LUKAS 1
1
Yam lawta
Mark 1:1; Lop Ap 1:1-3
1Kay sum segena ŋolo tun caw ɗo labara kay sle ma li jarayna, 2ki nisi sa hay tun cawta pa wi labar namna hiɗi irsiya, nisi sa wulini muɗi si sa sunda vi yoboyna vul labar namna tuma'a nala, 3nan kaw, hay li ma nan fek caw lawt kayni goy hay dira' ma tunna ŋaa fekŋa, ɗuw kiran ŋaa'a kay nan ma ɗom goy hay liyam ɗiger, vulum taŋ naŋu Tewfilus sam-ŋolla, 4kay naŋ ma wi gasita vi hatta ta naŋ hata'ta goy haraŋi.
VU'DA HIƊI WULDA VI YESU
Sunda-wuralawna di labara kay vu'da vi Yohana ma Baptisma
5Hay liyna vi Herod mulla vi Yuda, mul-ma-ɗifinna ay kepe, semda valamu Zakariya, hay jafna vi Abiya, cata valamu hay jafna vi Aaron, semda va' ala Elisabet. 6Nisi ma' kafe ay ɗigere vok ir Lawna, vun-ma-gatna hiɗi dita vi Bum-Sumuna kaf nisi poy kuɗum ŋaa'a ŋolo. 7May guro visi sayɗi, kay Elisabet ay getiya, nisi ma' kaf busata visi kalay ŋolo.
8hay fat tara kep Zakariya ka li lop ɗifinna vok ir Lawna, kuɗ vurnata vi vokŋa valamu, 9Ŋaɓta nig kalamu, kuɗ gatta vi lop ma ɗifinna, kay nam ma kal kalaf hay Tempella ŋal urdina. 10Sumun kaf ka tokay goy jiya hay leer ma nam ka ŋal urdina. 11Sunda-wuralawna vi Bum-Sumuna vul tuwam kiramu, col hay gal ma jufna vi giwin-ma-ɗifinna ma ŋal urdina. 12Hay li ma Zakariya wi sunda-wuralawna, sukam yaw kelemu, narta vumu. 13May sunda-wuralawna dumu: laŋ narɗi Zakariya, kay Lawna hum siɗawta vaŋawa, cata vaŋu Elisabet ma vuɗaŋ gooro, naŋ ma yum semda valam ala Yohana. 14Nam ma laŋ dikaŋ firi ŋolo, ma sleɗaŋ hayaŋu kaw, sumun ŋolo ma li firiya kay vu'da valamu. 15Kay nam ma muɗ ŋolo vok ir Bum-Sumuna, nam ma ci vinɗi, ci dolay ma galakŋaɗi kaw, nam ma hob hiɗi Ŋusta-Peldetta tun caw kalaf hay sulumi pa. 16Gurona vi Israyel ŋolo nam ma hotsiyay tam Bum-Sumuna Lawna visiya. 17Nam ma poy vok iramu hiɗi Ŋusta hiɗi donota vi Eliyas, kay hot dik guron ay kat sumaysiya, kay hot sa ŋel gatta ay kat yalla vi sa ɗigera, kay kot mi Bum-Sumuna sum sa diksi koti ŋaa'a. 18Zakariya di tam Sunda-wuralawna: Kayni nan ma wum goy gasi ɗawn witige? Kay nanu sa ma muɗi maari, cata van kaw busata va' kalay ŋolo! 19Sunda-wuralawna hot dit talamu: Nanu mi Gabriel, nanu mi ma colay vok Lawna; nam ganiya kay law taŋu, kay vaŋ labar namna ma ŋaan kayni. 20Humaŋu, naŋ ma muɗ gidiŋi, naŋ ma lawɗi ta-ta van kayni li tuwa, kay yoboyna vanu ma vunam min hob hay liy namna ɗawni, naŋ min vi kuɗumɗi.
21Hay na'ta sumun ka dakay goy jiya kay cub Zakariya, nisi muɗi ɦuyum' kay nam vi yalamay hay Tempella. 22Hay li ma nam kalay goy jiya, nam as law tisi noŋɗi, kay na'ta nisi wi ala va vul tuwamay kiram hay Tempella; nam tun caw ɦiwetsi hiɗi ɓalamu, mus hay gidiŋga.
