SA LEVITNA 18

Sli-yamda kulota vi slita, gatta mara'a mara'a kay poora

1Ma-Vatɗina di tam Musus: 2Naŋ ma di tam gurona vi Israyel ala: Nanu mi Ma-Vatɗina Lawna vigiya. 3Nagat Egipte ta nigi ay haya' ziy jewt kayni, sle ma sum sa haya'n lumna nigi ma lumɗi, nagat Kanaan ta nan nargi haya'ta ɗawn kaw, sle ma sum sa haya'n lumna nigi ma lumɗi, ligi kisi nisi nala noŋɗi. 4Nigi ma li kuɗ sle ma nan digitna, nigi ma vi gatta van kulo kigiya, nigi ma tap kuɗa'a, nanu mi Ma-Vatɗina Lawna vigiya. 5Nigi ma li kuɗ gatta vanu hiɗi sle ma nan digitna, sa ma ŋom gatta na'tawana ma mus iriya. Nanu mi Ma-Vatɗina.

6Sa jargiya ma tuɗ tam sugolomta kay wi nalata va'ɗi. Nanu mi Ma-Vatɗina. 7Sa jargiya ma gar kay sar nalata vi bulumɗi kaw. Kay na'ti suŋu, naŋ ma sar nalata va'ɗi. 8Naŋ ma gar kay sar nalata vi cata vi buŋɗi, kay kayni ti nalata vi buŋ kay tuwa'a. 9Ɓasuŋga, goota vi buŋu lebo suŋu kaw, la na' vuɗ vo hay ziyna lebo goy jiya kaw, naŋ ma gar kay sar nalata va'ɗi. 10Goor-ŋolona vaŋu lebo goor-ŋolota vaŋ kaw naŋ ma gar kay sar nalata visiɗi. Kay kayni ti nalata vaŋ kay tuwaŋu. 11Goota vi buŋ ta cata valam vuɗa'ta, naŋ ma gar kay sar nalata va'ɗi, kay na' ti goor-buŋga. 12Ɓasum buŋga naŋ ma gar kay sar nalata va'ɗi, kay na' ti sugol buŋ vuɗita. 13Ɓasum suŋga naŋ ma gar kay sar nalata va'ɗi, kay na' ti sugol suŋ vuɗita. 14Ɓasum buŋŋa naŋ ma gar kay sar nalata valamɗi, naŋ as bur tam cata valam noŋɗi, kay na' ti suŋu. 15Cata vi goora vaŋu naŋ ma sar nalata va' noŋɗi, kay na' ti kunoŋga. 16Cata vi ɓasuŋŋa naŋ ma sar nalata va' noŋɗi, kay kayni ti nalata vi ɓasuŋŋa. 17Naŋ ma sar nalata vi sumda hiɗi goota va' layɗi, naŋ ma sli goor-ŋolona hiɗi goor-ŋolota va'a kay sar nalata visiɗi. Kay nisi kayn si sugoliyo' sa vuɗina. Kay kayn yawi. 18Hay li ma cata vaŋ ka iri tuwana, naŋ ma sli ɓasu'taɗi, kay kayni mar cirepta.

19Hay li ma cat ka hiɗi busuwn ta'a, naŋ ma gar kay tuɗ ta'a kay ɗuw nalata va'ɗi. 20Naŋ ma li cile hiɗi cata vi sugoloŋɗi, naŋ ma muɗ tuwaŋ liwis hiɗi na'ɗi. 21Naŋ as kay vul goor vaŋ goy kep kaw mi Molok#18:21 Molok Lawn ma waana vi sa Kanaaniyana, ceɗi mi guna, nisi li ɗifin talamu hiɗi gurosgurayna. Ɗuwgi hay Gsm 18:10; 2 Mul 23:10; Yer 32—35; Ezek 16:21. noŋɗi, naŋ ma muɗ semda vi Ma-Vatɗina Lawna vaŋ goy liwisɗi. Nanu mi Ma-Vatɗina. 22Naŋ ma bur hiɗi sa jufna ki san bur hiɗi cat nalaɗi. Kayni mi liwis ma ŋolo. 23Naŋ ma bur tam faraya kay muɗ tuwaŋ liwis hiɗi namɗi. Cat kaw as tuɗ tam faraya kay muɗ tuwa' liwis hiɗi namɗi, kay kayn yawi.

24Nigi ma muɗ tuwgi liwisi hiɗi sle namna can noŋɗi, kay sum sa nan min digiɗsi goy vokgin ɗawni, tuwsi muɗi liwis hiɗi sle namna cani. 25Nagat muɗi kisi liwisi, nan ma ka kitat kay jiw-zlat ta haya'ta, nagata ma noy sum sa haya'na goyo. 26Nigi ma li kuɗ gatta hiɗi dita vanu, liwis namna cani, nigi sa vuɗi vona kaw, sum sa pulla sa ka li ziy jargin kaw ma kal tuwgi hayamɗi. 27Kaf cani mi slen ma liwisna ma sum sa hay nagat jewgin lumna, nisi muɗ nagat goy liwisi. 28Ligi ŋali, la nigi muɗ nagat liwisi, na' kaw ma noygi goyo ki na' noy sum sa haya' jewn goy nala lay. 29Kay liwis namna kaf cani, la sa li mara kep jaramu; ma kaam selem goy jar sumuna valamu. 30Nigi ma li kuɗ vun-ma-gatna vanu, sle ma liwisna ma nisi lum jewgin kayni, nigi ma lumɗi, ma muɗ tuwgi liwisɗi. Nanu mi Ma-Vatɗina, Lawna vigiya.

Currently Selected:

SA LEVITNA 18: Massana

Highlight

Copy

Compare