Matayo 23
23
Yecu otuco pi can ma bipoto i kom lupwony-cik ki Luparicayo
(Mar 12.38-40; Luka 11.37-54; 20.45-47)
1Lacen Yecu owaco bot lwak ki bot lupwonnyene ni, 2“Lupwony-cik ki Luparicayo gibedo i wi kom pa Moses; 3pi meno lok ducu ma gipwonyowu kwede, wuti dok wugwok bene, ento pe wuti gin ma gin tiyo, pien giloko aloka keken pe gitiyo. 4Gitweyo yec mapek ma yeyone tek, ci giketo i wi gwok dano; ento gin kikomgi pe gitwero dirone ki lwet ciŋgi acel. 5#Mat 6.1; Wel 6.8; Wel 15.38 Gitiyo ticgi ducu ni wek dano onengi; pien giyaro pulakiterigi bedo malac, dok bene gimedo dog boŋŋigi bedo maboco adada, 6dok gimaro bedo i kabedo me deyo i karama, ki bedo i kom me dito i kacokke. 7Dok bene gimito ni dano omotgi wa i cuk-gu, gimaro bene ni dano myero gulwoŋgi ni, ‘Lapwony.’ 8Ento wun pe myero gilwoŋwu ni, ‘Lapwony’, pien wutye ki lapwony acel, pi meno wun ducu doŋ wudoko omege. 9Dok bene pe wulwoŋ dano mo ni wonwu i wi lobo, pien Wonwu tye acel, en aye ŋat ma tye i polo. 10Pe bene gilwoŋwu ni lutel, pien wutye ki latelwu acel, ma en aye Kricito ma Lubaŋa oyero. 11#Mat 20.26, 27; Mar 9.35; 10.43, 44; Luka 22.26 Dano madit ma loyo ki i kinwu aye bibedo laticwu. 12#Luka 14.11; 18.14 Pien ŋat ma kette kene ni edit, gibidwoke piny, ento ŋat ma mwolle kene gibimiyo doko dit.
13“Wubineno can, wun lupwony-cik ki Luparicayo, wun lugoba! Pien wuloro doggola me ker me polo woko bot dano; wun kikomwu pe wudonyo iye, dok bene wugeŋo jo ma mito donyo iye woko. 14Wubineno can wun lupwony-cik ki Luparicayo, wun lugoba! Pien wumayo odi pa mon-to, dok wulego lega maboco me buta keken. Gibiŋolo kop madit makato ducu i wiwu.
15“Wubineno can, wun lupwony-cik ki Luparicayo, wun lugoba! Pien wuwoto wuloŋo piny ki i dye nam kun wuwoto wa i wi tura-gu wek wulok dano acel owek dinine odwog i mewuni, ento ka doŋ olokke, wumiyo doko latin me Geena ma rom aroma kwedwu tyen aryo.
16“Wubineno can, wun lutel dano ma waŋwu oto, ma wuwaco ni, ‘Ka ce dano mo kwoŋo kwoŋ ki ot pa Lubaŋa, lok mo bedo pe iye, ento ka ŋat mo okwoŋo kwoŋ ki jabu ma i ot pa Lubaŋa, kwoŋŋe-ni bimake gire.’ 17Wun lutowaŋ ma lumiŋ! Gin mene ma pire dit kato, jabu nyo ot pa Lubaŋa ma omiyo jabu odoko maleŋ? 18Dok wuwaco ni, ‘Ka ce dano mo okwoŋo kwoŋ ki keno tyer, lok mo pe iye, ento ka ce ŋat mo okwoŋo ki mot ma giketo i wi keno tyer, kwoŋŋe-ni bimake woko gire.’ 19Wun lutowaŋ! Gin mene madit makato, mot nyo keno tyer ma miyo mot doko maleŋ? 20Pi meno dano ma kwoŋo kwoŋ ki keno tyer, kwoŋo bene ki jami ducu ma tye i wi keno tyer. 21Dano ma kwoŋo ki ot pa Lubaŋa, noŋo okwoŋo ki ot pa Lubaŋa kadi wa ki ŋat ma bedo iye. 22#Ic 66.1; Mat 5.34 Dano ma kwoŋo ki polo, noŋo kwoŋo ki komker pa Lubaŋa kadi wa ki ŋat ma bedo i wiye-ni.
