4. Mose 1
1
De Israeliten woaren jetalt
1Daut ieeschte Joa aus de Israeliten ut Ägipten kjeemen, bleewen see en de Sinai Wiltnis. Dan aum 1. Dach von de 2. Moonat en daut 2. Joa, kjeem de Har no Moses, aus hee een Dach en daut Vesaumlungszelt wia, un säd to am: #2Mo 40,17 2Stalt emol faust, wooväl Menschen en daut gaunze Volkj Israel sent. Talt jieda Maun eenseln von de Famieljes un Volkjsgruppen, #1Mo 35,23-26; 2Mo 30,12 3aul dee waut 20 Joa oolt un ella sent un waut fäich sent em Kjrich to halpen. Du un Aaron sellen dee bie äare Volkjsgruppen talen. 4Een Maun von jieda Staum, de väaschta von siene Volkjsgrupp, saul junt doamet halpen. 5De Mana, waut junt halpen sellen, sent Elizur, Schedeur sien Sän, vom Staum Ruben; 6Schelumiel, Zurischadai sien Sän, vom Staum Simeon; 7Nachschon, Aminadab sien Sän, vom Staum Juda; #2Mo 6,23 8Netanel, Zuar sien Sän, vom Staum Isachar; 9Eliab, Helon sien Sän, vom Staum Sebulon; 10un dee waut von Josef staumen: Von Efraim: Elischama, Amihud sien Sän; un von Manasse: Gamliel, Pedazur sien Sän; #1Mo 48,5; 1Chr 7,26 11Abidan, Gidoni sien Sän, vom Staum Benjamin; 12Ahieser, Amischadai sien Sän, vom Staum Dan; 13Pagiel, Ochran sien Sän, vom Staum Asser; 14Eljasaf, Deguel sien Sän, vom Staum Gad; 15un Ahira, Enan sien Sän, vom Staum Naftali. 16Dit wieren dee, dee von mank daut Volkj aunjestalt wieren, aus de väaschte von de Stam, un wieren Leida von de Volkjsgruppen.
17Un Moses un Aaron kroagden dise Mana toop, waut hia oppjerieecht sent, 18un met dee äare Help vesaumelden see daut gaunze Volkj aun dän 1. Dach von de 2. Moonat, un muaken Listen von jieda Maun, waut 20 Joa un ella wia, un no de Volkjsgruppen un Famieljes. 19Soo worden dee en de Sinai Wiltnis jetalt, un daut wia, waut de Har von Moses velangt haud. 20De Nokomen, von Israel sienen ieeschten Sän Ruben, worden no daut Rejista von äare Aufstaumunk, no äare Volkjsgruppen un Famieljes no, biem Nomen jetalt, aula Mana, von 20 Joa un ella, waut fäich wieren toom Kjrich. 21Un vom Staum Ruben worden 46.500 jetalt. 22De Nokomen von Simeon worden no äare Aufstaumunk, Volkjsgruppen un Famieljes no, biem Nomen jetalt, aule Mana von 20 Joa un ella, waut fäich wieren toom Kjrich. 23Un vom Staum Simeon worden 59.300 jetalt. 24De Nokomen von Gad worden no äare Aufstaumunk, Volkjsgruppen un Famieljes no, biem Nomen jetalt, aule Mana von 20 Joa un ella, waut fäich wieren toom Kjrich. 25Un vom Staum Gad worden 45.650 jetalt. 26De Nokomen von Juda worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 27Un vom Staum Juda worden 74.600 jetalt. 28De Nokomen von Isachar worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 29Un vom Staum Isachar worden 54.400 jetalt. 30De Nokomen von Sebulon worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 31Un vom Staum Sebulon worden 57.400 jetalt. 32De Nokomen von Efraim worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 33Un vom Staum Efraim worden 40.500 jetalt. 34De Nokomen von Manasse worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 35Un vom Staum Manasse worden 32.200 jetalt. 36De Nokomen von Benjamin worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 37Un vom Staum Benjamin worden 35.400 jetalt. 38De Nokomen von Dan worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 39Un vom Staum Dan worden 62.700 jetalt. 40De Nokomen von Asser worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 41Un vom Staum Asser worden 41.500 jetalt. 42De Nokomen von Naftali worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich. 43Un vom Staum Naftali worden 53.400 jetalt. 44Dit sent de Mana waut Moses tald, met Aaron un de twalf Staumleida toop, waut äare Volkjsgruppen väastunden. #1Mo 17,20; 25,16 45Un de gaunze Zol von de Israeliten, no äare Volkjsgruppen, dee 20 Joa un ella wieren, un aula fäich wieren toom Kjrich, 46wieren 603.550. #2Mo 12,37; 4Mo 2,32
De besondre Behaundlunk von de Leviten
47Dee waut von dän Staum Levi wieren, worden nich met de aundre toop jetalt.
48De Har haud to Moses jesajcht: 49Du saust däm Staum Levi nich met de aundre Israeliten toop talen aus dee, dee em Kjrich halpen. #4Mo 2,33; 3,15-39 50Du saust de Leviten aunstalen, daut see bie de Woninj met däm Bewies von mienen Bunt, un waut doa nenn jehieet un aul daut Toobehia doatoo, deenen. See sellen de Woninj un aul daut Toobehia droagen un besorjen, un see sellen runtom de Woninj äa Loaga oppstalen. #4Mo 3,23-38; 4,1-49 51Jiedatsmol wan jie met jun Loaga wiedatrakjen, sellen de Leviten de Woninj oppnämen, un wan jie wada jun Loaga oppstalen, sellen see dee oppstalen. Un wan wäa dicht bie daut Zelt kjemt, dee doa nich to bestemt es, dee saul stoawen. #4Mo 3,10.38; 17,5 52Un de Israeliten sellen sikj aula bie äare Armee, un bie äare Flag äa Loaga moaken, 53oba de Leviten sellen sikj rom de Woninj met däm Bewies von mienen Bunt loagren, soo daut mien Oaja nich opp de israelitische Jemeenschoft komen woat. De Leviten sent veauntwuatlich fa de Woninj met däm Bewies von mienen Bunt. #4Mo 17,11; 18,5; Jos 9,20; 2Sam 24,1; 2Chr 19,2; Jes 57,17; 64,4-6 54Un de Israeliten deeden daut aula soo aus de Har Moses daut väajesajcht haud.
Currently Selected:
4. Mose 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.