Lm 1
1
TNEJEL OQ'E'N (1.1-22)
1¡Tjunalju' nintnam xkyajten,
aj nimtoq xjal toj!
¡Matz'okju' tnejel nintnam kyxol tnam
naku'j qya kyimni tchmil!
¡Jtz'o'nkju' t-xu'jil nimaqkawil kyoj kawb'il
ti'j kuw aq'untl!
2Inxi'x kub' oq' toj qonik'an;
inxi'x b'ilj ta'l twitz kykab'il plaj.
Mix-a'lo'x jun nq'uqb'ante tk'u'j
kyxol kykyaqilju' tajpaj.
Kykyaqilju' tamiw ẍekub' sb'unte;
ex mache ok te tajq'oj.
3Ti'jxi'tlju' k'ixk'oj ex kuw aq'untl,
nyajti Juda ja'lo toju' txi'wb'il.
Aju' ntoq kawin kyxol tnam ojtxi',
atzu'n ja'lo mixti' ojlab'l te.
Makub'ti'j kyu'nju' ljoltoq toj tq'ij
ex b'aj kytxoli'nti'j tu'n mitzaqpaja'.
4¡B'isb'ajilx kyoju' tb'eyil Syon!
¡Mix-a'lo'x jun tu'n tul toju' ninq'ij!
Kyajni leb'anju' tjpel nintnam,
nche oq'ju' pale,
Inche b'isunju' txin
atzu'n Jerusalen toj k'ixk'oj nnik'a'.
5Aye' tajq'oj nche kawin tib'aj
ex xi'kyjaw q'inumax.
Matzaj tq'o'n Dyos tz'e'ysb'il kywitz
tu'n tpaju' nim txqan kyil.
Mache b'ajxq'i'n kyk'wal toj juntl tx'otx'
mache'x q'i'n kyu'n kyajq'oj.
6Mab'ajkub'naj tkyaqil
ju' tilb'ilal Syon tb'anil;
naku'j msatqe' kynejel,
inik'tjoyli kywa kyu'n;
jk'u'n kyqan ljo'n kyb'e
nejlqe' kywitzju' ub'alkye.
7Intzaj tna'n Jerusalen tq'ijlalil ojtxi',
tej tkyejten tjunal ex toj b'is;
ntzaj tna'n tkyaqilju' tq'inumal atitoq
kyoju' tq'ijlalil ojtxi';
ntzaj tna'n tej tkub'ti'j tu'n tajq'oj
ex mix-a'lo'x ul onilte,
e'xmayin tajq'oj ti'j
tej tkub'ti'j kyu'n.
8Nimxi'x til Jerusalen xkub' tb'incha'n
majx matz'el ik'o'n tu'n tpaj.
Matxi' tz'elkyik'o'nju' ntoq che niman te,
qu'n matz'ok kyka'yi'n sel tch'ixaw.
Tu'ntzun tpaju' nnoq'a',
ex matxi tmiltz'u'n twitz tu'n tch'ixaw.
9Tz'ilju' t-xb'alun tu'n taq'wixil;
min ximan ti'ju' tzul tz'aq tib'aj.
Mixti' tnab'en tej tkub' tz'aq;
mix-a'lo'x jun q'uq'b'alte tk'u'j.
¡Nman Dyos, ka'yintza nk'ixk'oje
exju' tninb'iltib' wajq'oje!
10Matxi' che kub'tetza'n ajq'oj
q'inumal toj Jerusalen.
E'til nintnamju' k'lul witzleb'
tej kyokx tzaqpaj toju' ja xjan,
¡aye' xjal tmaya, Nman Dyos,
tu'n miche okxa' toju' ja te b'uyjtib'il!
11Kykyaqilju' najlqe' toj nche oq',
nche elb'aj ti'j kywa;
xikyq'o'n kyq'inumal tet-xel kywa
tu'n txkye kyanmi.
¡Ka'yintza, Nman Dyos, matx chin b'o'lje'!
¡Ka'yintzpe'ya matxi'xi'x chin kub'me'ssa'ne'! chij.
