Daniel 1
1
De junga Daniel un siene Frind en Babel
1Emol, aus Jojakim en sien dreddet Joa aus Kjennich en Juda wia, kjeem Nebukadnezar, de babelonischa Kjennich met siene Armee no Jerusalem un stald sikj runtom de Staut. #2Kjen 24,1-2 2De Har leet am dän Kjennich Jojakim von Juda, un uk waut von de jeheilichte Sachen von em Tempel, no Babel nämen. Doa oppbewoad hee de Sachen, toop met aundre Sachen dee to dän babelonischen Aufgott sienen Tempel jehieeden. #1Mo 11,2 3De Kjennich säd to Aschpenas, een jeschnädna Deena dee em Paulaust de väaschta wia, daut hee sull israelitische Junges komen loten, dee doa vom Kjennich siene Famielje un aundre leidende Famieljes en Israel wieren. #2Kjen 20,18 4Dit sullen jesunde Junges sennen dee daut goot leet. Dee sullen leicht lierich un een jewesset utjelieet sennen, soo daut see wieda kunnen no de babelonische Oat un en äare Sproak utjelieet woaren, doaropp daut see noch emol kunnen em Paulaust deenen. 5De Kjennich bestald, daut dee sullen krakjt soon goodet Äten un Wien kjrieen aus hee selfst kjrieech. Dree Joa sullen see utjelieet woaren, un dan sullen see em Kjennichshoff aunjestalt woaren. 6Mank dise Junges von Juda wieren Daniel, Hananja, Mischael un Asarja. 7De väaschta vom Paulaust jeef an jieda eenen babelonischen Nomen. Daniel nand hee Beltschazar, Hananja Schadrach, Mischael Meschach, un Asarja nand hee Abed Nego.
8Daniel sach daut fuaz, daut see daut scheene Äten un dän Wien, dee an vom Kjennich sien Desch jeboden wort, no de judsche Jesazen nich äten kunnen. Dan fruach hee däm väaschten, auf see nich brukten daut Äten äten un dän Wien drinkjen, soo aus de Kjennich daut väajeschräwen haud. #3Mo 11,1-47 9Gott holp an, soo daut de väaschta vom Paulaust an proowd entjäajen to komen, #1Mo 39,21 10oba hee säd to Daniel: Ekj kaun nich jrod soo däm Kjennich sien Wuat faulen loten. Wan hee daut seenen wudd, daut junt daut nich soo goot leet aus de aundre Junges von jun ella, dan wudd ekj veauntwuatlich sennen. Daut kunn mie jrod soo goot mienen Kopp kosten. 11Un Daniel säd to däm Äwasechta, dän de väaschta vom Paulaust haud äwa am un Hananja, Mischael un Asarja jesat: 12Proow daut doch emol fa tieen Doag ut. En dän Tiet woa wie bloos Schaublen un Jreens äten un Wota drinkjen. 13Dan Vejlikj ons met dee, dee soon Äten kjrieen aus de Kjennich selfst kjricht. Un dan deist von doa wieda krakjt doano aus du dan sitst. 14De Äwasechta wort doamet envestonen un proowd daut fa tieen Doag. 15Aus de Tiet om wia, leet daut an jesunda un stoakja aus dee, dee daut jejäten hauden waut de Kjennich kjrieech. 16Von dan aun kjrieejen see Schaublen un Jreens enne Städ daut scheene Äten un dän Wien, waut dee aundre toom äten kjrieejen. 17Un Gott jeef dise vea Vestentnis un Weisheit en aules waut see an lieeden. Doatoo haud Daniel uk de Gow Dreem to dieden. #Hes 28,3
18Aus de Tiet fa dise School om wia, soo aus de Kjennich daut bestalt haud, brocht de väaschta vom Paulaust an no Nebukadnezar. 19De Kjennich räd met an un funk mank aul dee, kjeene waut bäta wieren aus Daniel, Hananja, Mischael un Asarja. See kjrieejen dan uk Städen mank däm Kjennich siene aunjestalde. 20Un jiedatsmol wan de Kjennich an no Rot fruach, wua Weisheit un Vestentnis fäld, funk hee daut dise tieenmol bäta wieren aus aule Woasaja un dee waut met de Jeista räden kunnen en sien gaunzet Rikj. 21Daniel bleef em Paulaust bat Kierus Kjennich wort. #Esra 1,1
Currently Selected:
Daniel 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.