1 Jo Korint 15
15
Cer pa Yecu Kricito
1Utmegina, amito poyo wiwu i kom lok me kwena maber ma yam atito botwu, ma doŋ wugamo-ni, en bene ma doŋ wucuŋ iye-ni; 2en lok ma wularre pire-ni, ka doŋ wumako matek kit ma yam atittiwu kwede, ka onoŋo pe wuye nono.
3 #
Ic 53.5-12
Pien lok ma nene amiyowu ma pire dit mukwoŋo, en lok ma yam gimiya, ma waco ni, Kricito yam oto pi balwa, kun lubo coc ma yam gicoyo; 4#Jab 16.8-10; Mat 12.40; Tic 2.24-32 dok bene ni giyike, ka doŋ gicere woko i nino me adekke, kun lubo coc ma yam gicoyo, 5#Luka 24.34; Mat 28.16, 17; Mar 16.14; Luka 24.36; Jon 20.19 dok ni yam onen bot Petero, ka dok onen bot jo apar wiye aryo ca. 6Ka dok onen bot utmego makato miya abic lawaŋacel; pol dano mogo i kom jo-nu pud gitye kwo, kadi bed jo mogo doŋ guto woko. 7Dok oturu ki nen bot Yakobo, lacenne onen bot lukwena ducu. 8#Tic 9.3-6 Me agikkine ducu, ci bene onen bota, kadi bed abedo calo latin ma gibwogo abwoga. 9#Tic 8.3 Pien an atidi twatal i kin lukwena ducu, ma onoŋo pe porre me lwoŋa ni an lakwena, pien yam aketo can i kom jo pa Lubaŋa muye Kricito. 10Pi kica ma Lubaŋa omiya en mumiya atye macalo atye-ni; kicane ma tye bota-ni yam pe obedo me nononono. An yam abedo ka medde ki tiyo tic matek twatwal makato jo-nu ducu; ento pe an aye ma atiyo, ento kica pa Lubaŋa aye ma otiyo kacel kweda. 11Doŋ kadi bed onoŋo an nyo gin jo-nu, lok ma wan doŋ watito en ennu, lok ma wun wuye bene-ni en ennu.
Cer pa jo muto
12Doŋ ka lok me kwenawa tito ni gicero Kricito ki i kin jo muto, piŋo jo mogo i kinwu giwaco ni cer pa jo muto pe tye? 13Ka ce cer pa jo muto pe, ci Kricito bene kara pe gicero. 14Ka Kricito yam pe gicero, ci kwena ma watito-ni doŋ yone pe, kadi wa niyewu bene yone pe. 15Medo ki meno, wan bene lucaden me goba i kom Lubaŋa, pien waloko lok i kom Lubaŋa ni en ocero Kricito, ento ka dano pe gicero, ci yam Kricito bene pe gicere. 16Pien ka cero jo muto pe, noŋo Kricito bene yam pe gicero. 17Ka Kricito yam pe gicero, ci kony me niyewu bene pe, noŋo pud wutye i balwu. 18Man doŋ tyen lokke ni, jo muto i Kricito noŋo doŋ gurwenyo woko matwal. 19Ka genwa i kom Kricito konyowa i kwo me kare-ni keken, ci doŋ noŋo watye marac makato jo ducu.
20Ento i adane, Kricito doŋ gicero woko ki i kin jo muto, en tye macalo wi mwaka pa jo muto. 21Pien dano aye mukelo to, dok bene cer pa jo muto dano mukelo. 22Pien macalo dano ducu to i Adam, en i kit yo acel-lu jo ducu gibimiyogi kwo i Kricito. 23Ento ŋat acel acel i kakare: mukwoŋo Kricito, me wi mwaka, ka lacenne jo pa Kricito i kare me dwogone. 24#Kol 2.10, 15 Ka doŋ agikki piny bio, ma Kricito bimiyo iye ker i ciŋ Lubaŋa Won, ma noŋo doŋ otyeko turo kit loc ki twero ki tek ducu me cwiny. 25#Jab 110.1 Pien en myero obed ka loc, nio ka Lubaŋa biketo lukworre ducu piny i te tyene. 26Lakwor ma gibityeko woko me agikki en aye to. 27#Jab 8.6 Pien yam gicoyo ni, “Lubaŋa oketo en obedo lalo jami ducu.” Ka giwaco ni oketo “jami ducu” i te locce, nen ka maleŋ ni pe gikwano iye Lubaŋa kikome, ma oketo jami ducu i te loc pa Kricito. 28Ka doŋ gityeko keto jami ducu i te locce, en Wod kikome bene gibiketo i te loc pa Lubaŋa, wek Lubaŋa doŋ ocok jami ducu i te locce.
