Números 13
13
A'tutsse jacansundeccuma moe'cho
1Na'su Chigaja Moisésma afapa qquen su:
2“Canaán andeni majan tsandiendeccuma moejan cuintsu a'tutsse japa tsa ande ña que'inga afeya'choma atte'faye. Nane poi israe'su dose aindeccu'su fae tsandie majan na'siacan'ma moejan.”
3Moisésja Na'su mandaqquia'caen Parán a'i menia'ñe aindeccuma moe. Tsendeccu poiyi'cco tsu poi israendeccu'su na'siacandeqquia. 4Vandeccu tsu ja'chondeccu: Rubén aindeccu'su Samúa, Zacur dutssi'ye; 5Simeón aindeccu'su Safat, Horí dutssi'ye; 6Judá aindeccu'su Caleb, Jefone dutssi'ye; 7Isacar aindeccu'su Igal, José dutssi'ye; 8Efraín aindeccu'su Oseas, Nun dutssi'ye; 9Benjamín aindeccu'su Palti, Rafú dutssi'ye; 10Zabulón aindeccu'su Gadiel, Sodi dutssi'ye; 11José aindeccu'su (tsa Manasés aindeccu) Gadi, Susi dutssi'ye; 12Dan aindeccu'su Amiel, Gemali dutssi'ye; 13Aser aindeccu'su Setur, Micael dutssi'ye; 14Neftalí aindeccu'su Nahbi, Vapsi dutssi'ye; 15Gad aindeccu'su Geuel, Maqui dutssi'ye.
16Tsa tsu Moisés a'tutsse jacamba cansundeccuve moe'chondeccumbe inise. Moisésja Oseas, Nun dutssi'yema tsu Josuéve inisian.
17Moisésja cuintsu Canaán andema a'tutsse camba atesu'faye moe'jemba qquen su:
—Néguev andenga japa ccotta'cco'su andeni ja'faja. 18Ñotsse in'jamba can'faja tsa andema. Toya'caen tsani can'jensundeccuma can'faja: ¿Osha'faya'cho ti?–tsambi'ta, ¿patsuye'faya'cho? Toya'caen, ¿re'ricco a'i ti?–tsambi'ta, ¿tsain'bitssi? 19Tise'pa canqquema'qque ñotsse can'faja. ¿Aqquia carpani ti can'jen'fa?–tsambi'ta, ¿ttuccuni ti ta'etssia tsaoni can'jen'fa? Toya'caen, ¿tise'pa can'jen'cho ande ti ñotssia?–tsambi'ta, ¿ega? 20¿Sho'yoqque'su ande ti?–tsambi'ta, ¿ega ande? ¿Quini'cco'qque ti jin?–tsambi'ta, ¿me'in? Dyombe'yi japa jongoesu tetacho tseni jinchoma ñani i'faja.
Ofa tsaja naite tsu Moisésja tsa'caen a'ima manda. 21Tsa'caen mandasi aindeccuja tsa andema cañe japa Zin a'i menia'ñe ashaemba Rehobni nepi'fa. Tsa tsu Hamatni cani'jen'tti. 22Nane Néguevma panshamba Hebróni nepi'fa. Hebróni tsu can'jen'fa Ahimán, Sesai toya'caen Talmai. Tsendeccuta tsu Anac omba'su dushundeccu. Hebrón canqque tsu Egipto'su Zoan canqquema o'tie ñoña'cho siete canqque'fave panshan'cho. 23Tsomba Escol sinjunccuni nepipa ñoa'me ñotssia na'cho o'fa tsajama attepa fae ttembani ñoa'me tsain'bitssi na jinchoma chattupa quini'cconga tandamba dos a'i opipa i'fa. Toya'caen tseni'su tsotsoqui, higoma'qque taipa i'fa. 24Tsa'caen israendeccu ofa tsajama tseni chattu'chosi tsu tsa sinjunccuma Escolve inisian'fa.
25Cuarenta a'ta tsa'caen tsa andeni jacamba shandapa 26toequi Cadesni jipa Parán a'i menia nepi'fa. Tse'tti tsu Moisés Aarón toya'caen poiyi'cco israendeccu can'jen'fa. Tsa'caen nepipa tisupa japa atte'choma condasepa tseni'su teta'choma'qque canjaen'fa. 27Canjaemba Moisésnga su'fa:
—Ja'fa gi que ingima manda'cho andeni. Ñoa'me tsu tsenijan chocho toya'caen tuño cuñajun'cho'qque shacaya'bi. Toya'caen va tsu tseni naqque'su teta'cho. 28Tsa'ma tseni'su aindeccuja ñoa'me osha'faya'cho tsu. Toya'caen tise'pa canqqueja ñoa'me randepa ñotsse ttu'choni tsa'oja sheque. Toya'caen tsenima gi atte'fa rande a'i, Anac omba'su dushundeccuma. 29Néguevnijan amalecitandeccu tsu can'jen'fa. Ccotta'cco'su andenijan hititandeccu, jebuseondeccu toya'caen amorreondeccu can'jen'fa. Toya'caen mar otafa'ye Jordán naeni tsu cananeondeccumbe ande.
30Tsama pañamba Calebja Moisési'ccu afa'je'cho aindeccuma ziyaemba qquen su:
—¡Jinge japa tsa'su aindeccuma joqquitssiamba tsa andema isuye! ¡Ingija osha'faya gi tsa andema itsaye!
31Tsa'ma tisei'ccu fae'ngae japa ji'chondeccuja qquen su'fa:
—¡Me'in! ¡Osha'faya'bi gi tsa'su aindeccuma ganañe! ¡Tsendeccuta tsu ingima ti'tsse osha'faya!
32Tsa'caen supa tsa ande tise'pa can'ga'choja ñoa'me ega ande qquen suye ashaemba qquen su'fa:
—Tsa ingi can'ga'cho andenijan tisupanaccu fi'tticco'je'fa. Toya'caen poiyi'cco tseni'su tsandiendeccuja ñoa'me randepa quinsetssi'fa. 33Toya'caen gi atte'fa tsa rande a'i Anac omba'su dushundeccuma'qque. Ingita gi tisupama in'jan'fa ttombia'cancho'cco. Nane tsendeccu'qque tsu tsa'cancho'ccoe ingima caña'jen'fa.
Currently Selected:
Números 13: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
