Jona 1
1
Jona kjricht eene Oppgow un rant von dee wajch
1Doa kjeem emol een Dach, wua de Har to Jona, Amittai sien Sän, räd. Un de Har säd: #2Kjen 14,25 2Moak die reed, un go no de groote Staut Ninive, un woarn de Lied, daut see woaren jerecht woaren. Dee sent doa sea schlajcht, un ekj woa daut nich lang dulden. 3Oba Jona stunt opp un meend, hee wudd vom Harn wajch ranen un no Tarsis reisen. Hee jinkj no Jafo un funk een Schepp, daut no Tarsis säajlen wull. Hee betold sien Entretsjelt, jinkj opp daut Schepp un fua auf no Tarsis. Soo wull hee vom Harn wajchkomen. #Psa 139,7.9-10
4Aus see oppem Wota wieren, schekjt de Har eenen stoakjen Wint opp daut Mäa. Een groota Storm kjeem opp an, soo daut see dochten, daut äa Schepp kunn tweibräakjen. 5De Seemana enjsten sikj, un see bäden aula äare Jetta om Help. See schmeeten de Fracht, dee see fieeden, em Mäa, daut et leichta fa daut Schepp wia. Jona wia rauf jegonen em Schepp, haud sikj doljelajcht un wia faust enjeschlopen. 6Dan jinkj de Kapitän rauf un säd to am: Woo kaust du schlopen? Sto opp un bäd dienen Gott aun. Veleicht denkjt dee aun ons, daut wie hia nich aula unjagonen. 7De Seemana eenijden sikj, daut see wudden een Loss trakjen om uttofinjen, wäa von an schuldich fa dit wia. Un daut Loss troff Jona. #Spr 16,33 8Dan fruagen see am: Wuarom sent wie en dise Jefoa? Waut es diene Oabeit? Von wua kjemst du? Von woon Launt un von woon Volkj? 9Un hee säd: Ekj sie een Hebräa un ekj bäd däm Harn aun, dee em Himmel Gott es. Hee haft daut Launt un daut Mäa jemoakt. #1Mo 1,9-10 10Hee säd an uk, daut hee vom Harn wajchrand. Dan enjsten de Seemana sikj ferchtalich un säden: Woo kaust du soont doonen? 11Aus see sagen, daut de Storm bloos oaja wort, fruagen see am: Waut sell wie met die doonen, daut dis Storm emol nojäwen woat? 12Un hee säd: Nämt mie un schmiet mie em Mäa nenn. Dan woat daut stell woaren. Ekj weet daut dis Storm wäajen mie opp junt jekomen es. 13Oba de Seemana vesochten dan noch to roodlen om nom Launt to komen, doch de Storm wort bloos emma schlemma. 14Dan bäden see däm Harn aun un säden: Har, bestrof ons nich, wan wie disen Maun em Mäa schmieten. Lot ons doch nich veauntwuatlich sennen fa een Doot, dän hee nich vedeent haft. Du Har hast met disen Storm doch uk no dienen Wellen jehaundelt. 15Dan neemen see Jona un schmeeten am em Mäa nenn. Un daut Mäa wort stell. 16Dan wieren de Mana met eene groote Forcht fa däm Harn benomen. See schlachten een Tia fa een Opfa un jeewen däm Harn äare Vespräakjen.
Currently Selected:
Jona 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.