23Van li nala, hay li ma buura ma lopna valamu vatawa, nam kalay vutoŋo. 24Bugol buur neeɗa kayni, Elisabet cata valam sli haya, na' ŋay tuwa' ir til vasl, na' di'e: 25Kayni mi va ma Bum-Sumuna lum tanu, kay nam varawa kay yaw zulota ta kan jar sumuna goyo.
Sunda-wuralawna vul labara kay vu'da vi Yesu
Mat 1:18-23
26May hay til ma karkiyana, Lawna gi sunda-wuralawna valamu Gabriel ay sunu hay hoyok-ziyna vi Galileya ma yum Nasaret, 27tam goot-cata ta daray kay sa ma semda valamu Yosef, hay jafna vi David, goot-cat na'ta semda va' ala Mariya. 28Sunda-wuralawna kalay kalafi di ta'a: gag deɓe, naku ta fi slugotawa, Bum-Sumuna ka hiɗi naku. 29Na' muɗ nar ŋolo kay yoboyn kayni, na' ka job tuwa' ala gi-deɓta ta ki kayn nala min ɗek mige? 30Sunda-wuralawna di ta'a: Lag narɗi Mariya, kay nak fi slugotawa vok ir Lawna. 31Humagu, nak ma sli haya, nak ma vuɗ goora kaw, nak ma yum semda valamu ala Yesu. 32Nam ma muɗ sa ma ŋolla, nisi ma yum ala goora vi ma Kulo-Jamna, Bum-Sumuna Lawna ma vulum zlamda-mulda vi bulum David. 33Nam ma mus mulu kay jafna vi David ta-ta hay vatɗita, mulda valamu ma vat goy noŋɗi. 34Mariya di tam sunda-wuralawna: van kayn li ɗawn ir nanige, kay nan bay bur tam sa juf tuwa? 35Sunda-wuralawna hot dit ta'a, Ŋusta-Peldetta ma co kagu, donota vi ma Kulo-Jamna ma li kag ŋusu. Kuɗ na'ta kayni goor ma vuɗna ɗawni ma yum ala goora vi Lawna. 36Humagu, sugolokga Elisabet ta ay getayta slaawa haya, hiɗi maarta va' pet na' ka haya hiɗi goor ma jufu, wulini liy til karkiya. 37Kay va ma Lawna as a liɗi mayɗi. 38Mariya di'e: Nan gorvota vi Bum-Sumuna zawni, va ma li tanu kuɗ yoboyna vaŋ lige. Sunda-wuralawna hina'a, kaliya may.
Mariya kalay ɗuw Elisabet, nulla vi Mariya
39Hay buur na'ta kayni, Mariya fokay kulo'o, na' gos tuwa'a, kalay gal hiɗiyna hay hoyok-ziyna vi Yuda. 40Na' kal kalaf hay ziyna vi Zakariya, na' gi deɓ mi Elisabet. 41Hay li ma Elisabet hum gi-deɓta vi Mariya kayni, goora geɗ haya'a. Elisabet hobay hiɗi Ŋusta-Peldetta, 42na' ka siwel hiɗi dela' kulo ŋol ala: Jar boyna bolda ka kagu, bolda ka kay jaf ma hayagŋa kaw. 43Nan ti gige a sum Bum-Sumuna vanu co hay ziyna vanu? 44Kay humag tige, hay li ma nan hum gi-deɓta vagu, goora geɗ hayanu hiɗi firita. 45Sle'ta ka kay na'a ta vi ala slen ma Bum-Sumuna dum ta'na vunam ma hoba.
46Mariya di'e:
Ciwta vanu subur Bum-Sumuna,
47ŋusta vanu li firiya hay Lawna ma su'da vanu.
48Kay nam cuk iramawa kay maŋayta vi ta gorvota valamu.
Kay humagu, vok ɗawn jaf-sumuna kaf ma yan ala:
Ta sle'ta ka'ta.
49Kay nam ma gaŋeraŋa li sle ma ŋulonawa tanu,
Semda valamu Peldete.
50Slugota valamu tam jaf hen pa ta-ta tam jaf mara'a lo,
kay nisi sa li nar kuɗumna.
