Wer pa Solomon 8
8
1Kono yam ibedo omera,
ma idoto cak ki i tuno pa maa.
Ka onoŋo arwatte kwedi i gudo,
onoŋo atwero noto lemi ma ŋat mo pe twero caya.
2Onoŋo atwero telo wii ateri i ot pa maa,
wa i kicika pa en maa munywala-ni.
Onoŋo atwero mini kono yino ma ŋwece kur imato,
ki kono me pig nyig pomegranat mera.
3Kono ateno wiya i kom ciŋe ma lacam,
kun en noŋo okwaka ki ciŋe lacuc.
Wer pa lanyom
4Acikowu matek, wun anyira Jerucalem,
ni pe wuco nyako ma amaro nio ka kare oromo.
5Meno aŋa ma oa ki i tim ma tye ka bino-ni,
ma ojeŋŋe i kom laco ma en maroni?
Acoyo in i kare ma it ye i te yat acuga,
en i kabedo ma meni onywali iye ki arem madwoŋ-ŋi,
i kabedo meno meni munywali-ni obedo iye ki arem madwoŋ,
6Myero imar an keken ki cwinyi ducu,
dok itiŋa i badi macalo gin ma meri kikome;
pien mar tek calo to,
ki nyeko bene ger calo lyel.
Meny calo leb mac ma lyel,
leb mac ma lyel ki tek makato ducu.
7Pe tye pii mo kadi opoŋ madit ma twero balo mar woko,
kadi lalele ma mol matek pe twero mwonyo mar woko.
Ento ka dano mo otemo wilo mar ki lonyone ducu ma en tye kwede i ode,
jo gibicaye matek makato.
Wer pa anyira Jerucalem
8Watye ki laminwa matidine,
tunone pud peya ogulo.
Wabitimo gin aŋo pi laminwa-ni,
i kare ma awobi mo bilok kwede
kun mito ni enyom?
9Ka nen laminwa obedo macalo cel gaŋ,
onoŋo watwero yubo lubele me ryal ma ocudo malo likuŋ i kome.
Ka en obedo macalo doggaŋ,
watwero lorone ki bao me yat cedar.
Wer pa nyako ger
10An abedo macalo cel,
doŋ tunona gubedo calo wi cel ma ocudo malo.
En ŋat ma mara-ni doŋ ŋeyo,
atir ni an ŋat ma kelo kuc,
Wer pa lanyom
11Solomon yam tye ki poto olokke
i kabedo ma gilwoŋo ni Baal-amon.
En oyero lupur me gwoko poto olokke;
ma dano acel acel myero ocul bo te lim me ryal alip acel pi olok mucek iye.
12At ye ki poto olok ma mera kikoma ma tye pira kena;
in Solomon, itwero gamo giri lim me ryal alipacel-li;
ki lupur ma gigwoko olokki ibimiyo botgi lim me ryal miya aryo.
13In ma ibedo i potti,
luwota gimito winyo dwani;
lok wek awiny.
Wer pa nyako ger
14Bin bota oyotoyot, in ma amaro-ni,
bed calo bure
nyo calo wod til ma bedo i wi godi ka ma yadi ma ŋwece kur doŋo iye.
Currently Selected:
Wer pa Solomon 8: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.