxauapi, nachaqnauate' naua na'aqtaqa maye qomi' ỹapaxagueneque So Saqcha'a La'añaxac Ñim Lo'onatac 'Enauacna.
14Qaq ca shiỹaxaua, maye saishet da netanguit So Saqcha'a La'añaxac Ñim Lo'onatac 'Enauacna, saishet da ỹaconeguet da napaxaguenataxanaxac maye chegoqo'ot Somaye, cha'aye 'eeta'am naqa'en da choche 'oopashec. Qataq saishet da ỹaỹaten damaye, cha'aye saishet da netanguit So Saqcha'a La'añaxac Ñim Lo'onatac 'Enauacna. 15Qalaxaye ca shiỹaxaua maye netanguit So Saqcha'a La'añaxac Ñim Lo'onatac 'Enauacna, camaye ishet da nmit 'enauac na lataxaguesat. Qaq camaye, qaica ca ishet da nmit. 16Cha'aye nache 'ena'ape naua nanettraleguete ana nere maye huetalec na la'aqtacpi Ñim Lo'onatac 'Enauacna maye 'eeta': «¿Negue'tom ca ishet da ỹaỹaten ca lhuennataxac Ñim Nataxala'? Qaltaq ¿negue'tom ca ishet da ỹapaxaguen Ñimaye?» Qalaxaye qomi' mashe qomi' hueto'oto So Saqcha'a La'añaxac Ñimaye, qaq ỹoqo'oye da qarhuennataxac 'eeta'am da lhuennataxac So Cristo.
Currently Selected:
1 Corintios 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.