Lucas 1
1
Riwethaitari Teófilo
1Osheki kowawetaincha rosankenaterome okaatzi awishimoyetakairi. 2Ikowi rithotyeerome okaatzi riyotaayetakairi ñaayetawakerori ketziroini, iriitajaantakera ñaawakerori, ikamantakairo ñaantsi. 3¡Teófilo! Ari nokantakari eejatzi naaka. Tema neetsikeroini nonoshikawentakawo tsika okanta opoñaantanakari ñaantsi, irootake nosankenatantzimirori eeroka okaatzi awisayetaintsiri. 4Iro ompoñaantyaari piyotakoperotairo maperotachari okaatzi riyotagaitakemiri.
Ikenkithatakoitziro itzimantakari Juan
5Pairani, ipinkatharitantari Herodes janta Judea-ki, ari risaikiri Imperatasorentsitaarewo iita Zacarías, icharine Abías-ní rini. Irooma iina oita Elisabet, isawo Aarón-ni ini eejatzi iroori. 6Kameethashireri ikantaiyani apitekeroini ipinkathatziri Pawa. Rimonkaatziniri okaatzi ikowakairiri, tekaatsi apaani inkenakaashiwaityaari. 7Iro kantacha te itzimi rowaiyane, tema maaniro ini Elisabet. Rantarikitashiiyakani. 8Okanta kiteesheri, ari imonkaatari rantantapiintantawori Zacarías rimperatasorentsitantari. 9Tema iro rametaiyapiintarini Imperatasorentsitaarewo, roshiyakaakero iñaaryaataita, ari iñagaitakeri iri Zacarías kyaatsine tasorentsipankoki ritayeniri Pawa kasankainkari. 10Piyotaiyachani atziri jakakeroki ramanaiyani, ritagaitziro kasankainkari. 11Ari roñaagakari Zacarías imaninkarite Awinkatharite, ikatziyimotapaakari rakoperoki ritayirowa kasankainkari. 12Antawo ithaawanake, iyokitziitanake iñaawakerira. 13Irojatzi riñaanatantanakari, ikantziri: “Zacarías, eero pithaawi. Tema ikemaitakero pamananewo. Ari piñaakero piina Elisabet intzimai eentsite, iri piiteri Juan. 14Arika intzimake pitomi, osheki pinkimoshirewenteri, ari inkantyaari eejatzi atziripaini. 15Tema iriiperori inkantakayaari Pawa. Eero pirakairi shinchaari ishinkitaitari. Tema risaikashiretantatyaari Tasorenkantsi tekera itzimiita. 16Ikenkithashiretakairi Israel-iite inkemisantairi Awinkatharite Pawa. 17Iriitake jewatapaakerine Awinkatharite. Inkantakayaari ishintsinka Elías, ari raapatziyakaayetaiyaari ipaapateetari maawoini rowaiyane. Ari rotsimaryaashiretairi katsimashireri, ari onkantya riwetsikashiretantaiyaari inkemisantairi Awinkatharite.” 18Rakanakeri Zacarías maninkari, ikantziri: “¡Ari! ¿Tsikama onkantya niyotantyaawori jiroka? Antarikitakena naaka, eejatzi okantzitaka noina.” 19Ikantzi maninkari: “Naakatake Gabriel, poñaachari Pawaki. Rotyaantakena nonkamantemiro Kameethari Ñaantsi. 20Iro kantzimaitacha, okantakaantziro pithainkawaantetakena, kisowaante pinkantya iroñaaka irojatzi imonkaatantakya okaatzi nokantakemiri.” 21Saikaiyatsini itsipa jakakeroki royaawentaiyirini Zacarías, ari rosampitawakaanaka: “¿Iitaka rosamanitantari Zacarías tasorentsipankoki?” 22Ikanta rishitowawetapaa Zacarías, te okanta inkenkithawaitapai, rookowaitashitapaaka. Ari riyotaiyanakeni eenitatsi iñaakeri tasorentsipankoki. Rashi rowanakero ikisowaantetanake. 23Irojatzi imonkaatantaawo kiteesheri rantawaitzi tasorentsipankoki, piyaawo ipankoki.
24Okanta Elisabet iina Zacarías, motzitake. Antawoite okenkithashiretaka, te ishitowai opankoki ikaatzi 5 kashiri omairentaka, okantashirewaitzi: 25“Irootake inintakaakenari Pinkathari naaka, ompoñaantyaari eero imanintaitantana.”
