Spricha 29

Strofen un belieren halpen

1Een Maun dee stieekoppich blift, wan hee belieet woat,

woat plazlich omkomen un kjeene Help haben. #Spr 15,10

2Wan de jerajchte rejieren, freit sikj daut Volkj,

oba wan de ojjerajchte rejieren, stänen de Menschen. #Spr 11,10

3Wäa de Weisheit väl räakjent, moakt sienen Voda froo;

wäa oba met Huaren toop läft, brinjt sien Goot en de Grunt. #Luk 15,13.30

4Derch jerajcht haundlen recht een Kjennich een Launt opp;

wäa sikj oba bekjeepen lat, brakjt daut dol.

5Wäa eenen Noba schmeichelt,

spreet een Nat ut fa däm siene Feet.

6Een beesa Mensch veschlenjt sikj en siene ieejne Sind,

oba een jerajchta sinjt un freit sikj.

7De jerajchte bemieejen sikj de oame rajcht to rechten,

oba de gottloose kjemren sikj nich doarom.

8Spetta räajen eene Staut opp,

oba weise Menschen stellen dän Oaja.

9Wan een weisa Maun met eenen Noa toom Jerecht jeit,

woat de Noa schempen un tooben; kjeena jewent doa waut bie.

10Merdasch sent eenen frommen fientlich,

un proowen dän Opprechtjen doottomoaken.

11Een Noa jeft sikj sienen Oaja gaunz han,

oba een weisa Maun helt sikj trigj. #Spr 12,23; 25,28

12Wan een Volkjsleida no Läajes horcht,

woaren aul siene Deena gottloos woaren.

13Oame un rikje haben dit toop,

de Har haft an beid de Uagen opjemoakt. #Hiob 33,30; Psa 13,4; Spr 22,2

14Wan een Kjennich de oame opprechtich recht,

woat sien Troon emma secha stonen. #Spr 16,12

15De Stock un Vemonunk brinjen Weisheit,

oba een Kjint daut sienen ieejnen Wajch haft, brinjt siene Mutta Schaund. #1Kjen 1,6; Spr 22,15

16Wan de gottloose toonämen, nemt uk de Sind too,

oba de jerajchte woaren seenen, woo dee faulen woaren. #Psa 37,35-36

17Belia dienen Sän un dee woat die Fräd jäwen,

dee woat diene Seel froo moaken. #Spr 23,13

18Wua kjeene Openboarungen von Gott sent,

loten Menschen sikj von nuscht trigjhoolen,

oba jesäajent es dee wäa daut Jesaz helt.

19Een Kjnajcht kaun bloos met Wieed nich belieet woaren,

wan hee daut uk vesteit, hee nemt sikj daut nich aun.

Am mott daut jewäsen uk jelieet woaren.

20Kjanst du eenen Mensch dee doa rät ea hee denkjt?

Doa es fa eenen Noa mea Hopninj aus fa soonem. #Liera 5,1-2; Jak 1,19

21Wäa eenen Kjnajcht von junk aun bekluckat,

woat to goodalatst utfinjen daut hee eenen Sän haft.

22Een oajalicha Maun recht Striet aun;

een hetskopja deit väl sindjen. #Spr 15,18; 22,24

23Eenen Maun sien Stolt brinjt am läach to stonen,

een Maun met eenen deemootjen Jeist woat jeieet. #Mat 23,12; 1Pet 5,5

24Wäa eenen Stäla sien Poatna es, stalt sien Läwen oppet Spell,

wiels hee stell blift wan daut Jesaz am velangt de Woarheit to räden. #3Mo 5,1

25Menschenforcht to haben brinjt eene Schlenj;

wäa sikj opp däm Harn velat, woat secha sennen. #Mat 10,28

26Väle muchten vom Leida jeholpen woaren,

oba bloos de Har haundelt jerajcht.

27Een ojjerajchta Mensch kaun dän jerajchten nich vedroagen;

wäa jerajcht haundelt, kaun de gottloose nich lieden.

Currently Selected:

Spricha 29: PB

Highlight

Compare

Copy

Want to have your highlights saved across all your devices? Sign up or sign in

Learn More About De Bibel