Miqueas 7
7
Israendeccu vana'jemba ina'jen'cho
1¡Va'cha gi! Taiya'cho tayo pasasi
aqquia ttatta'su gi.
Nane poi andenima tta'tta'ma gi o'fa tsaja,
higove me'i'an'ma
aqquia tta'tta vanaqquia'caen
2majan Chigave in'jamba
ñotsse tson'suma attembi.
Nane poiyi'cco tsu tisupanaccuma
quendeccoqquia'caen fi'tticcoye ronda'je'fa.
3Egae tsincoñejan ñoa'me injama'pandeccu tsu.
Ande na'su afe'chove isuye in'jamba tsu manda'je'fa.
Injama'choma somboen'su'qque corifin'dima
isuye atesu afe'sune ñotsse afaye.
Joccapindeqquiaja tise'pa in'jangae
in'jan'chove tsomba fae'ngae ñoña'fa
canqquesundeccuma dañoñe.
4Tise'pa'su bove ñotssiaja nojan'can tsu.
Ti'tsse joccapitssia'qque ataccuma bove ega tsu.
Tsa'ma que'ima coira'su Chiga aya'fama afasundeccu suqquia'caen tsu
tsane afepoeña'cho a'ta nepiya.
Tsequi a'ta tsendeccuja injamambie dapa qque'faya.
5Tisupapora in'jamba
afa'choma pañajama.
Que injama'cho in'jan'choma'qque
que ñotsse in'jan'chonga condajama.
Nane que pushenga jongoesuma condase'je'ta
injan'jeñi condaseja.
6Nane dutssiyendeccu tise'pa yayandeccuma
paña'faya'bi.
Onquengendeccu tise'pa mamandeccuma chi'ga'faya.
Chinandeccu tise'pa chan ccashendeccuma'qque
chi'ga'fa.
Nane a'ima ti'tsse iyicco'su tsu
tise'pa tsaofa'su antiandeccu.
7Tsa'ma ñajan Na'su Chigave in'jamba gi ronda'jeya.
Tise ñama pañasi gi ccushaen'su qquen
tisema in'jamba canseya.
Currently Selected:
Miqueas 7: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
