Números 21
21
Horma'su aindeccu patsu'cho
1Israendeccu Atarim tsaiqui'ye jiña'fa qquen pañamba Cananeo ande'su Arad canqque na'su, tsa Néguevni canjen'suja, israendeccui'ccu iyiccoye ji. Jipa majandeccumajan indipa ángaja. 2Tsa'caen tson'fasi israendeccuja Na'su Chigama ñoa'me su'choi'ccu qquen su'fa: “Nane que va aindeccuma patsuye ingima fuite'ninda gi poiyi'cco va ande'su canqquema metsse sefaen'faya.” 3Tsa'caen iñajan'fasi Na'su Chigaja tise'pa iñajanqquia'caen tsomba fuite cuintsu tsesu cananeondeccuma patsu'faye. Tsa'caen fuitesi israendeccuja tsesu cananeondeccuma metsse sefaen'fa. Tsa'caeñi tise'pa canqquema'qque tson'fa. Tsa'caen sefaemba tsu tse'ttima Horma qquen inisian'fa.
Cu'a yoshavama ñoña'cho iyo
4Israendeccuja Hor ccotta'ccone sombopa Cu'a Marni ja'jengae ja'fa, Edom andenga battimbe'yi ccafae jaye. 5Utu tsaiquingayi aindeccuja tisu injan'jen'choma qquepa Chiga Quitsa toya'caen Moisésma qquen afase'fa:
—¿Jongoesie qui ingima Egiptone somboen'fa? ¿Va a'i menia jipa pa'faye in'jamba ti qui somboen'fa? Nane tsa'ccu ni aña'chove'qque me'cho'fa gi. ¡Panshaen toesu manámeñi amba gi tsangaeyi chi'ga'fa!
6Tsa'caen afase'fasi Na'su Chigaja in'dia iyoma moesi jipa sinttu'fasi tsain'bitssi israendeccu pa'fa. 7Tsa'caen pa'je'fasi Moisésni japa qquen su'fa:
—¡Na'su Chiga toya'caen quema'qque afasepa gi ñoa'me egae tsincon'fa! ¡Na'su Chigama iñajanjan cuintsu ingi'ye iyoma joqquitssiañe!
Tsa'caen su'fasi Moisésja Na'su Chigama iñajan cuintsu israendeccu egae tsincon'choma aqque'paye. 8Iñajansi Na'su Chigaja qquen su:
—Tsa'cantsse tsesu iyove cu'a yoshavama ñoñamba quini'cconga ottaemba se'fatsse dyaiñajan. Tsa'caen dyaiñasi majan iyo'nga sinttuyepa tsa ñoña'cho iyoma can'da tsu ccusha'je'faya.
9Moisésja Chiga mandaqquia'caen cu'a yoshavama iyove ñoñamba quini'cconga ottaemba dyaiña. Tsa'caen dyaiñasi tsu majan iyonga sinttuyepa tsa ñoña'cho iyoma can'da ccusha'je'fa.
Cca'tti cca'tti jacan'cho
10Tsa'caen tsomba israendeccuja jaye ashaemba Obotni japa can'jen'fa. 11Tsa Obotne sombopa a'i menia japa Ijeabarimni can'jen'fa. Tsa tsu Moab andene chiga sombo'jefa. 12Tse'ttie sombopa japa Zered naiquiccuni can'jen'fa. 13Tse'tti can'jenccapa jaye ashaemba Arnón na'ema isepa tse'tti can'jen'fa. Nane Arnón tsu a'i menia'su na'en amorreo andenga ai'je'cho. Toya'caen tsu tsa Moab toya'caen amorreo andembe enttingeni. 14Tsane tsu Na'su Chiga Iyicco'je'cho tevaen'jenga qquen condase:
“Vaheb canqquema gi panshan'fa tsa Sufá andeni.
Nane naiquiccu'ye japa gi Arnón naeni ja'fa.
15Toya'caen nai'qui otafa'ye gi ja'fa
tsa Ar andenga ai'je'cho nai'qui'ye.
Tsangae japa gi Moab andenga nepi'fa.”
16Arnón naine sombopa Beerni nepi'fa. Tse'tti tsu Na'su Chiga Moisésnga qquen su'tti'su poso: “Aindeccuma boñajan ña tsa'ccuma afeye” 17Tsa'caen afesi tsu israendeccuja qquen settapoen'fa:
“¡Tsa'ccu, poso'ye somboja!
¡Settapoen'faja posone!
