Jue 1
1
Tzyet Adonisedek kyu'n kyyajajil Juda ex Simeon
1Tkyimlenxi' Joswe, xikyqani'n aj Israel te Qman Dyos tu'n kyb'inte alkye kyyajajil b'a'n tu'n tq'ojin nejtl kyi'ju' aj Kanaan. 2Tzaj ttzaq'we'n Qman Dyos qa a Juda b'a'n tu'n tq'ojin tnejel, ex te Juda tu'n t-xa' q'ona'ju' tx'otx' lu. 3E' ttxoktzun tyajajil Juda tyajajil Simeon, tu'n kymujb'ante kyib' kyuk'i'l ex tu'n tkub'ti'ju' tx'otx' kyu'nju' tetoq Juda, ex tu'n kyxi' junx q'ojil tuk'i'l Simeon tu'n tkub'ti'ju' tx'otx'ju' tetoq Simeon. Kub' toj kywitzju' tyajajil Simeon tu'n kymujb'antekyib' kyuk'i'lju' tyajajil Juda, 4-5Iktzu'n kub'a' ti'ju' kytx'otx' aj Kanaan ex kytx'otx' peresey kyu'n tyajajil Juda, ju' exi' tq'o'n Qman Dyos toj kyq'ob'. Atzu' kub'a'kyi'j junmutx' jo'k'al (10,000) kyu'n toj B'esek, kyxoltzun ja'lu ta'toq Adonisedek. 6Tuk'i'lxi'petzunj kub' oq Adonisedek, kub'nelti'j kyu'n, el kyjonju' tman twi'tq'ob' kykab'il exqe'ju' tman twi'tqan. 7Tmatzun Adonisedek kjalu: El njone' tman twi'kyq'ob' ex tman twi' kyqan oxnaq lajoj (70) nimaqkawil ojtxi', ex e'kub' nq'o'ne' walteju' nwab'e'ne' intoq kub' tz'aq tjaq' nmese'. Atzu'n ja'lo matxi' tb'incha Dyos weye' kse'n nb'inchaye' kye, chij. Xi'tzun kyiq'i'ntz Jerusalen, atzuntzu' kyima'.
Kub'ti'j Eb'ron ex Jerusalen kyu'n tyajajil Juda
8E'q'ojinju' tyajajil Juda ex kub'ti'j Jerusalen kyu'n, kyb'aj kub'lenxi'tzun kyb'yo'n kykyaqilju' xjal najlqe' atzu' tu'n k'uẍtx'e'nb'il, kub' kytz'e'ysa'n nintnam. 9E xi'tzuntz q'ojil kyi'ju' aj Kanaan najlqe'toq kyoj nimaq k'ul, toju' tx'otx' Nekeb' ex toju' plan tx'otx'. 10Ex exi' q'ojil kyi'ju' aj Kanaan toju' nintnam Eb'ron, ju' Kyiryat-arab'a toq tb'i nejtl, ex kub'kyi'ju' Sesay, Ayman ex Talmay kyu'n.
Kub'ti'ju' tnam Deb'ir tu'n Otonyel ex ok Aksa te t-xu'jil
(Jos 15.15-19)
11Exi'tzuntz q'ojil ti'ju' nintnam Deb'ir ju' Kyiryat-seper toq tb'i nejtl. 12Ttziyatzun Kaleb' qa alkye makub'ti'ju' tnam Deb'ir tu'n, oktoq kxe'l tq'o'n Aksa ju' tmyal te t-xu'jil. 13A Otonyel tk'wal Senas ju' titz'in Kaleb' kub'ti'ju' tnam tu'n; xitq'o'ntzun Kaleb'tz Aksa ju' tmyal te t-xu'jil Otonyel. 14Atzunj tponju' Aksa tk'etz Otonyel, kub'ti'j tu'n Otonyel tu'n t-xi' tqani'n ttx'otx' te tman. Tetzunj tka'yinte Kaleb' intoq ku'tzju' Aksa tib'aj tb'ur, xitqani'n te: ¿Ti'tzu'n in b'ajteya? Chij.
15—Wajb'ile' tu'n ttzaj tq'o'na jun ti'xti' weye', matxina' tzaj tq'o'na ntx'otx'e' toj Nekeb', ex ikx q'onqe'tza t-xiklil a' weye', chi tij xittzaq'we'n.
Ku, chi Kaleb', exi' tq'o'n t-xiklil a' te jawtl exqe'ju' te kub'l te.