12¡Aye'tzunkye' nche b'ete' toju' b'e,
che tenku' jun kmuje' ximalte
qa ati juntl nik' ti'j kse'nwe',
nxi'x chin kub' yajtiye' tu'n!
¡Matzaj tq'o'n Qman Dyos k'ixk'oj lu wi'je'
tej saj ttx'u'jil!
13Matzajtq'on Qman Dyos jun q'aq' tzmajx toj kya'j
majx ẍe tz'e'y nb'aqile' tu'n;
makub' tq'o'n jun xpatxab' toj nb'eye
majx sanjtlwi'je' tu'n wi'jxi'ye';
majx ẍin kyej tleb'a'ne',
toju' yajb'il atl junjun kmuj.
14Matxi' che til Qam Dyos wile',
machin kub' t-xwaku'ne' toj,
alqe' wib'aje' kse'n iqb'il ti'j tqul wakx
¡majx nchin kub' numje' kyjaq'!
Ma chinx tq'one' Qman Dyos toj kyq'ob' xjal
layx tzik'xtl wu'ne' ja'lo.
15Najchaq ẍe'xa' tlaq'b'a'n Qman Dyos
xjal kuw che q'ojin intoq chin kyklo'ne'.
Mache tzaj tchq'o'n xjal te q'oj wi'je,
tu'n kykub' kyb'yo'n nxjale' kuwxi'x che q'ojin.
¡Matxi' kub' tpch'u'n Qman Dyos Juda ju' tmyal
kse'n nkub' pch'u'n ub'a tu'n tel b'in ti'j!
16Inxi'x chin oq'e' tu'n tpaj ja'lu.
Inxi'x el qojl ta'l nwitze',
mix-a'lo'x jun q'uqb'alte nk'u'je',
mix-a'lo'x jun tu'n tul kuwsalte nk'u'je'.
Mache kyejten nk'wale' toj xitb'il,
tu'n tpaj kuwqe'xi'xju' qajq'oje ex maqo kub'e' kyu'n.
17Nxitjqo'n Syon tq'ob' nxi'x kub'san kse'n jun qya kyimni tchmil,
ex mix-a'lo'x nq'uqb'ante tk'u'j.
Matxi' tchaq' Qman Dyos
tu'n toktxoli'n ti'j Jakob' kyu'n tajq'oj;
matxi' tz'ok Jerusalen kye
naku'j tz'is ex tz'il.
18B'a'nte' xtb'incha Qman Dyos,
qu'n machin okmiltz'uje' kyi'ju' tchaq'b'il.
¡Chin kyb'intze', kykyaqile' tnam;
kyka'yinkye' nk'ixk'oje!
¡K'lo'nqe' nkuxune' ex nqpoje
ẍeb'ajxq'i'n toj juntl tnam!
19Matxi' nqani'ne' o'nb'il kyeju' wajpaje',
aye'tzunkye xi' ẍe okmiltz'uja' wi'je.
Mache kyimu' npaleye'
exqe' ntijwnaqe' toju' nintnam:
¡intoq che joylaj ti'j kywa
tu'n t-xkye ch'i'n kyanmi!
20¡Nman Dyos, ka'yintzju'ya nb'ise'!
¡Inxi'x julky'aj toj nk'u'je'!
Qtanun wanmiye' tu'n k'ixk'oj
ajtkub' nxima'ne' nb'inchb'ene' toj pi'sal.
Toj b'e nche b'yonjtza' nk'wale',
ex ati kamik tzalu toju' tnam.
21Inkyb'i'nkye xjal nchin oq'e',
ex mix-a'lo'x jun nq'uqb'qnte nk'u'je'.
kykyaqil wajq'oje ojtzqilte titi' xb'ajweye',
ex nche tzalaj tu'n xtb'inchaya weye' iku'.
¡B'inchama tu'n tjapunju' tq'ijlalil q'mantl tu'na,
ex tu'n tik' kyi'j kse'nwe' nchinik'a'!
22Japunxwitju' kyil twitza
tkyaqilju' xkyb'incha;
b'inchama kye tu'n tpaj kyil
kse'nxju' xtb'inchaya weye',
qu'n inxi'x chin oq'e' nim;
¡Matx kub'aj wanmiye'!
Currently Selected:
Lm 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999