18Nasundeccu tsu dyan'dya'fa
tise'pa coen quini'ccoi'ccu.
Nane a'ima manda'su coenzandeccu tsu
tise'pa accuicco'choi'ccu
va posove fetta'fa.”
A'i menia'ñe israendeccuja Matani nepi'fa. 19Tsa Matana'ñe Nahalielni nepi'fa. Tse'ttie Bamotni nepi'fa. 20Tse'ttie japa moabitandeccu ande'su sinjunccuni nepi'fa Pisga ccotta'cco jin'ttinga. Nane tsa Pisga ccotta'cco'ye tsu pa'cco a'i menia'ma attian'jen'cho.
Ande na'su Sehónma patsu'cho
21Tse'tti can'jemba israendeccuja afasundeccuma moe'fa amorreo ande na'su Sehónga cuintsu japa qquen su'faye: 22“Que ande'ye panshañe gi in'jan'fa. Nane que'i nasipa jon'chonga ni que'i tsajaccunga ca'ni'faya'bi gi. Ni que'i poso'su tsa'ccuma cu'i'faya'bi. Tansintsse gi que'i andema Na'sumbe tsaiqui'ye panshan'faya.”
23Tsa'ma Sehónjan israendeccuma tise ande'ye panshañe se'pi. Tsa'caen se'pipa poiyi'cco tise aindeccuma ipa a'i menia ji israendeccuma cachuiye. Tsa'caen jipa Jahazani nepipa iyiccoye ashaen. 24Tsa'ma israendeccu'qque poini ashaemba tsendeccuma patsupa gana'fa. Tsa'caen ganamba Arnón naine toya'caen Jaboc naipi isupa tsa andeni can'jen'fa. Nane Jaboc nai'qui tsu amonitandeccu andenga cani'jen'cho. Tseni'su sundaroja ñotsse coira'je'fasi tsu tse'ttinga antte'fa. 25Tsa'caen tsomba israendeccuja poi amorreondeccu canqqueni can'jen'fa. Nane Hesbón toya'caen tsai'ccu pporotssi'su canqqueni can'jen'fa. 26Hesbón tsu amorreondeccumbe na'su Sehón canse'cho canqque. Nane Sehón tsu tayo'su Moab ande na'sui'ccu geraemba pa'cco andema Arnón naipi itsa'cho. 27Tsa'cansi tsu settapoensundeccuja su'fa:
“¡Hesbónga ji'faja!
¡Na'su Sehón canqque tsu!
¡Ccase ñoñamba ñotsse ttu'faja!
28Sehón canqque Hesbóne tsu si'ngeja anchanda.
Anchandapa tsu Moab ande'su Ar canqquema nepian,
tsa Arnón na'ema coira'je'cho canqquema.
29¡Va'cha qui Moab ande!
Ñoa'me qque'cho qui Quemos chigambe canqque.
Nane tise tsu antte
cuintsu tise tsandiendeccu ccuyapa ja'fasi
tise pushesundeccu na'su Sehónga indiye'faye.
30¡Hesbón tsu quin'su metsse da!
Dibóne toya'caen Nofapi metsse dañongesi
si'ngeja Medebapi nepi.”
Basán ande na'su Ogma patsu'cho
31Tsa'caen tsomba tsu israendeccuja amorreondeccu andeni canse'fa. 32Tseni can'jemba Moisésja majan aindeccuma moe cuintsu Jazer canqquema a'tutsse can'ga'faye. Toya'caen israendeccuja tise'pai'ccu pporotsse jincho canqquema patsupa tseni can'jen'cho amorreondeccuma tteya moe'fa. 33Tteya moemba omboe Basán canqqueni ja'jengae ja'fa. Tsa'ma Og, Basán canqque na'suja tise sundarondeccui'ccu sombopa Edreini israendeccuma cachuipa iyiccoye ashaen. 34Tsonsi Na'su Chiga Moisésnga su: “Dyombe can'faja, ña gi que'ima fuiteya cuintsu que'i tsendeccuma patsuye. Nane ña fuitesi qui pa'cco tise sundarondeccu, tise andema, amorreondeccu na'su Sehón can'jen'cho Hesbón canqquema tsonqquia'caen tson'faya.”
35Tsa'caen Na'su susi israendeccuja Og, tise dushundeccu toya'caen tise sundarondeccuma'qque fittitti'fa. Ni fae'ccoyi'qque antteyembitsse sefaemba tsa andema isu'fa.
