Jeremías 7
7
Jeremías Chiga ettini afa'cho
1Na'su Chiga Jeremíasnga afapa qquen su: 2“Na'su Chiga ettini japa cani'jen'ttinga ccutsupa poi aindeccunga qquen condaja: Poiyi'cco que'i Judá aindeccu vani Na'su Chigama iñajañe canisundeccu ña condase'choma ñotsse paña'faja. 3Qquen tsu Na'su Israel Chiga, tsa Osha'choma Oshacho'cho Chigaja, que'inga su: ‘Que'i egae canse'choma catipa ñotsse tson'ninda gi antteya que'i toya va andeni canse'faye. 4Tsa'ma qquen afopoensundeccuma paña'fajama: ¡Vani tsu Na'su Chiga etti! ¡Majañi'qque ingima patsuye osha'fambi! ¡Vani tsu Na'su Chiga etti!
5“ ‘Que'i egae canse'choma catipa ñotsse tsomba tisu faenga'sui'ccu ñotsse tsoncco'faja. 6Yaya mama pa'cho dushundeccumbema, tsandupajen'chondeccumbema, que'i'ccu can'jen'cho faesu andesundeccumbema'qque itsaye noñangian'fajama. Va ettini aqquia: Vaja egae tsincon, qquen afopoen'fajama tisema fi'ttiañe in'jamba. Ti'tsse faesu chigandeccuma iñajan'fajama tsa'caen tsomba Na'su que'i Chigama catipa ti'tsse tisuma dañosa'ne. 7Nane tsa'caen tisuma tansian'fa'ninda gi antteya que'i toya va andeni canse'faye, va ña que'i tayopisundeccu'yenga tsangae afe'cho andeni.
8“ ‘Que'i pañamba in'jan'choja ñoa'me barembi'choa afopoen'cho tsu. 9Nane que'ija cca'na'fa; fi'tti'fa; faesumbe pushei'ccu can'jen'fa; tansintssi qquen supa qui afopoen'fa; ñome'bama qui Baalnga oque oraen'fa; poi tisu atesumbindeqquia chigandeccuma'qque qui iñajan'fa. 10Tsa'caen tsomba qui va ña ettinga ji'fa ñame tta'ttaye. Dyombi'tsse vani ji'jeye qquen qui in'jan'fa. Nane tsa'caen ña in'jambi'choa've tsincomba toya dyombi'tsse ji'jeye qquen qui in'jan'fa. 11¿Jongoesu qquen qui asi'ttaen'fa? ¿Va ñame in'jan'cho ettita ti ccanamba tsa'o? Ña Na'su Chiga gi que'i va'ttinga egae tsincon'choma tayo attepa ja'ño que'inga conda. 12Silo canqqueni japa ña me'ttia'ye a'i'ccu can'jemba cachuicco'je'ttive tta'tta'faja. Tta'ttapa qui in'jan'faya ña Israel aindeccu egae tsinconsi iyicca'yepa tsama nepian'choma. 13Nane mi'nge'e iyu'ñacca'ni'qque qui ñama pañañe in'jambipa afa'fambi ni ña in'janqquia'caen tson'fambi. Ña Na'su gi tsa'caen su. 14Que'i tsa'caen tsincon'chone gi Silo'su ñama cachuicco'je'ttima nepianqquia'caen va ja'ño'su ñame in'jan'cho ettima'qque nepiaña. Ñajan va ettima que'i tayopisundeccu'yenga afepa que'inga'qque afesi que'ija tsa etti faesundeccu patsusa'ne que'ima coira'je qquen in'jan'fa. 15Nane que'i antiandeccu tsa israe'su Efraín aindeccuma tayoe joqquitssianqquia'caen gi que'ima'qque ña'ñe joqquitssiaña.’ ”
Currently Selected:
Jeremías 7: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
