Jeremías 19
19
Apima doñamba canjaen'cho
1Na'suja ñanga qquen su: “Japa apima chavapa majan canqque'su coenzandeccu toya'caen majan Chigama afa'su coenzandeccuma'qque ttu'seja. 2Omboe Ben-hinom sinjunccuni japa chiga sombo'jefa'su sombo'ttinga ccutsupa va ña quenga condase'choma condaja 3qquen: ‘Judá nasundeccu, Jerusaléni can'jensundeccu'qque, ñotsse paña'faja Na'su Israel Chiga, tsa Osha'choma Oshacho'cho Chiga, que'inga qquen su'choma: Va canqquenga gi ñoa'me ega dañoqque'suve tsoña cuintsu majan paña'da ñoa'me dyopa can'boen ccutsu'faye. 4Nane israendeccu ñama catipa va sinjunccuma faesu andema'caen tson'fasi gi tsa'caen dañoña. Ja'ño va'ttinga tsu ñome'bama faesu chigandeccunga oque oraen'fa. Nane tise'pa ni tise'pa tayopisundeccu'ye ni Judá'su nasundeccu tsa chigandeccuma tayoe atesu'fambi. Toya'caen vani tsu tsain'bitssia egae tsincombindeqquiama fittitti'fa. 5Oque oraen'jen'ttive ñoña'fa tise'pa dushundeccuma oquepa Baalnga afeye. Ñajan tsa'caen mandambi ni tsa'caen condambi. Ni asi'ttaembi gi tise'pa tsa'caen tsoña'chove. 6Tise'pa tsa'caen tsincon'fasi jai'ngae va'ttima Tofet, ni Ben-hinom sinjunccu qquen afa'faya'bi. Tsa'ma Fittitti'je'cho sinjunccu qquen tsu afa'faya. Ña, Na'su Chiga gi que'inga conda. 7Vani osha'cho Judá'su, toya'caen Jerusalén'su asi'ttaemba in'jan'choma gi qqueñaña. Ña anttesi tsu tise'pa enemigondeccu tise'pama patsupa fittitti'fasi ccompana, osha'cho tsampi'su putsa'su jipa tise'pa ai'voma an'faya. 8Va canqquema gi ccuchaqquia'caen me'tsse tsoña cuintsu poiyi'cco majan vangae pashanjin'da ñoa'me dyoe'sui'ccu can'boen pashan'jen'faye. 9Nane ña anttesi tise'pa enemigondeccu va canqquema shoquendi ttupa fitti'ttiye ronda'je'fasi tsu dyo'oe qquipoe'supa tise'pa dushundeccu, tisupanaccu'su pa'chombe ai'voma an'faya.’
10“Tsa'caen condasepa quei'ccu can'jen'chondeccu caña'jen'ni apima ttova doñajan. 11Doñamba tise'panga qquen suja: ‘Qquen tsu Na'su Osha'choma Oshacho'cho Chigaja su: A'i apima doñaqquia'caen gi va canqque, va aindeccuma'qque nepiaña ccase ñoña'ma'sia've. Ña tsa'caen tsonsi tsu pa'chondeccuma Tofet sinjunccu on'batsse a'tu boña'faya mani faesuma a'tuya'chove metsse. 12Toya'caen tsu va canqquenga'qque Tofet'caen on'batsse pa'chondeccuma boña'faya. Ña, Na'su Chiga gi que'inga conda. 13Jerusalén'su tsa'o, Judá nasundeccu tsa'o'qque tsu Tofet'caen egae da'faya. Toya'caen tsa tsao'cco omba'su ppappacco'qque tsu tsa'caen egae da'faya. Nane tseni tsu ñome'bama oque oraemba osha'cho sefacco'su o'fema chigama'caen iñajamba tise'pa vino afe'choma'qque fiña'fa faesu chigandeccuma iñajañe.’ ”
14Na'su tsa'caen Jeremíasma Tofetni tise aya'fa su'choma condaseye mandasi condasepa tsene sombopa Chiga ettini japa tseni'su atandundunga ccutsupa aindeccunga su: 15“Israel Na'su, Osha'choma Oshacho'cho Chiga tsu su: ‘Jerusalén, toya'caen faesu pporotssi'su canqque'su aindeccu ñoa'me ñama pañañe in'jambipa ña in'janqquia'caen tson'fambi. Tsa'cansi gi osha'cho tise'pama egae tsoña'chove ña condase'choma ñoa'me tsoña.’ ”
Currently Selected:
Jeremías 19: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