Currently Selected:
Números 21: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
Números 21
21
Horma'su aindeccu patsu'cho
1Israendeccu Atarim tsaiqui'ye jiña'fa qquen pañamba Cananeo ande'su Arad canqque na'su, tsa Néguevni canjen'suja, israendeccui'ccu iyiccoye ji. Jipa majandeccumajan indipa ángaja. 2Tsa'caen tson'fasi israendeccuja Na'su Chigama ñoa'me su'choi'ccu qquen su'fa: “Nane que va aindeccuma patsuye ingima fuite'ninda gi poiyi'cco va ande'su canqquema metsse sefaen'faya.” 3Tsa'caen iñajan'fasi Na'su Chigaja tise'pa iñajanqquia'caen tsomba fuite cuintsu tsesu cananeondeccuma patsu'faye. Tsa'caen fuitesi israendeccuja tsesu cananeondeccuma metsse sefaen'fa. Tsa'caeñi tise'pa canqquema'qque tson'fa. Tsa'caen sefaemba tsu tse'ttima Horma qquen inisian'fa.
Cu'a yoshavama ñoña'cho iyo
4Israendeccuja Hor ccotta'ccone sombopa Cu'a Marni ja'jengae ja'fa, Edom andenga battimbe'yi ccafae jaye. 5Utu tsaiquingayi aindeccuja tisu injan'jen'choma qquepa Chiga Quitsa toya'caen Moisésma qquen afase'fa:
—¿Jongoesie qui ingima Egiptone somboen'fa? ¿Va a'i menia jipa pa'faye in'jamba ti qui somboen'fa? Nane tsa'ccu ni aña'chove'qque me'cho'fa gi. ¡Panshaen toesu manámeñi amba gi tsangaeyi chi'ga'fa!
6Tsa'caen afase'fasi Na'su Chigaja in'dia iyoma moesi jipa sinttu'fasi tsain'bitssi israendeccu pa'fa. 7Tsa'caen pa'je'fasi Moisésni japa qquen su'fa:
—¡Na'su Chiga toya'caen quema'qque afasepa gi ñoa'me egae tsincon'fa! ¡Na'su Chigama iñajanjan cuintsu ingi'ye iyoma joqquitssiañe!
Tsa'caen su'fasi Moisésja Na'su Chigama iñajan cuintsu israendeccu egae tsincon'choma aqque'paye. 8Iñajansi Na'su Chigaja qquen su:
—Tsa'cantsse tsesu iyove cu'a yoshavama ñoñamba quini'cconga ottaemba se'fatsse dyaiñajan. Tsa'caen dyaiñasi majan iyo'nga sinttuyepa tsa ñoña'cho iyoma can'da tsu ccusha'je'faya.
9Moisésja Chiga mandaqquia'caen cu'a yoshavama iyove ñoñamba quini'cconga ottaemba dyaiña. Tsa'caen dyaiñasi tsu majan iyonga sinttuyepa tsa ñoña'cho iyoma can'da ccusha'je'fa.
Cca'tti cca'tti jacan'cho
10Tsa'caen tsomba israendeccuja jaye ashaemba Obotni japa can'jen'fa. 11Tsa Obotne sombopa a'i menia japa Ijeabarimni can'jen'fa. Tsa tsu Moab andene chiga sombo'jefa. 12Tse'ttie sombopa japa Zered naiquiccuni can'jen'fa. 13Tse'tti can'jenccapa jaye ashaemba Arnón na'ema isepa tse'tti can'jen'fa. Nane Arnón tsu a'i menia'su na'en amorreo andenga ai'je'cho. Toya'caen tsu tsa Moab toya'caen amorreo andembe enttingeni. 14Tsane tsu Na'su Chiga Iyicco'je'cho tevaen'jenga qquen condase:
“Vaheb canqquema gi panshan'fa tsa Sufá andeni.
Nane naiquiccu'ye japa gi Arnón naeni ja'fa.
15Toya'caen nai'qui otafa'ye gi ja'fa
tsa Ar andenga ai'je'cho nai'qui'ye.
Tsangae japa gi Moab andenga nepi'fa.”
16Arnón naine sombopa Beerni nepi'fa. Tse'tti tsu Na'su Chiga Moisésnga qquen su'tti'su poso: “Aindeccuma boñajan ña tsa'ccuma afeye” 17Tsa'caen afesi tsu israendeccuja qquen settapoen'fa:
“¡Tsa'ccu, poso'ye somboja!
¡Settapoen'faja posone!
