JOWEL 4
4
Kitat kay jaf-sumun kaf
1Wulini ɗuwgiya,
hay buur namna ɗawni,
hay li ma sumuna vi Yuda hiɗi sumuna vi Yerusalem
nan hotsiyawa vo'ona,
2Nan ma tok jaf-sumun kaf,
nan ma narsi gaa hay liyn ma lokŋa vi Yosafat,
ɗawni nan ma ka kitat kisiya,
kay law ma nisi lum tam sumuna vanu sa Israyella,
sa nisi mersi goy jar sumuna,
kay nagata vanu ta nisi ɓurawa' goy jarsita.
3Sumuna vanu nisi ŋaɓsi kuɗ hayta;
guro sa joriyona nisi muɗsi hiɗi boy sa viyuwna.
Guro sa boyna nisi muɗsi goy hiɗi dolay vinna,
ma nisi cumna.
4Nigi sum sa hay Tirus hiɗi Sidonna,
nigi garam tanu mi mige?
Nigi kaf sa tokay kuɗ sa Filistina.
Nigi min job yigi katan su?
La nigi min job yigiya,
nan min hotgi job-yamda vigi kay yigi ma ɗeŋe.
5Gurjuta vanu hiɗi or nigi yawam goyo,
slena vanu ma ŋaana ma jifiy ŋolo,
nigi yawamu tuɗ cukum hay tempella vigiya.
6Gurona vi Yerusalem hiɗi gurona vi Yuda
nigi gussi goy tam gurona vi Yavan,
kay jarsi ma ja goy gine'e hiɗi nagata visiya.
7Wulin kayni nan min hotsiyaya,
hay liyn ma nigi gussi goy hayam pana,
nan min hot joota vigi kay yigi ma ɗeŋe.
8Joriyona hiɗi guro-boyna vigiya,
nan min hot gussi goy hay ɓam gurona vi Yuda,
nisi ma gussi goy voksi tam sum sa Sabeena,
jaf-sum sa goy gine'e,
Din mi Ma-Vatɗina.
9Siwelgi labar namna goy tam jaf-sumuna,
kotgi tuwgi kay duura,
zliygi sum sa wi duur kulo'o.
Hinsi co goboyo,
hinsi jik kulo'o,
nisi kaf sa wi duura.
10Zlagi ɗugumna vigi goy kew-gaferaŋi,
ceɗna vigi kaw zlagit goy kaway-ma-duura.
Naŋ ma maŋayn kaw daŋ ala nan dono'o.
11Ligi koloyo, nigiyaya,
nigi sum sa ka ŋuyina kafe,
tokgi tuwgiya.
Ɗawni, Ma-Vatɗina,
cukaŋ sumuna vaŋ sa donon gaa tisiya.
12Hin jaf-sumun kaf zliy kulo'o,
hinsi tuɗ tam liyn ma lokŋa vi Yosafat,
ɗawni nan min mus kay zlamda-mulda vanu,
kay ka kitat kay jaf-sumun sa ka ŋuyanna.
13Yawgi hiramna hay ɓigiya,
kay feɗn coowa.
Nigiya keslgi gulda-guldana,
kay liyn ma kesl gulda-guldana hayamna hobawa,
doway-firin kulfutawa goyo.
Kay joota visiya na' suwi ŋolo.
14Nisi mi vokŋa ma ŋolo,
vok ma ŋolo, toki hay lokŋa,
ma ka kitat hayamna,
kay buura vi Ma-Vatɗin coowa goboyo,
hay liyn ma lokŋ ma ka kitat hayamna.
15Fatta hiɗi tilla ma muɗ jufunu,
mislekŋa ma vul haraŋa valam loɗi.
16Goy hay Siyon pa,
Ma-Vatɗin ma ci gumu,
hay yerusalem nam ma di delemu.
Dukalawna hiɗi nagata ka geɗa.
May Ma-Vatɗina mi liyn ma ŋayna vi sumuna valamu,
liyn ma jafna vi Israyel ŋay gaa kuɗumna.
17Nigi ma wi ala nanu mi Ma-Vatɗina Lawna vigiya,
liyn ma musta vanu ka hay Siyon,
ti hiɗiyta vanu ta peldetna.
Yerusalem ma li dok-dok peldete,
sum sa pulla as a tun sesi kulo haya'ɗi.
18Hay buur namna ɗawni,
vin ma jibetna ma jaŋ goyo kay yam hiɗiyt pa,
miira ma jaŋay kulo kay yam boŋoloŋŋa pa,
niyn ma hotay hay liyna vi Yuda ma vi niyn kafe.
Niy hena ma riŋay goy hay ziyna vi Ma-Vatɗin pa,
ma ŋuruɓ lokŋa vi Sittim.
19Egipte ma vat goyo,
Edom ma muɗ goy mi ful ɦawa'a.
Kay joota ta nisi la' tam gurona vi Yudata.
Sum sa li law ma joo noŋɗin nisi ɦoksi busuwsi goyo,
kuɗsi vo lay.
20May Yuda ziyn ma lak haya' dok-doko.
Jaf-sumun voksiya voksiya ma li ziy hay Yerusalem.
21Busuwsi sumun ɦokom goyo,
ma nan bay jobom yalam tuwana nan ma jobomu,
Ma-Vatɗina ma mus dok-dok hay Siyon.
Currently Selected:
JOWEL 4: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001