SA LEVITNA 10
10
Kuta vi Ma-Vatɗin ŋal gurona vi Aaron sa ma'na goyo
1Gurona vi Aaron, Nadab hiɗi Abihu, gigekaw sli ganun hay ɓalamu ɓalamu, cuk kut hayamu, tun urdin kulo kalamu; nisi mar kut ta pulta vok ir Ma-Vatɗina, hagat may vuli kisi kay kaynɗi. 2Kut kalay goy vok ir Ma-Vatɗin pa, ŋalsi goyo. Nisi mit gaa vok iramu.
3Musus di tam Aaron: Ma-Vatɗina di goy tigi kayn ala: Nam min ala sum sa min co goboy talamu ma sli yam peldetta valam kulo'o, nala nam ma fi suburta vok ir sumun kafe. Aaron min di vaɗi.
4Bugolda Musus yi Miskayel hiɗi Elsafan gurona vi Uziyel sa nosiyom Aaronna, nam ka disi ala: Nigiyay goboyo, ɓosiyogina nigi ma narsi goy gine'e hiɗi liyn ma peldetna, goy bugol guɗukŋa. 5Nisi co'o, ki Musus di tisi nala, nisi ɗutsi tuwsi hay sligar-tuwna visiya, tuɗsi goy gine'e hiɗi guɗukŋa.
6Musus di tam Aaron, tam Eliyazar hiɗi Itamar gurona vi Aaron ala: Nigi ma hin yigi goy ɦawa noŋɗi, nigi ma jet sligara vigi goy noŋɗi, la naɗi nigi ma mita, Ma-Vatɗin kaw dikam ma ɓulak kat sumun noŋ kaf. Hingi ɓosiyogina hiɗi ziyna vi Israyel kaf tiy kay nisi sa Ma-Vatɗin ŋalsi goy hiɗi kutna. 7Nigi ma cukay goyo hay guɗuk ma fi-tuwn pa noŋɗi. La naɗi nigi ma mita; kay mul ma ɦok-kamna vi Ma-Vatɗina ka ɦoki kigiya. Nisi li kuɗ va ma Musus dumna.
Telda tam Aaron hiɗi gurona valamu kay ci dolayna Jew a nisi cuk hay tabernaklena
8Ma-Vatɗina di tam Aaron ala: 9Hay li ma naŋ hiɗi gurona vaŋu min cuk hay guɗuk ma fi-tuwna, nigi ma ci vinɗi, ci dolay ma hiwiraŋ yaŋɗi kaw, kay a nigi ma mitɗi: Gatta kayni ma hin dok-doko jar gurona vigiya, 10kay a nigi ma poŋ jar sle ma peldetna hiɗi sle ma goy jiyna, sle ma liwisna hiɗi ma liwisɗina. 11Kay hat mi gurona vi Israyel gatta ta Ma-Vatɗin vulsiya hiɗi ɓam Musus.
12Musus di tam Aaron, mi Eliyazar, mi Itamar hiɗi gurona vi Aaron sa hin ma'na ala: Nigi ma sli dir ɗifin ma hin goy kuɗ ɗifin ma ŋalay hay kuta vok ir Ma-Vatɗina, nigi ma tum vok ir Ma-Vatɗina hiɗi kufn kuɗumɗi, kay kayni mi va ma peldet ŋolo. 13Nigi ma tum hay liy ma peldet suwa, kay ɗifin ma ŋalay hay kut kayni, nam mi galla vaŋu hiɗi galla vi gurona vaŋu, kay dit hini tan nala. 14Lo, naŋu hiɗi gurona vaŋ sa jufayna hiɗi sa boyna, war-digŋa ma muɗum galamna hiɗi bigiyna ma vum kulona, nigi ma tum hay liyn ma peldetna; kay nam vuli migiya, mi galla vaŋu hiɗi gurona vaŋu, hay ɗifinna vi lop ma slugona vi gurona vi Israyel. 15Nisi ma maramu, tapam hiɗi mul ma koti kay ŋalam goy hay kutna, hiɗi war-digŋa ma muɗum galamu hiɗi bigiyta ta va' kulo'o vok Ma-Vatɗina: Nam ma hin ir vaŋu hiɗi gurona vaŋu, gatta na'ta ma hin nala dok-doko, ki Ma-Vatɗina vul hagat nala.
16Musus gar ɦu ma poora, nam fum goy ŋalaya. Ki kayn nala nam muɗ ɦiy kat Eliyazar hiɗi Itamar, gurona vi Aaron sa hinna. Nam di'e: 17ɦu ma poora nigi min tum hay liyn ma peldetnɗi kay mige? Kay nam kayni peldete, Ma-Vatɗin vulgit kayni kay nigi ma ziy jiw-zlata vi sumuna, kay nigi ma li poora kisi vok Ma-Vatɗina. 18Ɗuwa, busuwna vi ɦuna nigi ma tuɗum kalaf hay liyn ma peldetna noŋɗi; may laliyan nigi as tum kalaf hay liyn ma peldetna, ki hagat vuli tan kayn nala. 19Aaron di tam Musus: Humaŋu, vaydi nisi li ɗifinna visi ma poora hiɗi ma ŋal-goynawa vok ir Ma-Vatɗina, bugol va ma li tanu kayni, la ɦu ma poora nan tum tiy vaydi lo, lawta kayni as li kir Ma-Vatɗin ŋaa'a su? 20Musus hum lawta kayni, nam vi kuɗa'a.
Currently Selected:
SA LEVITNA 10: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
