Deuteronomio 7

Faesu chigama iñajan'fajama

1Na'su, que'i Chigaja, que'i an'biaña'cho andenga ca'niamba siete ande'su aindeccuma, que'ima ti'tsse quin'an, ti'tsse tsain'bitssia aindeccuma tteya mañaña. Nane hititandeccu, gergeseondeccu, amorreondeccu, cananeondeccu, ferezeondeccu, heveondeccu, jebuseondeccuma'qque tsu tteya mañaña. 2Na'su que'i Chiga anttesi que'ija tsendeccuma patsupa tise'pama metsse nepiaña'cho. Nane tise'pama mendeye'fajama ni injancco'fa'chove tise'pai'ccu afa'fajama. 3Toya'caen tise'pa'suma casara'fajama. Que'i dutssiyendeccuma tise'pa onquengendeccunga antte'fajama ni que'i onquengendeccuma tise'pa dutssiyendeccunga antte'fajama. 4Nane tsa'caen tson'ninda tsu tsendeccu que'i dushundeccuma qqueña'faya cuintsu Na'su Chigama catipa faesu chigandeccuma iñajan'faye. Tsa'caen tson'fa'ninda tsu Na'suja que'ima iyicca'yepa tse'faei'ccuyi nepiaña. 5Qquen tsu que'i tsoña'cho: tise'pa chiganga afe'je'cho oque oraen'jen'choma tsu osuiaña'cho. Toya'caen tsu tise'pa iñajan'jen'cho patu, quini'ccoma'qque ucca'sho catiya'cho. Toya'caen tise'pa ñoña'cho chigandeccuma'qque oqueya'cho. 6Nane que'ija Na'su que'i Chiga in'jan'cho aindeccu qui. Na'suja poi ande'su aindeccu'su'ye que'ima in'jamba attufaen tisumbeve.

Israendeccuma in'jamba isu'cho

7Na'su Chiga ti'tsse injan'on aindeccuma tta'ttambipa que'i injan'ombi'ma attepa tisumbeve isu. Nane que'ija ñoa'me faesu aindeccuma bove'cco qui. 8Tsa'ma Na'suja que'ima Egiptoni'su sema'jen'cho'ye somboen. Nane tise ñotssia quin'sui'ccu Egipto'su na'su faraónma patsupa que'ima in'jamba ccushaen tise que'i tayopisundeccu'yenga tansintsse su'choma tsoñe.

Currently Selected:

Deuteronomio 7: con

Highlight

Compare

Copy