Salmos 40
40
Chiga in'janqquia'cantsse tsoña'cho
1Na'suve opatsse ronda'jesi
tiseja puntssamba ñama paña'jen.
2Pañamba canse'masia chango'ye ñama somboemba
tssipaccu'ye'qque somboen.
Somboemba ña tsu'ttema patunga ccutsianqquia'caen
fae'ngatssianga ñama fuitepa angacan.
3Ña aya'fanga cuna settapoen'choma afaensi
gi ingi Chigama avujatsse ñotsse afapa settapoen'jen.
Ñama pañamba tsu tsain'bio a'i in'jamba
Na'suve in'jan'faya.
4¡Nane avujatssi tsu Na'suma pañamba in'jan'choja!
Joccapitssia qquen in'jan'cho a'ima iñajambi fuiteya'chove.
Ni faesu chigandeccuve ttattasundeccuma afa'jembi.
5Na'su, ña Chiga,
tsain'bitsse qui ingine ñotsse tson'jen.
Que ingine in'jan'cho'qque antte'masia tsu.
¿Majan tsu faesuja tsa'caen tsoñe oshaya?
Tsane faesunga condaye in'jansi
aya'fa tsu shaca pa'tssima ñotsse condaye.
6Queja fi'ttipa afe'choma in'jambipa
trigoma afe'choma'qque chi'ga.
Nane oque oraemba afe'cho ni egae tsincon'choma
joqquitssianqque'su afe'choma'qque qui in'jambi.
Tsa'ma ña tsosinama qui fetta.
7Tsa'cansi gi su:
¡Vani gi can'jen!
Nane que tevaen'jen ñane suqquia'caen gi can'jen.
8Ña Chiga, que in'janqquia'caen tsoñe gi
ñoa'me avujatssi.
Ña injama'choni gi que atesian'choma an'bian
tsa'caen tsoñe.
Currently Selected:
Salmos 40: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