Kub'ti'j kytx'otx' tnej kyyajajil Juda ex B'enjamin
16E' b'je'tzju' tyajajil Ob'ab', tyajajil tji Moyses, aj Kyenitqe', toju' nintnam Tqan Tut tb'i kyuk'i'lju' tnej tyajajil Juda, exi'tzuntz toj chq'ajlaj te Juda toj tnayajkya'j te Arad, jae'kyaja'ten najal kyuk'i'lju' najlqe' atzu'. 17E'xi'tzu'n tyajajil Juda kyuk'i'l tyajajil Simeon, kse'nx ojetoq kyej b'entti'j kyu'n, ex e'q'ojin kyi'ju' aj Kanaan najlqe'toq Sepat, majxkub' xitju' nintnam lu kyu'n. Qu'mtzun oka' q'on tb'i Orma. 18Aye'tzunju' tnam Kasa, Askalon ex Ekron, minti' kub'kyi'j kyu'n, exqe'ju' tx'otx' kytx'u'kyile. 19Tuk'i'lxipetzunj atitoq Qman Dyos kyuk'i'lju' tyajajil Juda, ex kub'kyi'ju' tx'otx' kywi' nimaq witz kyu'n, minti' b'ent kyexju' najlqe'toq toj chq'ajlaj kyu'n, qu'n ate'toq kykarwaj k'uxb'ilqe'. 20Te Kaleb' xa' q'o'na' Eb'ron, kse'nxju' ojetoq ttziya Moyses te, atzunte Kaleb' eb'jik' t-xla'ja'nju' oxe' tk'wal Anak. 21Aye'tzunju' tyajajil B'enjamin min b'ant kyexju' jeb'usey najlqe'toq toj Jerusalen kyu'n. Qu'mtzun majx e'kyaj najan jeb'us junx kyuk'i'lju' tyajajil B'enjamin toj Jerusalen.
Kub'ti'ju' tnam B'etel kyu'n tnej tyajajil Jse
22-23B'entti'j kyu'nju' tyajajil Jse tu'n kyxi' q'ojil ti'j B'etel, ju' Lus toq tb'i, exi' kychq'o'n jte' ichan ka'yilteju' nintnam lu. Oni'n qe'toq tu'n Qman Dyos. 24Kyiltzu'n nenul jun ichan ntoq etz toju' nintnam, ex xikyma'n te kjalu: Qama tzaj tma'na qeye' se'ntaq'wi tu'n qokx toju' nintnam, qo okyele' b'a'n xjal teya, chechij. 25B'a'natzun, chiju' ichan, xitma'n kye kse'n tu'n kyokxa' toju' nintnam, eb'ajkub' kyb'yo'ntzuntz kykyaqilju' najlqe'toq atzu' tu'n k'uẍtx'e'nb'il, atzunju' xiyek'unte kyokex exqe'ju' toj tja min e'kub' kyb'yo'n. 26Atzunju' ichan lu xi' toju' kytx'otx' tyajajil Et ex tb'incha jun ak'a'j nintnam, ex oktq'o'n tb'i Lus, ex majx kyej tenju' b'iyj lu.
Min kub'kyi'j txqantl nimaqtnam kyu'n kyyajajil Manases ex Eprayin
27Mixti' b'ent kyexju' xjal najlqe'toq kyoj B'et-sean, Taanak, Dor, Ib'leam, ex Mewido kyu'nju' tyajajil Manases, exqe'ju' najlqe'toq kyoju' kojb'il nqayin kyk'etzu' nimaqtnam lu, qu'mtzun e'kyajx najantlju' aj Kanaan kyxol. 28Tetzunj ttenxi'x kyipumal aj Israel, e'okkyq'o'n aj Kanaan toj kuw aq'untl, ex min b'ent tu'n kyex kyxla'ja'n.
29Ex mixti' b'ent kyexju' aj Kanaan najlqe'toq Kyeser kyu'nju' tyajajil Eprayin, qu'mtzun e'kyajx najantl kyxol.
Kub'kyi'j txqantl tnam
30Ex ikx mixti' b'ent kyexju' aj Kanaan najlqe' Kyitron ex Naalal kyu'nju' tyajajil Sab'ulon, qu'mtzun axtzu' e'kyaja' najanju' aj Kanaan kyxol, naq o'kx e'ok kyu'n toj kuw aq'untl.
31-32Ex mixti' b'ant kyexju' aj Kanaan najlqe'toq kyoj Ako, Sidon, Alab', Aksib', Elb'a, Apek ex Reob' kyu'nju' tyajajil Aser; axtzu' ekyaja'ten najal kyxol, qu'n mixnati' b'ant kyex kyu'n kyoju' nimaqtnam lu.
33Ex mixti' b'ant kyexju' aj Kanaan najlqe'toq kyoj B'et-semes ex B'et-anat kyu'nju' tyajajil Neptali; e'oktzun kyq'o'n toj kuw aq'untl, ex e'kyajten najal kyxol.
34Ex mixti' kyaju' amorey tu'n kyku'tzju' tyajajil Dan kyoju' plan tx'otx', axtzu' ekyaja'ten twi' witz. 35Qu'mtzun axtzu' e'najana' amorey t-xe witz Eres kyoju' tnam Ayalon ex Saalb'im. Tetzunj kykuwixju' tyajajil Jse, e'kub' kyq'o'nju' amorey toj kuw aq'untl.
36Xi' xana' kynaqachju' aj Edom tzmax tk'u'ju' witz te Akrab'im ex pomnix Sela, ex xinitzuntz twitz jawl.
Currently Selected:
Jue 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999