Ikenkithatakoitziro intzimantyaari Jesús
26Ikanta rawisake 6 kashiri, rotyaantairi Pawa maninkari Gabriel nampitsiki jitachari Nazaret saikatsiri Galilea-ki, 27iñeero mainawo kaari yoterine shirampari, jitachari María, tema irootake iinantyaari mainari jitachari José, icharine David-ni. 28Ikanta ikyaapaake maninkari isaikira María, ikantapaakero: “¡Pinkeme María, itsipashiretakemi eeroka Awinkatharite. Pawisayetakero otsipa tsinanepaini ineshironkaperotaimi Pawa!” 29Okanta oñaawakeri maninkari, iyokitziitanake, okenkithashiryaakotziro ikantapaakerori riwethatapaakawo. 30Irojatzi ikantantanakawori maninkari: “María, eero pithaawi, tema ineshironkatanewo Pawa pinatzi. 31Ari piñaakero pimotzite, intzime peentsite. Iri piiteri JESÚS. 32Iriitake materone ririiperote, iitaiteri Itomi Jenokisatzi. Tema Pawa Awinkatharite, iriitake pinkatharitakairine roshiyakagairi pairani icharineni David-ni ipinkatharitakaakeri. 33Irijatzi pinkathariwentairine ikaatzi icharinetari Jacob-ni, rashi rowaatyeero impinkathariwentantai irirori.” 34Akanakeri María, okantziri: “¿Tsikama onkene nomotzite, te noñiiri shirampari?” 35Rakanakero maninkari, ikantziro: “Iriira kantakayaawone Tasorenkantsi. Tema ritsimankantakemiro ishintsinka Jenokisatzi, oshiyaawome itsimankantzi aamparentsi. Irootake iitantyaari peentsite Tasorentsi Itomi Pawa. 36Ari okantaka eejatzi pisheninkathori Elisabet, ikantaweetari maaniro, okantawetaka antawokiwetaka iroori, motzitai. Ikaatake oyashirite 6. 37Tekaatsi kompitzimotyaarine Pawa.” 38Irojatzi okantantanakari María: “Naakatake rimperatanewo Pinkathari, rantenawo okaatzi pikantakenari.” Irojatzi ripiyantanaari maninkari.
Iyaatake María areetawo Elisabet
39Okanta otsipa kiteesheri, shintsiini iyaatanake María, jatake tonkaariki Judea-ki isaikira nampitsi, 40irojatzi areetantakari ipankoki Zacarías, iwethatapaakawo Elisabet. 41Okanta okemawakero Elisabet iwethatapaakawo María, shewatanaka omotzitakeri. Tema ikantakaanakityaawo Elisabet Tasorenkantsi, 42okenkithawaitanake shintsiini iroori, okantanake: “Eerokatake anairori otsipa tsinanepaini ritasonkawentaitakemi. Ari inkantzityaari eejatzi powaiyane. 43¿Iitaka pipokashitantanari irinirotyaari Nowinkatharite? 44Tema nokemawakemi piwethatapaakena, shewatanaka nomotzitakeri naaka, kimoshiretanake. 45Kimoshire pinkantaiya eejatzi eeroka pikemisantake, tema ari imonkaataiya okaatzi ikowakaakemiri Awinkatharite.”
46Irojatzi okantantanakari María:
Antawoite niweshiryaawentaiyaari Nowinkatharite,
47Kimoshire nonkantawentyaari Pawa owawisaakoshiretainane.
48Tema iñaakero rimperatanewo ashironkaawaitaka,
Aripaite inkantayeetai: Antawoite ritasonkawentaitakero.
49Tema antawoite rantzimotakenari matzirori otzimi ishintsinka.
¡Tasorentsi ini iwairo!
50Rashi rowaatyeero ineshironkayetairi inkaate incharineyeetyaari paata,
Inkaatera pinkathayetairine.
51Iroowa ishintsinka rantantayetakari.
Raperotzitairi ikenkithashirewetari shamewaitatsiri.
52Pawa kantakaakawori eero riyaatakaantawo impinkatharite ikaatzi pinkathariwetachari.
Iri iñaaperotakaayeta ikaatzi tsinampashirewetachari.