18Nasundeccu tsu dyan'dya'fa
tise'pa coen quini'ccoi'ccu.
Nane a'ima manda'su coenzandeccu tsu
tise'pa accuicco'choi'ccu
va posove fetta'fa.”
A'i menia'ñe israendeccuja Matani nepi'fa. 19Tsa Matana'ñe Nahalielni nepi'fa. Tse'ttie Bamotni nepi'fa. 20Tse'ttie japa moabitandeccu ande'su sinjunccuni nepi'fa Pisga ccotta'cco jin'ttinga. Nane tsa Pisga ccotta'cco'ye tsu pa'cco a'i menia'ma attian'jen'cho.
Ande na'su Sehónma patsu'cho
21Tse'tti can'jemba israendeccuja afasundeccuma moe'fa amorreo ande na'su Sehónga cuintsu japa qquen su'faye: 22“Que ande'ye panshañe gi in'jan'fa. Nane que'i nasipa jon'chonga ni que'i tsajaccunga ca'ni'faya'bi gi. Ni que'i poso'su tsa'ccuma cu'i'faya'bi. Tansintsse gi que'i andema Na'sumbe tsaiqui'ye panshan'faya.”
23Tsa'ma Sehónjan israendeccuma tise ande'ye panshañe se'pi. Tsa'caen se'pipa poiyi'cco tise aindeccuma ipa a'i menia ji israendeccuma cachuiye. Tsa'caen jipa Jahazani nepipa iyiccoye ashaen. 24Tsa'ma israendeccu'qque poini ashaemba tsendeccuma patsupa gana'fa. Tsa'caen ganamba Arnón naine toya'caen Jaboc naipi isupa tsa andeni can'jen'fa. Nane Jaboc nai'qui tsu amonitandeccu andenga cani'jen'cho. Tseni'su sundaroja ñotsse coira'je'fasi tsu tse'ttinga antte'fa. 25Tsa'caen tsomba israendeccuja poi amorreondeccu canqqueni can'jen'fa. Nane Hesbón toya'caen tsai'ccu pporotssi'su canqqueni can'jen'fa. 26Hesbón tsu amorreondeccumbe na'su Sehón canse'cho canqque. Nane Sehón tsu tayo'su Moab ande na'sui'ccu geraemba pa'cco andema Arnón naipi itsa'cho. 27Tsa'cansi tsu settapoensundeccuja su'fa:
“¡Hesbónga ji'faja!
¡Na'su Sehón canqque tsu!
¡Ccase ñoñamba ñotsse ttu'faja!
28Sehón canqque Hesbóne tsu si'ngeja anchanda.
Anchandapa tsu Moab ande'su Ar canqquema nepian,
tsa Arnón na'ema coira'je'cho canqquema.
29¡Va'cha qui Moab ande!
Ñoa'me qque'cho qui Quemos chigambe canqque.
Nane tise tsu antte
cuintsu tise tsandiendeccu ccuyapa ja'fasi
tise pushesundeccu na'su Sehónga indiye'faye.
30¡Hesbón tsu quin'su metsse da!
Dibóne toya'caen Nofapi metsse dañongesi
si'ngeja Medebapi nepi.”
Basán ande na'su Ogma patsu'cho
31Tsa'caen tsomba tsu israendeccuja amorreondeccu andeni canse'fa. 32Tseni can'jemba Moisésja majan aindeccuma moe cuintsu Jazer canqquema a'tutsse can'ga'faye. Toya'caen israendeccuja tise'pai'ccu pporotsse jincho canqquema patsupa tseni can'jen'cho amorreondeccuma tteya moe'fa. 33Tteya moemba omboe Basán canqqueni ja'jengae ja'fa. Tsa'ma Og, Basán canqque na'suja tise sundarondeccui'ccu sombopa Edreini israendeccuma cachuipa iyiccoye ashaen. 34Tsonsi Na'su Chiga Moisésnga su: “Dyombe can'faja, ña gi que'ima fuiteya cuintsu que'i tsendeccuma patsuye. Nane ña fuitesi qui pa'cco tise sundarondeccu, tise andema, amorreondeccu na'su Sehón can'jen'cho Hesbón canqquema tsonqquia'caen tson'faya.”
35Tsa'caen Na'su susi israendeccuja Og, tise dushundeccu toya'caen tise sundarondeccuma'qque fittitti'fa. Ni fae'ccoyi'qque antteyembitsse sefaemba tsa andema isu'fa.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.