51Nam meɗ ɓalam ma dononawa goyo,
Nisi sa ka hiɗi varta vi subur-tuwta hay diksiya,
Nam mersiyawa goyo.
52Sa muliyana nam digiɗsiyawa goyo
Hay zlamda-mulda visiya,
sa hawna nam muɗsi goy sa ŋulona.
53Sa mayt cisina nam hobsiyawa hiɗi slen ma ŋaana,
sa galapna nam hotsiyawa goy hiɗi
bisi ɦawa kiɗaŋ-kiɗaŋ'.
54Nam gutawa kuɗ sa sunda valamu sa Israyella,
humam gumawa kay slugota ŋolda valamu.
55Ki nam di tam sumiyaya nala,
tam Abraham hiɗi jafna valamu kay dok-doko.
56Mariya musi hiɗi Elisabet ir til ɦidi, bugol kayni na' hot vo hay ziyna va'a.
Vu'da vi Yohana ma baptisma, Nulla vi Zakariya
57May liyna vi pukka vi Elisabet coowa yo, na' vuɗ goor ma jufu. 58Sa ziyna visi hiɗi na'na hiɗi sa hay jafna va'a hum ala Bum-Sumuna li slugotawa ŋolo ta'a, nisi tok tuwsi ta'a kay li firiya. 59Hay buur ta glafandita, nisi co'o kay ka goora gosaya, nisi yum ala Zakariya kuɗ semda vi bulumu. 60May sulumu hot dita: Naɗi, semda valam ala Yohana. 61Nisi da'a: Sa ma hay jafagu ma semda valamu nala mayɗi. 62Nisi ɦiwet bulumu hiɗi ɓisiya kay nam ma vul semda valamu. 63Nam jobsi la nisi ma vulum ɗerwel kepe. Nam ɗo hay ɗerwelda ala: Semda valamu Yohana. Nisi kaf muɗ ɦuyum'. 64Wulini wulini vunam mun til', sinam muɗi di'e kaw, nam tun caw lawa, subur Lawna kaw. 65Sum sa hay naga ma goboy hiɗi liy namna narta visiya, kulo kay hiɗiyna vi Yuda kaf sumuna muɗ ka kasla kayn hiɗi law namna. 66Sum sa hum labar namna ŋom lawt kayni kaf hay diksiya, nisi di'e: goor kayni ma muɗ nanige? Kay ɓam Bum-Sumuna ay hiɗi namu.
67May bulum Zakariya hobay hiɗi Ŋusta-Peldetta, nam di yoboyn kay sle ma vokomna ala:
68Suburta ka kay Bum-Sumuna Lawna vi Israyel,
Kay nam ma tam sumuna valamu,
Suɗsi goyo.
69Nam maray butta-goyta ŋoldawa,
Hay ziyna vi sa ma sunda valamu David.
70Ki nam di hiɗi vun sa jobta valamu
sa peldetna sa ay jew ɓa-ɓana nala.
71Kay butay goy hay ɓam sa gawta kayna,
Sa ka li ɦeɗem taya kaw.
72Kay li slugota tam sumiyaya,
Kay humam jak kay bonota valamu ta peldetta.
73Kuɗ va ma nam yi slen kalamu
Tam buy Abraham pa,
74Kay suɗay goy hay ɓam sa gawt kayna,
kay muɗay a sunum bay-narta kaw.
75Kay girifimu hay peldetta hiɗi ɗigerta,
Vok iramu buurta irita vay kaf.
76May naŋu goor ma goora,
Nisi ma yaŋ ala sa ma jobta
vi Lawn ma Kulo-Jamna,
Naŋ ma tun vok Bum-Sumuna kay par
hagata valam goyo,
77Kay hat sumuna valamu a wi su'da
Hay gida vi sulukŋa visiya,
78Kayni kuɗ slugota ŋolda vi Lawna vaya.
Kuɗ slugota ŋolda valamu,
nam hin fatta daya kay poy kulo kaya,
79Kay li haraŋ kay nisi sa ka
lakay hay jufunda,
hay ŋus-mitta kaw,
Kay cukay gayay hay hagata vi toyta.
80May goora wuliya, muɗ dono'o hay Ŋusta. Nam mus goy hay fulda ta-ta hay buur ma nam col goy vok sa Israyella.
Currently Selected:
LUKAS 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001