29Iyo, ka jo muto pe gibicer, ci doŋ jo ma gibatija pi jo muto-ni gibibedo niŋniŋ? Ka ce cero jo muto pe tye kadi ki acel, piŋo kono dok gibatija pigi? 30Piŋo wan kono wacuŋ ka marac cawa ducu? 31An mera ato nino ducu, utmegina; meno awaco botwu atir, pi wakke ma atye kwede i komwu i Rwotwa Yecu Kricito. 32#Ic 22.13 Ka kono nene alwenyo ki lee mager i Epeco, macalo dano giwaco-ni, kono ki kony mene ma anoŋo iye? Ka cero jo muto pe, ci ber doŋ “wacamu, wamatu, pien diki wabito woko.” 33Pe wuwek gibwolwu: “Bedo ki jo maraco balo kit mabeco.” 34Wudwog cen i tam ma atir ma pe me mero, ci wugik bal woko cut. Pien jo mogo pe gitye ki ŋec mo i kom Lubaŋa. Awaco man wek lewic omakwu.
Kit kom ma dano bicer kwede
35Gwok nyo ŋat mo bipenyo ni, “Jo muto gicerogi niŋniŋ? Gibibedo ki kit kom macalo niŋniŋ?” 36In lamiŋmiŋ! Kodi ma icoyo i potoni pe twero noŋo kwo nio ka doŋ oto woko. 37Gin ma icoyo-ni obedo mere kodi nono, nyo kodi kal, nyo kit kodi mukene-ne, pe en kom ginapita ma bidoŋo-ni. 38Ento Lubaŋa miyo kom ki kodi meno kit macalo yam en oyero, kodi acel acel ki kiti kome. 39Riŋo kom gin makwo ducu pe rom; riŋo dano pat, riŋo lee pat, me pa winyi pat, ki me pa rec bene pat. 40Dok bene tye kom me polo ki kom me lobo; ento deyo pa kom me polo tye ki yone pat, ki deyo pa kom me lobo bene tye ki yone pat. 41Ceŋ tye ki deyone, deyo pa dwe bene mapat, ki lakalatwe-gu bene gitye ki deyo mapatpat; pien lakalatwe bene kitgi patpat, omiyo deyo ma gitye kwede bene tye patpat.
42Tye bene kit meno i kom cer pa jo muto. Kodi ma gicoyo-ni en gin ma top; ento ka doŋ gicero pe dok to. 43Gicoyo ma noŋo deyone pe, gicero ma noŋo deyone tye; gicoyo ma noŋo pud goro, ento gicero ma noŋo doŋ tye ki tek. 44Gicoyo i kom me lobo man, ci gicero i kom me cwiny. Ka kom me lobo man tye, ci kadi wa kom me cwiny bene tye. 45#Acak 2.7 Yam gicoyo ni, “Dano mukwoŋo, Adam, odoko gin makwo”; ento Adam me agikkine odoko cwiny ma miyo kwo. 46Pe kom me cwiny koŋ aye ma kwoŋo bino, ento kom me lobo man, ka doŋ kom me cwiny bino lacen. 47Dano mukwoŋo yam gitiyo ki apwa me lobo, ento dano me aryone oa ki i polo. 48Jo me lobo gicalo dano ma gitiyo ki ŋom; ento jo me polo bene gical ki dano ma oa ki i polo. 49Doŋ macalo waruko cal pa dano ma gitiyo ki ŋom, kit meno bene wabiruko cal pa dano ma oa ki i polo. 50Man aye gin ma aloko botwu, utmegina, ni, gin ma tye ki kom ki remo pe twero leyo ker pa Lubaŋa, gin ma top bene pe twero leyo gin mo ma pe top.
51 #
1 Tec 4.15-17
Koŋ wuwiny muŋ man, ni, pe wan ducu wabito, ento wan ducu gibilokowa woko, 52oyotoyot, pi kare manok mo keken, macalo waŋ ma neno piny litubetube, ka buriji me agikki doŋ bikok. Pien buriji bikok, ka doŋ gibicero jo muto woko kun pe dok gibito, wan bene gibilokowa woko. 53Pien gin ma balle myero orukke ki gin ma pe balle, ki gin ma to myero orukke ki gin ma pe to. 54#Ic 25.8 Ka gin ma balle doŋ orukke ki gin ma pe balle, dok ka gin ma to doŋ orukke ki gin ma pe to, ka doŋ miyo lok ma yam gicoyo obicobbe kakare ni,
“To doŋ gimwonyo woko, giloyo woko matwal.”
55 #
Koc 13.14 “In to, locci doŋ tye kwene?
In to, aremmi kono tye kwene?”
56Arem me to aye bal, doŋ tek me bal aye cik. 57Ento myero wapwoyu Lubaŋa ma miyowa loc pi Rwotwa Yecu Kricito. 58Pi meno, utmegina ma amaro, wucuŋ matek ma pe wuyeŋŋe, kun wumedde bene ki tic pa Rwot nino ducu, kun wuniaŋ ni, i Rwotwa yellewani pe me nono.
Currently Selected:
1 Jo Korint 15: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.