Luka 23
23
Yecu i nyim Pilato
(Mat 27.1-2, 11-14; Mar 15.1-5; Jon 18.28-38)
1Lwak ducu gutwarre, gutero Yecu i nyim Pilato. 2Gudote kun giwaco ni, “Dano man wanoŋo tye ka rwenyo rokwa, ogeŋowa ni pe wacul mucoro bot Cecar, kun lwoŋŋe kene ni en Kricito, kabaka.” 3Pilato openye ni, “In i Kabaka pa Lujudaya bo?” Yecu ogamo ni, “Iwaco kakare gire.” 4Pilato owaco bot ajwagi madito pa Lubaŋa ki lwak ducu ni, “Pe anoŋo kop marac i kom dano man.” 5Ento gin gudiye kun giwaco ni, “Dano-nu poyo lwak, kun pwonyo i lobo Judaya ducu, cakke ki i Galilaya nio kwede wa kany.”
Yecu ocuŋ i nyim Kerode
6Ka Pilato owinyo lok man openyo ka gwok nyo Yecu Lagalilaya. 7Ka oniaŋ ni en tye i te loc pa Kerode, ci ocwale bot Kerode, ma en kikome bene onoŋo tye i Jerucalem i kare-nu. 8Ka Kerode oneno Yecu, cwinye obedo yom twatwal, pien onoŋo yam con paro pi nene, pien owinyo pire, dok onoŋo geno ni ebineno lanyut mo ma en bitiyo. 9Omiyo Kerode openyo Yecu ki peny mapolpol; ento Yecu pe omedo ki dok iye lok mo. 10Ajwagi madito pa Lubaŋa ki lupwony-cik gucuŋ i ŋete kun gidote ki tek. 11Kerode ki askarine bene guŋale, gunyware; guruke ki boŋo me deyo, gudwoke kwede bot Pilato. 12Kerode ki Pilato gudoko lurem i nino meno cut, pien yam con onoŋo gimon kekengi..
Giŋolo Yecu kop me to
(Mat 27.15-26; Mar 15.6-15; Jon 18.39–19.16)
13Pilato olwoŋo ajwagi madito pa Lubaŋa ki luloc ki lwak kacel, 14owaco botgi ni, “Wun wukelo dano man bota ni en ŋat ma rwenyo lwak, an apenye i nyimwu, ci nen, pe anoŋo kop mo marac i kome i kom lok ducu ma wudote kwede; 15kadi Kerode bene pe onoŋo, pien Kerode odwoko en botwa. Nen, pe otimo gin mo ma myero gineke pire; 16pi meno abigoye, ci abigonye. [ 17I kare me karama, yam mitte ni myero ogony botgi ŋat acel pigi.]”
18Ento lwak ducu gudaŋŋe lawaŋacel ni, “Tere woko! Gony botwa Baraba!” 19Baraba kono yam dano ma gitweye i mabuc pi tugo lwak i Jerucalem ki pi nek. 20Pilato dok oloko botgi, kun mito gonyo Yecu; 21ento lwak gumedde ki daŋŋe ni “Gure woko i kom yatariya, gure woko i kom yatariya!” 22Pilato owaco botgi tyen me adekke ni, “Piŋo kaa? Otimo kit gin aŋo marac? An gira pe anoŋo kop mo marac i kome ma myero gineke pire; pi meno abigoye, ci abigonye.” 23Ento lwak guwo ki daŋŋe kun gidiye ni myero gigure i kom yatariya. Dwangi oloyo. 24Omiyo Pilato oŋolo kop ni myero gitim Yecu kit macalo gimito. 25Ogonyo dano ma yam gitweyo i mabuc pi tugo dano ki pi nek, ma lwak gubako doggi bote pire; ento omiyo Yecu botgi wek gutime kit macalo gimito.
Giguro Yecu i kom yatariya
(Mat 27.32-44; Mar 15.21-32; Jon 19.17-27)
26Ka gitye ka tere doŋ woko, ci gimako Cimon, dano mo me Cirene ma onoŋo donyo i gaŋ kun oa ki i kin paco, gucibo yatariya i kome, wek otiŋ, olub ki kor Yecu. 27Lwak dano madwoŋ gulube, ki mon mapol ma gikumo kun gikok pire. 28Ento Yecu olokke botgi owaco ni, “Anyira Jerucalem, pe wukok pira, ento wukok piwu kenwu ki pi litinowu. 29Pien nen, kare bibino ma gibiwaco ni, ‘Tye ki gum lulur, kiot nyodo ma pe nywal, ki tuno ma pe gidoto!’ 30#Koc 10.8; Yabo 6.16 Lacen dano biwaco bot godi matino ni, ‘Wupot i komwa’; ki bot godi matino ni, ‘Umwa.’ 31Pien ka gitimo man ma yat pud dyak, bibedo niŋniŋ ka yat doŋ otwo?”