53Rashaagantakaayetari ikaatzi tasheneentawetachari,
Iriima ikaatzi ashaagantawetachari raapithatairi oshekitzimowetariri romishitowakeri.
54Ramitakotairi Israel-iite, tema rimperatanewo rinayetake.
Irojatzi ineshironkayetziri,
55Tema iro ikantaitakeriri pairani acharineyetakari,
Retanakari Abraham-ni irijatzi maawoini incharinetaiyaari.
56Ari isaikimowaitapaintziro María jiroka Elisabet ikaatzi mawa kashiri, irojatzi ipiyantaawo opankoki iroori.
Itzimantakari Juan omitsitsiyaatantaneri
57Okanta imonkaataka ontzimaanitantyaari Elisabet, tzimake otomi. 58Ari ripokaiyakeni osheninkapaini ikimoshirewentaiyironi, tema riyotaiyakeni antawoite ineshironkatakero Pawa. 59Maakotake 8 kiteesheri eentsi, ragaitanakeri ritomeshaanitaiteri, ari ikowaweetaka iitaiterime Zacarías, tema iwairo inatzi ipaapate. 60Irojatzi okantantanakari inaanate: “Eero iita Zacarías, iitya Juan.” 61Ari ikantaitanakero: “¿Oitaka? Tema tekaatsi pisheninka jitachane Juan.” 62Rookowakoitashitanari rosampiitziri ashitariri, tsikarika inintziri iiteri itomi. 63Rookotanakero Zacarías inchakota ramaiteniri, ari rosankenatakero, okantzi: “Iitya Juan.” Iyokitziitanake ikaatzi osampitakeriri. 64Romapokashitanaawo riñaawaitanai Zacarías. Antawoite ikimoshirewentanakeri Pawa, riwetharyaanakari. 65Pagaanka ikantaiyanakani isheninkapaini Zacarías. Tema ithonka ikemakoitanakero tonkaariki Judea-ki okaatzi awisaintsiri. 66Kenkithashireri ikantaiyani ikaatzi kemakotakeriri, ikantaiyini: “¿Tsikama iityaaka paata jirika? Tema kempoyaawenta rowakeri Awinkatharite jirika eentsi.”
Ikamantantakeri Zacarías
67Ikanta Zacarías, ashitakariri eentsi, ikantakaanakari Tasorenkantsi, ikenkithawaitanake, ikantzi:
68Kameethari rinatzi Awinkatharite Pawa, Iwawanetari Israel-iite,
Ripokake retsinaryaakoyetai.
69Rotyaantakairi matzirori rowawisaakoshiretantzi,
Iriitake incharinetyaari David-ni, tema iriitake rimperatane Pawa.
70Iro ikenkithawaitakaakeriri pairani tasorentsitatsiri Kamantantaneri.
71Iri owawisaakotaine itzimawetaga kisaneentayetairi.
72Tema ineshironkatairi ikaatzi acharineyetakari,
Eero ipeyakotziro tasorentsitatsiri raapatziyawakaantyaari.
73Irootake jiroka ikashaakagaitakeriri pairani acharineni Abraham,
Onkaate rantzimotairi.
74Rontsiparyaakowentai itzimawetaga kisaneentairi,
Tekaatsi anthaawantya ankemisantairi.
75Kiteshire ankantaiya.
Kameethashire ankantawentaiyaari maawoini kiteesheriki.
76Irooma eeroka notomi, iitaitemi iyamantanewo Jenokisatzi.
Tema eerokatake jewatakeriri Pinkathari, piwetsikaanteri tsika inkenayetanake.
77Eeroka kamantairine asheninkapaini, iro riyotantyaari iriitake owawisaakotantaneri.
Iri peyakotakagairine ikaariperoshirewaiwetaka.
78Tema antawoite ineshironkatakai Pawa,
Rotyaantakairi poñaachari inkiteki roshiyapaakawo okantaganki owakera onkiteeshetamanai.
79Inkiteesheetyaakotairi saikayetatsiri otsirenikitzi.
Inkiteesheetyaakotairi eejatzi itsimankakowetakari raampare yotaantzirori riyaatantaitari sarinkaweniki.
Iri oñaagantairone risaikaitzi kameetha.
80Kameetha ikimotatzi eentsi, ñaaperoshireri ikanta. Ari risaikawaitzi ochempiki, irojatzi imonkaatantakari roñaayaari Israel-iite.
Currently Selected:
Lucas 1: cpb
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.