23 #
Levi 27.30
“Wubineno can, wun lupwony-cik ki Luparicayo, wun lugoba! Pien wumiyo dul acel me apar me malakwaŋ ki toke ki okwerwu, ento wutenyo lok ma pigi tego me cik woko, gin macalo ŋolo kop atir, timo kica ki bedo jo ma tye ki niye. Magi ducu myero wutim, kun bene pe wuweko mukene ca. 24Onoŋo gitamo ni wun aye myero wubed lutel, ento wun lutowaŋ, pe wuŋeyo gin mo. Wuketo cwinywu i lok ma pe pigi tego, ento wubwoto lok ma pigi tego-gu woko. Meno rom macalo wukwanyo lwaŋo ki i pii amatawu, ento wumwonyo kinaga woko kacel ki pii-nu, pien onoŋo pe wuŋeyo ni tye iye!
25“Wubineno can, wun lupwony-cik ki Luparicayo, wun lugoba! Pien wulwoko ŋe kikopo ki caani ki woko wek obed leŋ, ento ki igi noŋo gupoŋ ki tim me yako dano ki miti mogo ma pe twero jukke. 26Wun Luparicayo ma lutowaŋ! Mukwoŋo myero koŋ wulwok i kikopo ki i caani obed leŋ, ka wek ŋeye bene obed leŋ.
27 #
Tic 23.3
“Wubineno can, wun Lupwony-cik ki Luparicayo, wun lugoba! Pien wurom ki lyel ma gipuyo ki gin matar, kun ki yo tuŋ woko nen maber, ento igi noŋo opoŋ ki cogo pa jo muto, ki jami ducu ma keni keken. 28Wun bene kit meno, ki woko wunen bot dano ni wun jo ma kitwu atir, ento iwu noŋo opoŋ ki gin maraco keken.
29“Wubineno can, wun lupwony-cik ki Luparicayo, wun lugoba! Pien wucano got i wi lyel pa lunebi, ka dok wudeyo kom gin ma yam gigero pi po pi jo ma kitgi atir, wuyubo woko onen maber, 30kun wuwacci, ‘Ka nene onoŋo wabedo i kare pa kwarowa, kono onoŋo pe waribbe kwedgi ka neko lunebi.’ 31Wun giwu wutuco kenwu ni wun likwayo pa jo ma yam guneko lunebi-ni. 32Ber, doŋ wucob tic pa kwariwu! 33#Mat 3.7; 12.34; Luka 3.7 Wun twol, litino ororo, wubibwot niŋniŋ ki i ŋolo kop me bolowu i Geena? 34Pi meno abioro botwu lunebi ki luryeko ki lupwony-cik, ma jo mogo i kingi wun wubinekogi ci wugurogi woko i kom yatariya, ki jo mogo wubigoyogi ki del i kacokkewu, kun wuyelo ki gaŋ ki gaŋ; 35#Acak 4.8; 2 Tek 24.20, 21 wek remo pa jo ducu ma kitgi atir ma ginekogi i lobo obed i wiwu, cakke ki i kom remo pa Abel ma balle pe-ni nio kwede i kom remo pa Jekaria wod pa Barakia, ma yam wuneko i kin kabedo maleŋ ki keno tyer pa Lubaŋa. 36Ada awaco botwu ni, lok man ducu bipoto i kom jo ma gin yalwak me kare man.
Yecu okumo pi Jerucalem
(Luka 13.34-35)
37“Jerucalem, Jerucalem, in ma ineko lunebi, ma icelo jo ma gioro boti woko ki got, tyen adi ma nene amito coko litinoni woko macalo min gweno ma coko litinone i te bwome, ento wun pe wuye giwu! 38#Jer 22.5 Nen, doŋ gitenyo otwu botwu, iye odoŋ nono. 39#Jab 118.26 Atito botwu ni pe wubinena nio ka wubiwacci,‘Gipwo ŋat ma bino i nyiŋ Rwot!’”
Currently Selected:
Matayo 23: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.