Éxodo 32

Corima ñoña'cho vaura du'shu

1Israendeccuja Moisés uta ccotta'ccone jimbisi Aarónga bopa tisema su'fa:

—Japa chigandeccuve ñoñajan cuintsu ingima angacañe. ¿Ma'caen gi atesu'faya ingima Egiptone somboen'su Moisés ma'caen da'chove?

2Tsonsi Aarónjan su:

—Que'i pushendeccu, que'i dutssiyendeccu, que'i onquengendeccu tsosinani dusian'cho cori sasiyoma isupa ñani i'faja.

3Tsa'caen susi poiyi'cco tise'pa tsosina'su cori sasiyoma battiamba Aaróni anga'fa. 4Tsonsi Aarónjan isupa tsa corima tssutssiamba fiña cuintsu vaura du'shua'caen somboye. Tsomba ñoñaqque'su yoshavai'ccu ñoa'me nanitsse nani. Tsonsi poiyi'cco a'i tsama attepa qquen su'fa:

—¡Israendeccu, va tsu que'i chiga, que'ima Egiptone somboen'su!

5Tsa'caen tson'fasi attepa Aarónjan oque oraenqque'suve tsa vaura du'shui'ccu pporotsse ñoñamba qquen fundo:

—¡Jinge tu'i fiestaen'faye Na'suma ñotsse afaye!

6Ccaqui a'ta sinte'yi jangipa afe'choma oque oraemba, ñoquiañe afeqque'suve'qque, tsa ñoña'cho vauranga afe'fa. Tsa'caen tsomba tse'i aindeccuja dyaipa amba cui'je'fa. Omboe jangipa egae tsincoñe ashaen'fa. 7Tsonsi Na'su Chigaja Moisésnga su:

—¡Junde andepa jaja! Egiptone que somboen'cho aindeccu tsu qqueye tson'jen'fa. 8Nane jundeyi tsu joqquitssi'fa ña mandapa afe'cho tsaiqui'ye. Joqquitssipa tsu corima vaura du'shua'caen ñoñamba tsanga iñajamba afe'choma'qque afe'fa. Tsomba tsu qquen su'fa: ‘¡Israendeccu, va tsu que'i chiga, que'ima Egiptone somboen'su!’

9Toya'caen tsu Na'su Chigaja Moisésma su:

—Tsendeccuma attepa gi in'jan tise'pa pañambiqquia'caen tsincon'fa'choma. 10Ja'ño ñama antteja ña iyicca'ye'choi'ccu metsse tsendeccuma sefaeñe. Tsa'ma que'i'ccu gi tsain'bitssi a'ive atapoeña.

11Moisésja tsa'caen in'jambipa Na'su Chigama ñoquiañe in'jamba qquen su:

—Ña Na'su, ¿jongoesie qui que aindeccuma iyicca'ye? Nane queyi qui tise'pama Egiptone somboen osha'cho paqque'sui'ccu tsomba. 12Tsa'caen tson'da, ¿ma'caen qui antteya cuintsu Egiptondeccu qquen su'faye: ‘Chigaja tsa'caen a'i menia angapa israendeccuma fi'ttiye qquen in'jamba somboen. Nane metsse sefaeñe somboen’? Tsa'caen in'jan'fasa'ne que iyicca'ye'choma antteja. Aqque'paja que aindeccuma dañoñe in'jan'choma. 13Injan'jenjan quema shondo'su Abraham, Isaac, toya'caen Israelma'qque que tisu injama'choi'ccu in'jamba ñoa'me su'chove afapa qquen su'choma: ‘Que omba'su dutssiyendeccuma gi atapoeña cuintsu sefacconi'su o'fema agattoye oshambi'qquia'caen tise'pama'qque agattoye oshambiye.’ Toya'caen ‘Pa'cco va ña afeya qquen su'cho andema gi tsangae que'inga afeya.’

14Moisés tsa'caen susi Na'su Chigaja tise aindeccuma dañoñe in'jan'choma antte. 15Tsonsi Moisésja Chiga mandapa tevaemba afe'cho dos patufin'dima isupa ccotta'cco'ye andeye ashaen. Nane patufin'dita tsu poifama tevaen'cho. 16Chigayi tsu tsa patufin'dive ñoñamba tise'yi tise in'jan'choma tsanga tevaen.

17(Moisés ccotta'cco'ye andejipa Josué can'jeni jisi) Josuéja aindeccu fundo'je'choma pañamba Moisésnga conda:

—Canqquene geraen'jemba fundojeqquia'caen gi paña.

