Oseas 1
1
Oseas pushe, du'shu'qque
1Uzías, Jotam, Acaz toya'caen Ezequías Judá andema manda'je'ni tsu qquen Na'suja Oseasnga conda. Oseasja Beeri dutssi'ye tsu. Na'su qquen condasejeite tsu Joás dutssi'ye, Jeroboamjan Israel ande na'su.
2Pushe tisu tsa'nduma catiqquia'caen israendeccuja Na'suma catipa ñoa'me egae tsincon'fa. Na'suja tsama Israelnga canjaeñe in'jamba Oseasnga qquen su: “Japa tisu ai'voi'ccu gana'su pushesuma pushepa dushundeccuve an'bianjan. Tsendeccuya tsu ega pushesumbe dushundeccu.”
3Na'su tsa'caen mandasi Oseasja Diblaim onque'nge, Gomerma pushe. Pushesi surie dapa tsandie du'shuve isu. 4Isusi Na'suja Oseasnga su: “Va du'shumajan Jezreelve inisianjan. Nane junde gi ande na'su Jehú dutssiyendeccuma vanaeña Jehú Jezreel canqqueni tayopi can'jemba egae tsincon'chone. Tsangae gi Israel manda'je'choma nepiaña. 5Nane tsequi a'ta gi Jezreel sinjunccuni pa'cco Israel sundarondeccuma me'tsse sefaeña.”
6Can'jemba Gomerja ccase surie dapa pushesu du'shuve isu. Isusi Na'suja Oseasnga su: “Va pushesu du'shuma Lo-ruhamame inisianjan, Ña israendeccuma mendeyeya'bi qquen canjaeñe. Toya'caen tise'pa egae tsincon'choma joqquitssiaña'bi gi. 7Tsa'ma judándeccuma gi mendeyepa ña, Na'su, que'i Chiga tise'pama ccushaeña. Gerai'ccu tise'pama ccushaeña'bi gi ni battittianccu ni matichi, ni cavayo ni cavayo'su sundarondeccui'ccu ccushaeña'bi gi. Tsa'ma tisutsse gi ccushaeña.”
8Omboe Lo-ruhama chochoma anttesi Gomerja ccase surie dapa faesu tsandie du'shuve isu. 9Isusi Na'suja Oseasma afapa su: “Va du'shuma Lo-amime inisiaña'cho, que'ija ja'ño ña a'imbi qquen suye. Toya'caen ñajan que'i Chigambi gi.”
Israendeccu ccase Chiga aindeccu
10Jai'ngae israendeccuja mar'su sisipa'caen
tsain'bitsse atapasi majañi'qque tise'pama
agattoye osha'faya'bi.
Tsequi a'ta Na'suja “Que'ija ña a'imbi” qquen afambipa
“Que'ija tsangae canse'cho Chigambe
dushundeccu qui” qquen tsu suya.
11Tsequi a'ta tsu judándeccuma israendeccui'ccu
fa'enga setsama'caen fae a'ive da'faya.
Toya'caen fae na'su tsu tise'pama manda'jeya.
Nane tsequi a'ta Jezreel joccapitssia've dasi
tsu poiyi'cco ccase Jerusaléni bo'faya.
Currently Selected:
Oseas 1: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
