FILIPINA 2
2
1La teŋ-irta tara ka hay Kristu, la so-tuwta hay minda ka'a, la tapta vi ŋusta ka'a, la kir-hawta hiɗi ti-kamda ka'a kaw, 2hobgi firita vanu kulo'o, hay varta vigi ta tapay kepta, ti-kamda vigi kep, tapta vi dikga hay varta kep, var kay va na kepe kaw. 3Li va kay ci-wayta lebo kay suburta ɦawaɗi, may hay hot yamda gaata, nigi ma ɗuw segena ŋolo suwgi nigiya. 4Sa gigekaw jargiya, a nam ɗuwum ŋaan mi slena valamu ni, ŋaat kayn nam ma ɗuw slena vi segena ŋaa lay. 5Varta ta ay hay Kristu Yesu nigi ma va' haygin ti na'a, 6nam ma tuwam ay ŋiray hiɗi tuw Lawna, may nam gar a mus dok-dok ŋray hiɗi Lawna kuɗ donota valam kay tuwamɗi, 7may nam hin tuwam goy kay tuwamu, hin tuwam muɗ goy gorvo'o, hay li ma nam hin tuwam muɗ ki sumuna nala, kayn hay li ma nam muɗ sli tuw sana nala. 8Nam hot yalam gaa'a, hum vun kaw ta-ta co tam mitta, mitta kay gu-ma-grakŋa. 9Kuɗ na'ta kayni Lawna vulum mulda ta ŋolda, vulum semda ta ka kulo kay semda kaf kaw, 10kay hay semda vi Yesu, ŋulof kaf ma hay wuralawna, ma kay nagata, ma gaa kuɗ nagata kaw ma ɦirik gaa'a, 11Vunna kaf ma di goy ala Yesu mi Bum-sumuna, tam gajijita vi Lawna Bumna.
12Nala, sa hayan kigina, ki nigi hum vunawa dok-dok nala, ligi lopna kay su'da vigiya, kuɗ ta ala nan ay jargiyaɗi, may hiɗi wulin kaf ma nan may jargiɗin kaw, nigi ma lum hiɗi narta hiɗi wiirta kaw. 13Kay li minda hiɗi lita lopna haygi kayni mi Lawna kuɗ varta ŋaata valamu.
14Ligi slen pet bay ŋurnaya, bay ci waya kaw, 15kay a nigi lak bay joota, bay liwista kaw, gurona vi Lawna sa bay joota jar jafna ma gunina, ma joona kaw, jarsiya nigi ma wile ki haraŋa kay nagata nala, 16hay li ma nigi di goy kay yoboyna vi irita. Kayni ma lin mi suburta kanu hay fatta vi Kristu, kay nan jaŋa, mak tuwan kaw kayn sur waaɗi.
17May la tuwan vuli goy ɗifini kay ɗifinna hiɗi lopna vi vida vigiya kaw, nan firi kay kayni, firiya hiɗi nigi kaf kaw; 18nigi nala kaw firigiya, firigiya hiɗi nanu.
Labara van kay tuwanu
1 Tes 3:1-11
19Nan ka var hay Bum-sumuna Yesu kay gi Timotewus ays tigiya, kay nan kay tuwanu ma fi teŋ-irta hay li ma nan hum labara vigiyawa; 20kay sa mara tani ma ɓuraw varta valamu hiɗi nanu, ma as var kay lawta vigi kaw mayɗi; 21kay nisi kaf garam mi slen ma lisi ŋaana, may ma vi Kristu Yesunɗi. 22Nigi kaw wi ala nam ɗek tuwam goyo, ki goora ma ka goboy tam bulum heb' nala, nam vul tuwamawa goyo hiɗi nanu hay sunda vi labara ma firina. 23Namu, nan ka var kay gumis tigiya, hay li ma nan wi caw liyn ma nan ka haynawa goy wina; 24lo tap-wida van ka hay Bum-Sumun ala, la musawa neeɗa, nan kay tuwan ma coys tigiya.
25Wulini nan ɗuw ŋaa'a kay gi Epafroditus ays tigiya, namu mi ɓasunna, niranna ma hay lopna, ma hay duura kaw, ma nigi sunumay tanu, nam ma nigi vulan slen ma ŋom ŋil tuwanna ay kalamu; 26nam gar hiɗi dikam kaf kay wigi kafe, kay dikam may tun suk noŋɗi kay humda ma nigi hum kay moyna valamu. 27Gasi, nam ay moyo, goboy tam mitta kaw; may Lawna li slugota kalamu, may kalam nam kepɗi, may kan nan kaw, kay nan ma fi yorta mara' mara'aɗi. 28Kay na'ta nan gumis koloy wit', kay nigi ma firiya hay li ma nigi wumawa lo, nan kaw ma fi yorta kiɗaya. 29Nigi ma vum kuɗgiya hay Bum-Sumuna hiɗi firita ta ŋolda, sum sa ki kayn nana nigi ma slisi yisi kulo'o; 30Kay kuɗ lopna vi Kristu nam ay goboy vun mitta, hay li ma nam vul irita valam goy hay baŋalgiya kay sunanu.
Currently Selected:
FILIPINA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001