2 Reyes 19
19
Na'su Chiga Judáma ccushaen'cho
1Judá'su na'su Ezequíasja tsama pañamba iyicca'yepa tisu ondiccu'jema chi'tta. Chi'ttapa faesu tsincco'cco'je'cco'a sarupama ñoña'cho ondiccu'jema ondiccu tisu ñombi'ye'choma canjaeñe. Tsa'caen ondiccupa Na'su Chiga ettini ja. 2Tseni japa ttu'se cuintsu tise'be na'su tsa'oma coira'su na'su, Eliaquim, toya'caen tayopi'su tson'choma tevaen'su, Sebna, tiseni ji'faye. Poi Chigama afasundeccu, coenzandeccuma'qque ttu'se. Tsendeccuma tsu ttu'se cuintsu tsincco'cco'je'cco'a sarupama ñoña'cho ondiccu'jema ondiccupa Chiga aya'fama afa'su, tsa Amoz dutssi'ye, Isaíasi'ccu bopa condasecco'faye. 3Condaseccopa tsu na'su in'janqquia'caen qquen su'faya'cho: “Ja'ño gi ñoa'me vana'jen'fa. Cca'i ingima noñangiansi gi ansangepa can'jen'fa. Nane pushesu pan du'shuve isuye tson'jemba quin'su me'choe dapa oshambiqquia'caen gi osha'fambi. 4Isha tsu Na'su que Chiga'qque va Asiria na'suma shondo'su aya'fama pañaña. Nane tise na'su tsu tisema moe cuintsu Ñoa'me Cansian Chigama afaseye. Isha tsu Na'su que Chigaja tsama pañamba tsendeccumbe injama'choma somboeña. Chigáne ingi toya can'jensundeccune Chigama iñajanjan.”
5Na'su Ezequías tsa'caen mandasi tisema shondosundeccu na'su su'choma Isaíasnga condasesi 6Isaíasja qquen suye manda: “Qquen tsu Na'su Chigaja su: ‘Asiria'su na'sumbe shondo'su ñama afase'choma dyo'fajama. 7¡Que canjan! Tsoña gi cuintsu Asiria na'su injanga condase'choma pañamba toequi tise andeni jaye. Nane tise tseni jasi gi tsoña cuintsu tsenisundeccu tisema fi'ttiye.’ ”
20Tsomba Isaíasja manda cuintsu Ezequíasnga qquen su'faye: “Qquen tsu Na'su israe'su Chigaja su: ‘Tayo gi paña que'i Asiria na'su Senaqueribma dyopa ñama iñajan'jen'choma.’ ”
32Asiria na'sune tsu Na'su Chigaja qquen su:
“Jerusaléni ca'niña'bi tsu
ni fae battittian'ccoyi'qque tsu battiaña'bi.
Nane tise sundarondeccuja panshaen'jen'choi'ccu catsepa
andema boña'faya'bi canqque ttuccuma panshañe.
33Va canqquenga ca'nimbe'yi tsu
utu tsaiquie'yi toequi jaya.
Ña Na'su gi ñoa'me su:
34Va canqquema gi coirapa ccushaeña.
Nane Tisuja ñotssipa Tisuma shondo'su Davidma
ñotsse in'jamba gi tsa'caen ccushaeña.”
35Tsequi cose tsu Na'su Chigambe sefacconi'su shondo'su japa ciento ochenta y cinco mil Asiria'su sundarondeccuma fitti'tti. Ccaqui a'tasi poiyi'cco tsu papa ccui'fa. 36Tsa'caen pa'fasi Asiria na'su, Senaquerib, jangipa poiyi'cco toya canse'cho sundarondeccui'ccu toequi Níniveni ja'fa.
Currently Selected:
2 Reyes 19: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
