Deuteronomio 19
19
Andema agatto'choma itsa'masia
14Na'su que'i Chiga que'inga afesi can'jeña'cho andema attufaemba agattopa majambeve canjaeñe tayo ccutsian'cho patuma joqquitssian'fajama faenga'sumbe andema itsaye.
Afopa'choe camba afasundeccu
15Fae camba afa'suja barembi a'i egae tsinconsi tise egae tsincon'choma condaye. Tsa'ma dos, tsambi'ta tres camba afasundeccu fae'ngatsse afapa tsu tise egae tsincon'choma conda'faya.
16Tsa'ma majan afopa'choe camba afa'su faesuma afasepa egae tsincon qquen afopoen'da 17tsu tise, tisenga afaseye'su'qque Na'su Chiganga ccutsu'faya'cho. Nane tsequi a'ta manda'su Chigama afasundeccu, ñoquiansundeccunga'qque ccutsu'faya'cho. 18Tsa'caen ccutsu'fasi tsu ñoquiansundeccuja pa'cco tson'choma pañambe in'jan'faya ma'caen tson'jen'chove. Ñotsse tta'ttapa tsa camba afa'su faesuma afasepa aqquia afopoen qquen in'jan'da 19tsama injama'choma somboeña'cho. Nane tsaja faesuma vanaeñe in'janqquia'caen tsu tisu vanaña'chove antteye. Tsa'caen tsu tsoña'cho que'i aindeccu'su egae tsincon'choma joqquitssiañe. 20Nane cca'indeccu tsane pañamba dyopa tsa'caen afopoeña'bi faesuma dañoñe. 21¡Egae tsinconsundeccuma mende'yejama! Nane fi'tti'suma fi'ttija. Tso'fema daño'sumbe tso'fema somboenjan. Tte'ttoma ucca'sumbe tte'ttoma u'ccaja. Tivema daño'sumbe tivema dañojan. Tsu'ttema daño'sumbe tsu'ttema dañojan.
Currently Selected:
Deuteronomio 19: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
