Salmos 110
110
Na'su Chiga ande na'suma fuite'cho
1Na'su Chigaja ña na'sunga su:
“Ñai'ccu fae'ngae na'suve dapa va'ttinga dyaija ña tansinfanga
ña quema iyiccayesundeccuma patsusi que tsu'tte tsosiccunga ccuiqquia'caen oshambipa quema paña'faya'ngae.”
2Na'su Chiga quema ti'tsse quiñaesi
qui Zión'ñe bianima mandaya cuintsu
quema iyiccayesundeccu quema paña'faye.
3Que aindeccuja dyombe'yi tsu Zión ccotta'cconga
bo'faya que patsuya'cho a'ta nepisi.
Nane suruno sinte pa'ccoma piccopa chanjunqquia'caen qui
queja poi a'ta cuname daya.
4Na'suja qquen tansintsse supa ccaningae afaya'bi:
“Que qui tsangae a'ine ñama afa'suve daya.
Nane Aarón'cambipa qui Melquisedec'caen daya.”
5Na'suja que tansinfani dyaipa
tise iyiccoya'cho a'ta nepisi
nasundeccuma patsupa sefaeña.
6Nane injama'choma somboenqquia'caen poi andema
iyu'usi tsain'bio a'i pa'faya.
Toya'caen tsovema iñaccaenqquia'caen
poi ande'su mandasundeccuma joqquitssiaña.
7Nane tsaiqui'ye mandian'jen'an'qque
tsa'ccuma cu'ipa tsai'ccu quiñamba mandiaña.
Currently Selected:
Salmos 110: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
