Daniel 1

Israendeccuma Babiloniani anga'cho

1Joacim Judá na'suve dapa tres canqque'fave Judáma manda'je'ni Babilonia'su na'su Nabucodonosor tise sundarondeccui'ccu Jerusaléni jipa pa'cco Jerusalén canqquema ttu. 2Tsonsi Na'su Chigaja antte cuintsu Nabucodonosor Joacimma patsupa osha'cho Chiga etti'su tasa, apisho'ttoma'qque isupa angaye. Tsa'caen Na'su Chiga anttesi Nabucodonosorja patsupa aindeccuma'qque indipa Babiloniani anga. Toya'caen osha'cho Chiga etti'su tasa, apisho'ttoma'qque angapa tise chigandeccu ettinga boña. 3Toya'caen tsu na'su ettini tisema shondo'su Aspenazma manda cuintsu na'su Joacim dutssiyendeccu toya'caen israe'su ti'tsse'tssiandeccumbe dutssi'ye'suma attufaemba iye. Nane tsa dusungandeccu 4majan ñotssipa, giya'tssipa, injama'pa, ñotsse pañaña'cho, pa'ccoma atesu'chondeccuma isi na'su ettini shondo'je'faye. Tsendeccunga tsu Babilonia'su aya'fama toya'caen tise'pa tayopi'su condase'choma'qque atesiaña'cho. 5Toya'caen tsu na'su Nabucodonosorja manda cuintsu tsa dusungandeccungaja pa'cco a'ta tise na'su anqque'su, tise na'su cuiqque'su vinomeñi ofian'jeñe. Nane tres canqque'fave tsu atesiaña'cho tisema shondosundeccuve daya'cho nepiya'ngae.

Daniel na'su tsaoni can'jen'cho

6Tsa dusungandeccui'ccu tsu can'jen'fa Daniel, Ananías, Misael toya'caen Azarías. Tsendeccuta tsu Judá aindeccu. 7Tsesu inisendeccuma tsu na'su tsa'oma coira'suja ccaningae ini'sian: Danielmajan Beltsasar; Ananíasmajan Sadrac; Misaelmajan Mesac; toya'caen Azaríasmajan Abednegove. 8Tsa'ma Danielja israe'supa na'su anqque'suma amba vinoma'qque cu'ipa tisu in'jan'choma dañosa'ne chi'ga. Tsa'caen in'jamba na'su tsa'oma coira'suma iñajan cuintsu tsesu aña'choma tise'panga afeye mandambe cañe. 9Chiga tisema in'jaensi na'su tsa'oma coira'su na'suja ñotsse Danielma 10can'boemba su:

—Ña ande na'suma gi dyojo. Tise tsu manda cuintsu que'ija tise anqque'suma amba, toya'caen tise cuiqque'suma cui'je'faye. Tsama que'i chi'gapa faesu dusungandeccuma bove paji'suve da'ninda tsu ña na'suja que'ine ñama fi'ttiya.

11Tsa'caen susi Danielja na'su tsa'oma coira'su na'su tise'pama coira'suve manda'chonga afapa qquen su:

12—Ñoa'me gi iñajan aqquia ña suqquia'caen tsoncanjan ingi quema shondosundeccunga. Mandaja cuintsu ingingaja diez a'tave jo'su jonsi shoyoqque'su na, toya'caen aqquia tsa'ccuveyi afe'jeye. 13Diez a'tave tsa'caen jo'su tsesuveyi afe'jepa ingi ai'voma camba faesu dusunga tsa na'su anjen'cho'suma an'jendeccumbe ai'voma'qque canjan. Camba ma'caen atte'ta ingingaja tsesuveyi afe'jeja.

14Tsa'caen su'fasi atesuye in'jamba tise'pama coira'suve manda'choja diez a'ta tsesuveyi afe'je. 15Diez a'ta pasasi tsendeccumbe ai'voja faesu dusunga tsa na'su anqque'suma an'jendeccumbe ai'voma ti'tsse quinsetssipa ti'tsse quin'anme da. 16Tsama attepa tise'pama coira'suve manda'choja anqque'su vinoma'qque afembipa jo'su jonsi sho'yoqque'su na toya'caen aqquia tsa'ccuma afe'je.

17Tsa cuatro dusungandeccunga tsu Chigaja antte cuintsu ñotsse in'jamba pañamba pa'cco tevaen'jeni jinchoma toya'caen pa'cco atesu'choma'qque atesu'faya'chove. Danielja jongoesuma attian'cho, toya'caen jongoesune ayo'ochoma'qque atesu'chove da. 18Na'su naniña'cho a'tave afa'cho nepisi na'su tsa'oma coira'suja poiyi'cco dusungandeccuma na'su dyai'chonga anga. 19Tsa'caen angasi na'suja poiyi'cco dusungandeccui'ccu condasepa jo'su cuatroveyi atte cca'indeqquia'ma ti'tsse'tssindeqquia've. Tsendeccu tsu Daniel, Ananías, Misael toya'caen Azarías. Tsa'caen dapa tsendeccuja na'suma shondosundeccuve ca'ni'fa. 20Pa'cco in'jamba atesuqque'suma na'su iñajampañasi tsendeccuja poiyi'cco Babilonia'su injama'padeqquia toya'caen o'fema camba ma'caen daya'chove atesu'chondeccuma ñoa'me ti'tsse'tsse atesupa conda'fa. 21Danielja tse'ttini can'jen Ciro na'suve dapa mandaya'ngae.

Currently Selected:

Daniel 1: con

Highlight

Copy