18Tsa'ma Moisésja su:

—Yata tsu patsupa avujapa settapoen'jen'chombi ni ganañemba ñombi'yepa settapoen'jen'chombi. Nane ñanda gi paña ccaninga settapoen'bave.

19Tsa'caen supa canqquenga nepipa corima ñoña'cho vaura du'shuma atte. Toya'caen boira'je'choma'qque attepa ñoa'me iyicca'yepa tse'tti ccotta'cco andepa'ttinga tisu isu'cho patufin'dima ttova do'jo. 20Tsa'caen tsomba jundeyi tsa vaura du'shuma isupa si'ngenga ttova ccuiña. Ttova ccuiñasi ñoa'me ju'rusi isupa vu'vutsse sun'dapa tsa'ccunga ganga. Gangapa manda cuintsu israendeccu tsa'su tsa'ccuma cu'i'faye. 21Tsomba Aarónma su:

—¿Jongoesuma va aindeccu quenga tson'fasi qui qquen tson cuintsu va aindeccu tsa'caen egae tsincon'faye?

22Tsonsi Aarónjan su:

—Ña na'su, ñama iyicca'yejama. Que'qque qui ñoa'me atesu va aindeccu egae tsincoñe in'jan'choma. 23Tise'pa tsu ñama su'fa: ‘Chigandeccuve ñoñajan cuintsu ingima angacañe. ¿Ma'caen gi atesu'faya ingima Egiptone somboen'su Moisés ma'caen da'chove?’ 24Tsonsi gi ñajan su: ‘Majan corima an'bian'da afe'faja.’ Tise'pa corima afesi gi si'ngenga catisi tsu va vaura du'shuve sombo.

25Tsa'caen susi Moisésja in'jan aindeccu oshambipa injanga tson'fa'choma. Nane Aarón ñotsse angacambisi qque'fasi tise'pai'ccu iyiccosundeccu'qque israendeccuma chi'gapa feñañe osha'fa. 26Tsa'caen in'jamba Moisésja canqquenga cani'jen'ttinga ccutsupa qquen su:

—Majan Na'su Chigave injan'jen'chota ñai'ccu bo'faja.

Tsa'caen susi poiyi'cco Leví aindeccu tisenga bo'fa.

27Tsonsi Moisésja tise'panga su:

—Qquen tsu Na'su Chigaja su, tsa israendeccu Chiga: ‘Poiyi'cco que'i'su matichima isupa poi carpani japa majan tsa vauranga iñajansundeccuma fittitti'faja. Nane majan que antian, majan que amigo, toya'caen que'i'ccu pporotsse canjen'su tsa'caen tson'nijan tsendeccuma'qque fittitti'faja.’

28Levítandeccu tsa'caen Moisés manda'choma pañamba tson'fasi tsu tsequi a'ta tres mil a'i pa'fa. 29Tsonsi Moisésja su:

—Ja'ño Na'suma pañamba que'i majan tisu dutssi'ye, majan tisu antianma fitti'ttipa qui Na'su ñotssianga ca'ni'fa. Tsa'cansi tsu ja'ño Na'su Chigaja que'ima ñotsse tsoña.

30Ccaqui a'ta Moisésja aindeccunga su:

—Que'ita qui ñoa'me egae tsincon'chove tson'fa. Tsa'cansi gi ja'ño ccase Na'su can'jeni ansundeya'cho. Tseni japa gi atesuya tise que'ima ñoqui'chove.

31Tsa'caen supa Moisésja ccase Na'su can'jeni japa qquen su:

—Nane aindeccuja ñoa'me tsu egae tson'fa corima chigave ñoñamba. 32Quema gi iñajan, chigáne tise'pama ñoquija. Tsa'ma ñoquiye chi'ga'ta ña inisema ccuchaja que tevaen'jenga tevaen'choma ña'qque tsendeccui'ccu fae'ngae catiyeye.

33Tsa'ma Na'su Chigaja qquen su:

—Jo'su ñama chi'gapa egae tsinconsundeccumbe iniseveyi gi ccuchaya. 34Tsa'cansi japa aindeccuma angaja ña su'cho andeni. Ñama shondo'su tsu que'ima angaya. Tsa'ma maqui tise'pama vanaeña'cho a'ta nepisi gi tise'pa egae tsincon'chone vanaeña.

35Tsa'caen supa Na'su Chigaja tsa Aarón ñoña'cho vaurama iñajansundeccunga paqque'suma moe.

Currently Selected:

Éxodo 32: con

Highlight

Copy