Proverbios 3
3
In'jan'chove atteye'cho
1Ña du'shu, ña quema atesian'choma aqque'pajama.
Ña manda'choma'qque ñotsse injan'jenjan.
2Tsa'caen tsomba qui bo'tsse cansepa
poi a'ta avujatsse can'jeña.
3Tsangae tisupapora ñotsse in'jamba
tansintsse afapa canseja.
Nane andupama aqque'paye oshambiqquia'caen
tsama'qque aqque'pambitsse que injama'chonga
tevaenqquia'caen an'bianjan.
4Tsa'caen cansesi tsu Chiga, toya'caen faesu aindeccu'qque
quema in'jamba que ñotssia inisema injan'jen'faya.
5Pa'cco que injama'choi'ccu
Na'suma ñotsse in'jamba tise've ronda'jeja.
Tsa'ma tisu injama'cho asi'ttaemba in'jan'choma antteja.
6Jongoesuma tsoñe in'jan'da
o'tie Na'suma in'janjan.
Tiseja que tsaiquima tansianqquia'caen
quema fuiteya ñotsse tansintsse in'jamba canseye.
7Tisuja ñoa'me injama'pa qquen in'janjama.
Tsa'ma Na'suve in'jamba pañamba
osha'cho ega'ye joqquitssija.
8Tsa'caen canseye tsu
bove ñotsse ccushaenqque'su seje'pa'caen
que ai'voma quiñaeña.
9Que corifin'di'ccu Na'suma ñotsse tson'jemba
que tai'cho'su o'tie isu'choma'qque tisenga afeya'cho.
10Tsa'caen tsonsi tsu que trigoma coira'je'cho tsa'o
on'bapa shequejisi que vinoma fiña'jen'cho tanque'qque vino on'basi osha'jeya.
11Ña dutssi'ye, Na'su quema iyu'u'choma chi'gajama.
Tise quema nafattian'ni'qque iyicca'yejama.
12Nane Na'suja yaya tise in'jan'cho dutssi'yema nafattianqquia'caen
majan tise in'jan'choma ñotsse in'jamba tsa'caen iyu'u.
13Avujatssi tsu majan a'i atesuqque'suve tta'ttapa atte'cho.
Ñoa'me atesupa in'jamba tsu avujatssi.
14Atesupa in'jan'choja totoacorima ti'tsse barepa
cori'ccu chava'choma ti'tsse somboqque'su tsu.
15Atesupa in'jan'choja bare'cho patuma ti'tsse bare.
¡Nane osha'cho bare'chove in'jan'choma ti'tsse tsu bare!
16Atesupa in'jan'choja tansinfa'su tivei'ccu
bo'tsse can'jeña'choma afepa
pavefa'su tivei'ccuja osha'choma an'biamba
joccapitsse daqque'suma afeqquia'caen tsu afe.
17Tisema omboencanqquia'caen avujatsse can'jemba
tise tsaiquinga ja'ta opatsse canseya'cho.
18Atesupa in'jan'choma tta'ttapa atte'ta ñoa'me canseya'cho.
¡Attepa an'bian'da ñoa'me avujatssiya'cho!
19Na'su Chigaja atesupa in'jan'choi'ccu andeve agattoemba
osha'choma in'jamba sefaccove'qque agattoen.
20Nane atesupa in'jan'choi'ccu fae mar tsa'ccu'ye
faesu marve attufaemba antte cuintsu
unjimba'qque surunoi'ccu andenga tssipoen'jeñe.
33Na'suja egae tsincon'sumbe tsa'oma sefaeñe qquen supa
ño'ambe tsaoni can'jensi poiyi'cco tse'tti'su avujatssi'fa.
34Na'suja tisu ñotssi qquen in'jamba
afasesundeccuma ccane'qque afasepa
cca'ima quinsepoembipa opatsse canse'chondeccuma ñotsse tsoña.
Currently Selected:
Proverbios 3: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