32Jo aryo mukene bene, ma lutim maraco, giterogi wek ginekgi kacel kwede. 33Ka guo i kabedo ma gilwoŋo Cogo Wic, gigure i kom yatariya kunnu, ki lutim maraco, ŋat acel tuŋ lacuc, ŋat acel tuŋ lacam. 34#Jab 22.18 Yecu owaco ni, “Aba, wayi tim kica botgi, pien pe giŋeyo gin ma gitye ka tiyone.” Gubolo kwir pi poko ginarukane. 35#Jab 22.7 Lwak gucuŋ kun gineno; ento luloc guŋale kun giwaco ni, “Yam olaro jo mukene, koŋ olarre kene ka en Kricito pa Lubaŋa, ma en oyero!” 36Askari bene gunyware, gubino gumine koŋo vino mawac, 37kun giwaco ni, “Ka in i Kabaka pa Lujudaya, larre keni!” 38I waraga ma giketo ka wiye, gicoyo nukuta me leb Grik, ki me leb Roma, ki me leb Ibru ni, “Man aye Kabaka pa Lujudaya.”
39Ŋat acel i kin lutim maraco ma giguro kacel kwede ocaye kun waco ni, “In pe i Kricito ma Lubaŋa oyero ce? Larre keni wa ki wan bene!” 40Ento lawote-ni ojuke kun waco ni, “In pe ilworo Lubaŋa, ma kun giŋolo kop i komi kwede ma rom? 41Wan giwa giŋolo kop i komwa kakare; pien watye ka limo cul ma myero, pi timwa; ento dano man pe otimo gin mo marac wacel.” 42Ci owaco ni, “Yecu, po pira ka ibidonyo i kerri.” 43Yecu odok iye bote ni, “Ada, awacci ni, tin wabibedo kwedi i Paradic.”
Yecu oto
(Mat 27.45-56; Mar 15.33-41; Jon 19.28-30)
44Ka cawa doŋ mito romo abicel, piny ocido macol i wi lobo ducu nio wa i cawa aboŋwen, 45#Nia 26.31-33 kun waŋ ceŋ oumme woko; boŋo kicika me ot pa Lubaŋa obar, dyere opokke aryo. 46#Jab 31.5 Yecu odaŋŋe ki dwan matek, owaco ni, “Aba, amiyo cwinya i ciŋi!” Ka owaco lok man, ci oto. 47Ka ladit ma loyo askari oneno gin ma otimme, opako Lubaŋa kun waco ni, “Ada, dano man kara dano ma kite atir!” 48Lwak ducu ma gucokke ka nene, ka guneno gin ma otimme, gudok paco kun gidoŋo korgi. 49#Luka 8.2, 3 Lureme ducu ki mon ma yam gubino kwede nia i Galilaya, gucuŋ ki cen kun gineno gin man.
Giyiko kom Yecu i lyel
(Mat 27.57-61; Mar 15.42-47; Jon 19.38-42)
50I kare-nu onoŋo dano mo ma nyiŋe Yucepu tye kunnu ma oa ki i gaŋ mo pa Lujudaya ma gilwoŋo Arimataya. En onoŋo ŋat acel i kin jo ma bedo i Lukiko, en dano maber, dok kite atir, 51yam pe ocwako tamgi kadi ki ticgi, ento onoŋo kuro ker pa Lubaŋa. 52Dano man ocito bot Pilato, olego pi kom Yecu. 53Okwanye ki i kom yatariya, ci oboye ki boŋo camanini maleŋŋe, ka opyele i lyel ma gikwinyo i got, ka ma peya gipyelo iye kom ŋat mo. 54Nino-nu onoŋo nino me Yubbe, cabit bene onoŋo doŋ cok cakke. 55Mon ma yam gubino kwede nia ki i Galilaya, guneno lyelle, ki kit ma gipyelo kwede kome; 56#Nia 20.10; Nwo 5.14 gudok, guyubo aŋwece ki moo wir.
I cabit, guywe kit macalo cik tye.
Currently Selected:
Luka 23: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.