Levítico 12
12
Asettupa pushesu oti'shi'je'cho
1Na'su Chiga Moisésma ttu'sepa qquen su:
2“Israendeccunga qquen condaja: Pushesu surie dapa tsandie du'shuve isu'ta tsu siete a'tave vasembe'yi can'jeña'cho. 3Ocho a'ta pasasi tsu du'shumbe ttonoma chhiyi tevaeña'cho. 4Tsa'ma chan tsu faesu treinta y tres a'tave vasembe'yi can'jeña'cho. Nane osha'cho Chigane jinchoma pporaeñe oshambipa ni Chigai'ccu cachuicco'je'ttinga ca'niñe oshambiya tsequi a'ta nepiya'ngae. 5Tsa'ma pushesu du'shuve isu'ta chan tsu dos avuja'quive vasembe'yi can'jemba faesu sesenta y seis a'ta egapayi can'jeña'cho.
6“Pushesuja tsa'caen tsandie du'shuve, tsambi'ta pushesu du'shuve isu'ta tsu asettupa oti'shiya'cho nepisi oveja du'shuma Chigai'ccu cachuicco'je'tti'su sombo'ttinga angapa afeya'cho. Nane oveja du'shu fae canqque'fave an'bian'choma tsu afeya'cho Chiganga oque oraeña'chove. Toya'caen tsu ppuppuju'choma, tsambi'ta manambema tise egae tsincon'chone afeya'cho. Nane Chigama afa'sunga afesi 7tsu tiseja tsama oque oraeña pushesu egae tsincon'choma pasaeña'chove afaye. Nane tsa'caen tsonsi tsu pushesuja tise egapama ccushaya.”
Tsa'caen tsu Na'su Chigaja manda tsandie, pushesu du'shuma isupa tsoña'chove. 8Tsa'ma chan oveja du'shuma chavaye oshambi'ta tsu dos ppuppuju'choma, tsambi'ta dos manambema ipa afeya'cho. Afesi fae'ccoma Chiganga oque oraeña'cho, faesumajan egae tsincon'choma pasaeña'chove afaya'cho. Tsa'caen afesi Chigama afa'su isupa Chigama afasi pushesuja giya'tsse ccushaya.
Currently Selected:
Levítico 12: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
