ŊAƁTA 10

Togolom ma doorona doogo

1Ma-Vatɗina di tam Musus ala: 2kotaŋ togolom ma dooron ma', naŋ ma kotom hiɗi dooro ma yorayna. Lopna vi togolom namna kayn kay buwumu kay yi sumuna hay li ma nigi min joka. 3Hay li ma togolomna buwawa, sumun kaf ma tok tuwsi kataŋu, goy vun guɗuk ma fi-tuwna. 4La naŋ buw togolomna vunaŋ kep ɦawa, tok tuwsi taŋ ɗawn si yerimana, sa ŋulona kuɗ jafna vi Israyel. 5La togolom buw kayn ciriyn ka kuɗumu, nisi sa guruna visi viy hay gal ma kuɗuwn ma pat kulo'o; 6la togolomna buw sem ma ma'na lo hiɗi ciriyn kuɗumu, nisi sa guruna visi viy hay gal ma kayamna ma pat kulo'o; nigi ma buw togolomna hiɗi ciriyn kuɗumu kay nisi ma tuɗa. 7Nigi as kay buw togolomna kaw kay yi tokŋa, may buw namna nigi as pat ciriy kuɗumɗi. 8Gurona vi Aaron sa muliyan-sa-ɗifinna ma buw togolomna. Gat na'ta kayni hini dok-dok tigi nigiya, tam jafna vigi ma bugolgin kaw. 9Hay li ma nigi min yaways hay nagata vigi pa kay tuɗ dur sa gawt kigina, nigi ma buw togolomna hiɗi ciriyn kuɗumu, nala nan Ma-Vatɗina Lawna vigiya, human ma gan kigiya, nan ma butgi goy hay ɓam sa gawt kigina. 10Hay buura vigi ma firina, hay yuldena vigiya, hay vun til ma wulina vigiya kaf, nigi ma buw togolomna, nigi ma li ɗifin ma ŋal-goyna hiɗi ɗifinna vi lop ma slugona, nala Lawna vigiya humam ma gum kigiya. Nanu mi Ma-Vatɗina, Lawna vigiya.

Nisi hin Sinay, kaliya

11Hay buur ma dok-ma'na vi til ma ma'na vi busata ma'ta, ɗugulla poŋ kulo'o kay tabernaklena vi di-goyta. 12Gurona vi Israyel kalay goy hay fulda vi Sinay pa, tuni kay tuwsi ki hagat vuli tisi nala. Ɗugulla col kulo'o kay fulda vi Paran. 13Hay tuɗ na'ta ta jewt kayni, nisi tuni kay tuwsi ki Ma-Vatɗina vul hagata tam Musus nala. 14Drapota vi gurona vi Yuda kal vok jewe, hiɗi vok-ma-duura visiya. Vok-ma-duura vi Yuda tuni vokom kayni mi Nahson goora vi Aminadab; 15vok-ma-duura vi jafna vi Isakar tuni vokom mi Netaneel goora vi Suwar; 16vok-ma-duura vi jafna vi Zabulon tuni vokom kayni mi Eliyab, goora vi Helon.

17Nisi but tabernaklen gaa'a, gurona vi Gerson hiɗi gurona vi Merari kaliya, nisi ka ziy tabernaklena. 18Drapota vi jafna vi Ruben kaliya, hiɗi vok-ma-duura visiya. Vok-ma-duura vi Ruben tuni vokom mi Elisur, goora vi Sedewur. 19Vok-ma-duura vi jafna vi Simeyon tuni vokom mi Selumiyel goora vi Suriskaday; 20vok-ma-duura vi jafna vi Gad tuni vokom mi Eliyasaf, goora vi Rewel,

21sum sa Kehatna kaliya, nisi ka ziy guɗuk ma peldetna, jew cota visi kayni, sumun vi tabernaklen kulo'o. 22Drapota vi jafna vi Efrayim kaliya, hiɗi vok-ma-duura visiya. Vok-ma-duura visiya tuni vokom kayni mi Elisama, goora vi Amihud; 23vok-ma-duura vi jafna vi Manase tuni vokom kayni mi Gamliyel, goora vi Pedatsur. 24Vok-ma-duura vi jafna vi Benyamin tuni vokom mi Abidan, goora vi Gidewni.

25Drapota vi jafna vi Dan kaliya, hiɗi vok-ma-duura visiya, nisi kayni mi vok ma ka tuni ŋom liyn ma cawna vi segen noŋ kafe. Vokŋa vi Dan tuni vokom kayn mi Ahiyezer, goora vi Amiskaday; 26vok-ma-duura vi jafna vi Aser tuni vokom kayni mi Pagiyel, goora vi Okran, 27vok-ma-duura vi jafna vi Neftali tuni vokom kayni mi Ahira, goora vi Enan. 28Jafna vi Israyel kal kayni, nisi tuni kay tuwsi ki kayn nala, tuni kay tuwsi kuɗ vok-ma-duura visiya visiya.

29Musus di tam Hobab, goora vi Rewel ma Madiyanna kuno Mususna, nam dum ala: Nay tuɗay hay nagat ta Ma-Vatɗin di ala nan min vulgita. Tuɗaŋ hiɗi numa'a, numa ma laŋ ŋaa'a. Kay Ma-Vatɗina col dita valam ala nam ma li ŋaat mi Israyel. 30Hobab hotom dit ala nan min tuɗisɗi, may nan tuɗ ɗawn hay nagata van ta nan vuɗ haya'ta. 31Musus hot dumu: Nan siɗawaŋu, naŋ ma hinmaɗi; liyn ma numa vi guɗukŋa vuma hay fulda kayn naŋ wumu, nala naŋ ma tun vokma kay ɗekma'a. 32La naŋ na hiɗi numa'a, numa ɗawn ma sleɗaŋ hayaŋ hiɗi ŋaat ta Lawn ma la' tuma'ata.

33Nisi yaways kay hiɗiyta vi Ma-Vatɗin pa, nisi tuɗ ir buur ɦidi; timgilla vi bonota vi Ma-Vatɗina ka tuni voksiya, nisi tuɗ ir buur ɦidi kay gar liyn ma fi tun-sukŋa. 34Ɗugulla vi Ma-Vatɗin ka kulo kisiya hay falayta, hay li ma nisi yaways goy hay gurun pana.

35Hay li ma timgilla tun caw tuɗa, Musus di'e: Fokaŋ kulo'o Ma-Vatɗina, meraŋ sa gawt kaŋŋa goyo, nisi sa kaŋ gawna mun vokaŋ jaŋ munge! 36Hay li ma nisi tun timgillawa gaa'a, nam di'e: Ma-Vatɗina, sumuna vi Israyel ir gu' gu' diram birim gaage gaage tani hotaŋay jarsiya.

Currently Selected:

ŊAƁTA 10: Massana

Highlight

Copy

Compare